يزرايل مەن پالەستينا اراسىنداعى قارۋلى قاقتىعىسقا بايلانىستى بىرقاتار مەملەكەت ول ەلدەردەن ءوز ازاماتتارىن ەۆاكۋاتسيالاپ جاتىر. وسى رەتتە «Air Astana» اۋە كومپانياسى تەل-اۆيۆتەگى وتانداستارىمىزدى الماتىعا الىپ كەلۋ ءۇشىن ارنايى رەيس ۇيىمداستىرعانى بەلگىلى. الماتى ۋاقىتىمەن 23 ساعات 45 مينۋتتا بورتىنا 166 ادام مىنگەن ۇشاق الماتى حالىقارالىق اۋەجايىنا كەلىپ قوندى.
ەلگە ورالعان جولاۋشىلاردى تۋىستارى مەن جاقىندارى اۋەجايدان قارسى الدى. ءبىز دە سولاردىڭ قاتارىنان تابىلدىق. ارنايى رەپاترياتسيالىق رەيسپەن كەلگەندەردىڭ 124-ءى قازاقستان ازاماتى, قالعانى – شەتەلدىكتەر. الماتىعا كەلگەن ازاماتتاردىڭ ىشىندە «بولاشاق» باعدارلاماسى بويىنشا تاعىلىمدامادان ءوتىپ جاتقان 14 ستيپەنديات بار. اۋەكومپانيا ماماندارى ءيزرايلدىڭ اكىمشىلىك اۆياتسيا قىزمەتى رەيستىڭ جولعا شىعۋىنا كەلىسىم بويىنشا كومەك كورسەتكەنىن مالىمدەدى.
– «Air Astana» اۋە كومپانياسى وتانداستارىمىزدىڭ تاعدىرىنا الاڭداپ, وسىنداي شەشىم قابىلدادى. ازاماتتاردى تەل-اۆيۆتەن شىعارىپ الۋ وڭايعا تۇسپەدى. ويتكەنى ءبىزدىڭ باسشىلىققا بارلىق قيىندىقتار مەن تاۋەكەلدەردى ەسكەرۋگە تۋرا كەلدى. ول جاقتا قاۋىپ وتە جوعارى. دەگەنمەن ەل ازاماتتارىنىڭ امان-ەسەن ورالۋى تەك اۋەكومپانيانىڭ تاۋەكەلىمەن عانا ەمەس, ەلشىلىكتىڭ قولداۋىمەن جۇزەگە اسقانىن ايتۋىمىز كەرەك. رەيس ۋاقىتى كەستەدەن اۋىتقىعان جوق. ال جالپى سوعىس ءورتى تۇتانعان ەلدەرگە تۇراقتى باعىتتارىمىزدى توقتاتقان بولاتىنبىز. بورتتاعى 166 ادامنىڭ ەكەۋى نارەستە. تاعى مۇنداي رەيستەردىڭ قايتالاناتىنى تۋرالى ازىرگە ايتا المايمىز. جولاۋشىلار ءتىزىمىن يزرايلدەگى قازاقستان ەلشىلىگى جاساقتادى. بيلەتى جوق ازاماتتارعا دا جەدەل تۇردە تومەندەتىلگەن تاريفپەن بيلەتتەر ساتتىق. وسى ساپارعا ەڭ تاجىريبەلى ۇشقىشتار مەن ەكيپاج مۇشەلەرى تاڭدالدى. كوماندير ولەگ كولەسنيكوۆ باستاعان ماماندار ماڭىزدى تاپسىرمانى جاقسى ورىنداپ شىقتى, – دەيدى «Air Astana» اۋە كومپانياسىنىڭ كوممۋنيكاتسيا جونىندەگى مەنەدجەرى تىلەك ابدراحيموۆ.
تۋىستارىمەن ساعىنىسىپ كورىسكەن بىرقاتار جولاۋشىنى اڭگىمەگە تارتتىق. سولاردىڭ ءبىرى – «بولاشاق» ستيپەندياسى بويىنشا يزرايلدە تاعىلىمدامادان ءوتىپ جاتقان ءۇمىت جەلدىباەۆا.
«يزرايلدەگى قازاقستان ەلشىلىگى العاشقى كۇننەن باستاپ بىزگە دەمەۋ بەردى. سوندىقتان بالەندەي قورقىنىش بولعان جوق. ءبىز ءومىر ءسۇرىپ جاتقان حايفا قالاسى نەگىزىنەن تىنىش. دەگەنمەن دابىلداردىڭ داۋسى, توبەدەگى ۇشاقتاردىڭ جيىلەۋى ازداپ ۇرەي تۋعىزدى. الدىن الا ساقتانىپ, ەلگە قايتۋعا بەل بۋدىق. ءبىز ۇشاققا مىنگەلى تۇرعاندا كوپتەگەن شەتەل ازاماتى وزدەرىن الا كەتۋدى ءوتىنىپ, ءتىپتى ۇشاقتا جەرگە وتىرىپ بارۋعا دايىن ەكەندەرىن ايتىپ جاتقانىن بايقادىم», دەيدى ول.
الماتى