قاي سالانى بولسىن حالىقارالىق تالاپتار دەڭگەيىنە كوتەرۋ كەرەك. مۇنسىز بولمايدى. سوندىقتان شەت ەلدەردىڭ تاجىريبەسىن دە, قارجىسىن دا پايدالانۋدىڭ وڭتايلى جولدارىن ىزدەستىرگەن ابزال. بۇدان ۇتپاساق, ۇتىلمايمىز.
ۇلىتاۋ وبلىسى باسشىلىعى دەنساۋلىق سالاسىنا ينۆەستيتسيا تارتۋ ماقساتىندا فرانتسيا دامۋ اگەنتتىگىمەن (AFD) تىعىز بايلانىس ورناتا باستادى.
جاقىندا وبلىسقا قۇرامىندا اتالعان اگەنتتىكتىڭ 6 مامانى بار, حالىقارالىق دەڭگەيدەگى ساراپشى الەكساندرا تيركيۋير باسقارعان ارنايى دەلەگاتسيا كەلدى. دەلەگاتسيانى وبلىس اكىمى بەرىك ابدىعالي ۇلى قابىلداپ, وبلىستىڭ دەنساۋلىق ساقتاۋ جۇيەسىنىڭ جاعدايى, باسىم باعىتتار, كوزدەلگەن جوبالار, ينفراقۇرىلىم مەن ماتەريالدىق-تەحنيكالىق جاراقتاندىرۋ ماسەلەلەرى بويىنشا كەڭىنەن اڭگىمە قوزعادى.
الەمنىڭ 150-دەن اسا ەلىندە 4 200-دەن استام جوبانى جۇزەگە اسىرۋمەن اينالىسىپ جاتقان اگەنتتىك وبلىس باسشىلىعىنىڭ ۇسىنىستارىنا قىزىعۋشىلىق تانىتتى. دەلەگاتسيا ءوڭىردىڭ كەيبىر مەديتسينا مەكەمەلەرىنە, اتاپ ايتقاندا, وبلىستىق كوپسالالى اۋرۋحاناعا جانە «جەزقازعان» مەديتسينالىق ورتالىعىنا ارنايى بارىپ, ونداعى ەمدەۋ ءۇردىسىن كوزدەرىمەن كوردى, پىكىر الماستى.
فرانتسۋز تاراپى وبلىستىڭ دەنساۋلىق سالاسىنا قاتىستى ماسەلەلەردى ودان ءارى تالداۋ, تالقىلاۋ قاجەتتىگىنە توقتالدى. دەمەك, ەكىجاقتى بايلانىس ودان ءارى جالعاسىن تابادى.
ۇلىتاۋ وبلىسى