اۋعانستاننىڭ باتىس اۋماعىندا بولعان ءزىلزالا (ەپيتسەنترى – گەرات پروۆينتسياسىندا) سالدارىنان 2 500-گە جۋىق ادام قازا بولىپ, 9 مىڭ تۇرعىن جارالاندى. 2 مىڭ ءۇي قيراپ, حالىق باسپاناسىز قالىپ وتىر. تابيعي اپاتتان كەيىن ەلىمىزدىڭ ۇكىمەتى اۋعان حالقىنا شۇعىل گۋمانيتارلىق كومەك كورسەتۋ تۋرالى شەشىم قابىلدادى.
پرەزيدەنت قاسىم-جومارت توقاەۆتىڭ تاپسىرماسىنا بايلانىستى «KazAID» وتاندىق حالىقارالىق دامۋ اگەنتتىگىنىڭ بەلسەندى قاتىسۋىمەن كەشە اۋعانستاننىڭ گەرات پروۆينتسياسىنا ارنايى اۆيابورتپەن سالماعى 1600 توننادان اساتىن ازىق-ت ۇلىك, شاتىرلار, كيىم-كەشەك جانە توسەك-ورىن جابدىقتارىن قامتيتىن ءىرى گۋمانيتارلىق جۇك جەتكىزىلدى. ەلىمىزدەن جەتكەن كومەكتى اۋعانستانداعى تابيعي اپاتتاردىڭ سالدارىمەن كۇرەس جونىندەگى شتابتىڭ وكىلدەرى, اتاپ ايتقاندا, ازاماتتىق اۋەجايلاردىڭ باس ديرەكتورى گارۆال ابدۋل ساتتار قابىلدادى.
سونىمەن قاتار 10 قازاندا گەرات پروۆينتسياسىنا 45 ادامنان تۇراتىن توتەنشە جاعدايلار مينيسترلىگىنىڭ جەدەل-قۇتقارۋ توبى كەلىپ, قازىرگى تاڭدا نايبروفي ەلدى مەكەنىندە (گەرات قالاسىنان 50 شاقىرىم جەردە) قۇتقارۋ جۇمىستارىن جۇرگىزىپ جاتىر. تجم تاراتقان مالىمەتكە قاراعاندا بۇل – ءزىلزالادان ەڭ قاتتى زارداپ شەككەن جەر. مۇندا حابار-وشارسىز كەتكەندەردىڭ سانى كوپ. جاقىن ارادا اۋعان حالقىنا تەمىرجول كولىگىمەن «حايراتون» ستانساسىنا (اۋعانستاننىڭ بالح پروۆينتسياسى) كەزەكتى ءىرى گۋمانيتارلىق جۇك جىبەرىلمەك.
بۇدان بولەك, ۇلتتىق ۇلاننىڭ بورتىمەن دە اۋعانستانعا گۋمانيتارلىق كومەك ءساتتى جەتكىزىلدى. 8 وفيتسەر مەن سەرجانتتان تۇراتىن ەكيپاج 1300 شاقىرىم قاشىقتىقتى ارتقا تاستاپ, گەرات پروۆينتسياسىنا مەديتسينالىق بۇيىمدار مەن ءدارى-دارمەك اپپاراتتارى, سونداي-اق شاتىرلار تۇرىندەگى گۋمانيتارلىق جۇكتى الىپ باردى.
– جەر سىلكىنىسى كەزىندە زارداپ شەككەن تۇرعىندارعا گۋمانيتارلىق كومەك جەتكىزۋ جونىندەگى بىتىمگەرشىلىك ميسسياسى ورىندالدى. بۇل ءبىزدىڭ مۇنداي جۇكتەردى تاسىمالداۋداعى العاشقى تاجىريبەمىز ەمەس. بۇعان دەيىن ۇلتتىق ۇلان اۆياتسياسى گۋمانيتارلىق جۇكتەردى الىس شەتەلدەرگە, سونىڭ ىشىندە ەكى رەت سيرياعا, ءتورت رەت تۇركياعا جەتكىزگەن ەدىك. ەستەرىڭىزدە بولسا, بيىل اقپان ايىندا وسى ەلدەردە جويقىن جەر سىلكىنىسى بولدى. ءبىز بۇل جولى دا العا قويعان مىندەتتى ءساتتى ورىندادىق, – دەدى اۋە كەمەسىنىڭ كومانديرى قۇرمانعالي توپانوۆ.
گەرات پروۆينتسياسىنىڭ گۋبەرناتورى شەيح نۇر احماد يسلام دجار اۋعان حالقى اتىنان ەلىمىزگە تۇراقتى گۋمانيتارلىق كومەك كورسەتكەنى, قيىن ۋاقىتتا قولداۋ كورسەتكەنى ءۇشىن العىسىن ءبىلدىردى.