قىتايدىڭ حانچجوۋ قالاسىندا مارەسىنە جەتكەن XIX جازعى ازيا ويىندارىندا ءبىر التىن, ءبىر كۇمىس مەدال جەڭىپ العان ۆەلوشاباندوز الەكسەي لۋتسەنكو اراعا اپتا سالىپ تۇركياداعى تۋرنيردە كەزەڭ جەڭىمپازى اتاندى.
1963 جىلدان بەرى ۇزدىكسىز وتكىزىلىپ كەلە جاتقان ۆەلوسپورتتان «تۇركيا پرەزيدەنتى تۋرىنا» قاتىسىپ جاتقان وتانداسىمىز جارىستىڭ ءۇشىنشى كۇنىنە جوسپارلانعان تاۋلى كەزەڭىندە جەڭىس تۇعىرىنا كوتەرىلدى. بيىكتىگى 18,4 شاقىرىمدى (كەزەڭنىڭ جالپى ۇزاقتىعى 104,1 شاقىرىم) قۇرايتىن باباداگ تاۋىن ءبىرىنشى بولىپ ەڭسەرىپ, مارەگە العاشقىلاردىڭ ءبىرى بولىپ جەتتى. الەكسەي لۋتسەنكونىڭ سوڭىنا ىلەسكەن «Bora–Hansgrohe» كومانداسىنىڭ گەرمانيالىق ۆەلوشاباندوزى بەن زۆيحوفف پەن «استانانىڭ» كولۋمبيالىق سپورتشىسى حارولد تەحادا ەكىنشى جانە ءۇشىنشى ورىنداردى ءوزارا ءبولىستى.
جالپى, «تۇركيا پرەزيدەنتى تۋرى» قازاقستان سپورتشىلارى ءۇشىن ءساتتى تۋرنير سانالادى. 1995 جىلدان بەرگى جارىستاردا وتانداستارىمىز الدىنا جان سالماي ءجۇر. ايتالىق, 1995 جىلعى جارىستىڭ العاشقى ءۇش ورنى وتانداستارىمىزعا بۇيىرعان. اندرەي كيۆيلەۆ باس جۇلدەنى جەڭىپ السا, ۆاديم كراۆچەنكو – كۇمىس, سەرگەي لاۆرينەنكو قولا جۇلدەگەر اتانعان-دى. ارادا بەس جىل وتكەندە لاۆرينەنكو توپ جارسا, كراۆچەنكو ەكىنشى ورىننان كورىندى. 2001 جىلى لاۆرينەنكو ەكىنشى رەت ءۇشىنشى ورىنعا تابان تىرەسە, 2011 جىلى اندرەي زەيتس كۇمىسكە قول جەتكىزدى. ءبىر جىلدان كەيىن الەكساندر دياچەنكو جالپى ەسەپتە ۇزدىك شىقتى.