7-14 قاراشا كۇندەرى يسپانيانىڭ سەۆيليا قالاسىندا تەننيستەن ايەلدەر اراسىنداعى «بيللي دجين كينگ» كۋبوگىنىڭ فينالدىق كەزەڭى وتەدى. بۇل سىندا وتانداستارىمىز دا باق سىنايدى.
كۇنى كەشە ەل قۇراماسىنىڭ كاپيتانى ياروسلاۆا شۆەدوۆا سەۆيليادا سايىسقا تۇسەتىن تەننيسشىلەردىڭ ءتىزىمىن جاريالادى. اتالعان دودادا ەل نامىسىن قازاقستاننىڭ ءبىرىنشى, الەمنىڭ بەسىنشى راكەتكاسى ەلەنا رىباكينا, دۇنيەجۇزىلىك رەيتينگتە 68-ورىندا تۇرعان يۋليا پۋتينتسەۆا, جۇپتىق سىندا 32-ساتىعا جايعاسقان اننا دانيلينا مەن 154-ورىنداعى جىبەك قۇلامباەۆا جانە كەيىنگى ءبىر ايدا تابىستى ونەر كورسەتىپ, الەمدىك رەيتينگتە 300 ساتىعا دەيىن جوعارىلاعان جاس تەننيسشى ارۋجان ساعاندىقوۆا (743) قورعايدى.
جەرەبە قورىتىندىسى بويىنشا قازاقستان ايەلدەر قۇراماسى «ۆ» توبىندا سلوۆەنيا جانە اۋستراليا قۇرامالارىمەن سىنعا تۇسەدى. جاسىل قۇرلىق وكىلدەرى بىلتىرعى باسەكەنىڭ كۇمىس جۇلدەگەرى سانالادى. سونىمەن قاتار فينالدا بىلتىرعى «بيللي دجين كينگ» كۋبوگىنىڭ جەڭىمپازى شۆەيتساريا, جارىس قوجايىنى يسپانيا, سونداي-اق فرانتسيا, كانادا, چەحيا, يتاليا, اقش, گەرمانيا جانە ۋايلد-كارد يەگەرى پولشا قۇرامالارى وينايدى.