مەملەكەت باسشىسى تەمىربەتون بۇيىمدارى زاۋىتىنا باردى

«قۇرىلىس-كولىك كومپانياسى» جشس بيىل ىسكە قوسقان جوبانىڭ جالپى قۇنى – 2,6 ميلليارد تەڭگە. ونىڭ 370 ميلليون تەڭگەسى «دامۋ» كاسىپكەرلىكتى قولداۋ قورى ارقىلى قارجىلاندىرىلعان. كومبينات كۇنىنە 200 تەكشە مەتر تەمىربەتون بۇيىمدارىن وندىرەدى. وندىرىسكە قاجەتتى شيكىزاتتار جەرگىلىكتى جەردەن الىنادى.

سونىمەن قاتار مەملەكەت باسشىسىنا ايماقتاعى كاسىپورىنداردان شىعاتىن باسقا دا ءونىم تۇرلەرى تانىستىرىلدى. ولاردىڭ باسىم بولىگى – قۇرىلىس سالاسى ءۇشىن اسا قاجەتتى ماتەريالدار. اتاپ ايتقاندا, تاباقشا شىنى («OrdaGlass» جشس), پۆح-قۇبىرلارى مەن فيتينگتەر («كنك كەميكال» جشس), كاسكالار («NP-Consalting» جشس), پليتكا جەلىمدەرى مەن ساندىك سىلاقتار («ۆەگا-پروم» جشس), جول جانە تروتۋار بورديۋرلەرىن, قۇم-كەرامزيت بلوكتارىن («سادۋاكاسوۆ ج.ا» جك), قيىرشىق تاستىڭ ءارتۇرلى فراكتسيالارىن («Shalkiya Dolomite Operating» جشس), تەرەزەلەر مەن اينالار («كومفورت KZ» جشس), اك («وردا ستروي ماركەت» جشس), كىرپىش ونىمدەرىن («مەليوراتور» جشس) جانە تاعى دا باسقا بۇيىمداردى شىعارادى. سونداي-اق كورمەگە «Dalatex» كومپانياسىنىڭ تەكستيل بۇيىمدارى, «وركەن الەم» جشس شىعاراتىن جەكە قورعانىس قۇرالدارى قويىلعان.

پرەزيدەنت كاسىپكەرلەرمەن اڭگىمەلەسۋ بارىسىندا شاعىن جانە ورتا بيزنەستى وركەندەتۋ ءۇشىن مەملەكەت تاراپىنان جان-جاقتى قولداۋ كورسەتىلەتىنىن ايتتى.

ءوندىرىس ورنىندا وبلىس اكىمى نۇرلىبەك نالىباەۆ مەملەكەت باسشىسىنا قىزىلوردا ءوڭىرىنىڭ الەۋمەتتىك-ەكونوميكالىق دامۋ قارقىنى جونىندە باياندادى.

ايماق باسشىسىنىڭ ايتۋىنشا قىزىلوردا وبلىسىنىڭ جالپى الەۋمەتتىك-ەكونوميكالىق دامۋ كورسەتكىشتەرىندە ءوسىم بايقالادى. ناقتى اتاعاندا, وڭدەۋ ونەركاسىبى 115,8 پايىزعا (227 ملرد تەڭگە), اۋىل شارۋاشىلىعى 101,6 پايىزعا (157 ملرد تەڭگە), قۇرىلىس 126,4 پايىزعا (117 ملرد تەڭگە), تۇرعىن ۇيلەر سالۋ 118,9 پايىزعا (618 مىڭ ش.م), ساۋدا-ساتتىق 104,1 پايىزعا (531 ملرد تەڭگە) ارتقان. نەگىزگى كاپيتالعا قۇيىلعان ينۆەستيتسيا كولەمىن بيىل 472 ميلليارد تەڭگەگە جەتكىزۋ جوسپارلانعان. ونىڭ باسىم بولىگى جەكە ينۆەستيتسيالارعا تيەسىلى.

وبلىستا «جايلى مەكتەپ» ۇلتتىق جوباسى اياسىندا الداعى ءۇش جىل ىشىندە 27 مەكتەپ سالۋ جوسپارعا الىنىپ, قازىرگى كەزدە قىزىلوردا قالاسىندا فيزيكا-ماتەماتيكا باعىتىنداعى مەكتەپ-ينتەرناتى سالىنىپ جاتىر.

ەمحاناسى مەن ونكولوگيالىق بولىمشەسى بار 300 ورىندىق كوپبەيىندى اۋرۋحانانىڭ, قان ورتالىعىنىڭ قۇرىلىسى جۇرگىزىلىپ جاتىر. «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا ەلدى مەكەندەردە 27 مەديتسينالىق-امبۋلاتوريالىق نىسان سالۋ جۇمىسى ءجۇرىپ جاتىر.

وڭىردە بىرقاتار سپورت جانە الەۋمەتتىك-مادەني نىسان بوي كوتەرمەك. اتاپ ايتقاندا, جۋىردا 7 مىڭ ورىندىق ورتالىق ستاديوننىڭ, جابىق باسسەينى بار كوپسالالى دەنە شىنىقتىرۋ-ساۋىقتىرۋ كەشەنىنىڭ قۇرىلىسى باستالادى. اۋدانداردا شاعىن 11 دەنە شىنىقتىرۋ كەشەنىن سالۋ ءۇشىن جەرگىلىكتى بيۋدجەتتەن 2,6 ميلليارد تەڭگە بولىنگەن. وبلىس ورتالىعىندا سالىنىپ جاتقان ونەر ورتالىعى جىل اياعىنا دەيىن ەل يگىلىگىنە پايدالانۋعا بەرىلەدى.

نۇرلىبەك نالىباەۆ ءوڭىردىڭ تىنىس-تىرشىلىگىن تۇلەتۋگە جەرگىلىكتى كاسىپكەرلەر دە ەلەۋلى ۇلەس قوسىپ جاتقانىن ايتتى. الەۋمەتتىك نىساندار سالۋ, دەمالىس ساياباقتارىن, ويىن-سپورت الاڭدارىن, ۇيلەردىڭ قاسبەتتەرىن جاڭارتۋ, اۋلالاردى اباتتاندىرۋ جۇمىستارى دەمەۋشىلەردىڭ كومەگىمەن جۇزەگە اسىرىلىپ كەلەدى.