مەندەلەەۆ سىنىبى

مەملەكەت باسشىسىنىڭ تاپسىرماسىن جۇزەگە اسىرۋدى قولعا العان م.ح.دۋلاتي اتىنداعى تاراز وڭىر­لىك ۋنيۆەرسيتەتى, حيميا ءوندى­رى­سىنىڭ لوكوموتيۆى سانالاتىن «قاز­فوس­فات» جشس جانە د.مەن­دە­لەەۆ اتىنداعى رەسەي حيميا-تەحنو­لو­گيا ۋنيۆەرسيتەتى بىرنەشە اي بۇ­رىن ۇشجاقتى كەلىسىمگە قول قو­يىپ, تمد ەلدەرى اراسىندا العاش رەت حيميا ونەركاسىبى سالاسىنداعى جەلى­لىك كامپۋستىڭ تۇساۋكەسەرىن ۇيىم­داس­تىر­دى.

باستاعان ءىستى اياعىنا دەيىن جەت­كىزۋ­دى ويلاستىرعان وڭىرلىك ۋنيۆەر­سيتەت ۇجىمى «مەندەلەەۆ سىنىبى» جوباسىنىڭ سالتاناتتى اشى­لۋ ءراسىمىن جوعارى دەڭگەيدە وتكىزدى. ءىس-شاراعا د.مەندەلەەۆ اتىن­دا­عى ۋنيۆەرسيتەتتىڭ پروفەسسور­لا­رى, «قازفوسفات» قىزمەت­كەر­لەرى, مەكتەپتەردەگى حيميا ءپانى­نىڭ مۇ­عا­لىم­دەرى, اتا-انالار جانە م.ح.دۋلاتي اتىنداعى ۋنيۆەرسي­تەت­تىڭ ۇجىمى, ستۋدەنتتەر قاتىستى.

بىرەگەي جوبانىڭ تۇساۋكەسەر راسىمىنە قاتىسقان وبلىس اكىمىنىڭ ءبىرىنشى ورىنباسارى نۇرجان كالەن­دەروۆ حيميا وندىرىسىنە قاجەتتى بىلىكتى مامانداردى دايارلاۋ ماقساتىندا قولعا الىنعان بىرلەسكەن ءىستىڭ ماڭىزى زور ەكەنىن اتاپ ءوتتى.

– وسى جىلدىڭ باسىندا پرەزي­دەنت قاسىم-جومارت توقاەۆ 2025 جىلعا قاراي ەلىمىزدە بەدەلدى شەتەلدىك ۋنيۆەرسيتەتتەردىڭ كەمىندە بەس فيليالىن اشۋدى تاپسىرعان بولا­تىن. مەملەكەت باسشىسى جاڭا ەكونوميكانى قۇرۋ ءۇشىن جوعارى وقۋ ورىندارىنىڭ باسەكەگە قابىلەت­تى­لى­گىن ارتتىرۋ ماڭىزدى ەكەنىن ايتتى. العاشقىلاردىڭ ءبىرى بولىپ م.ح.دۋلاتي اتىنداعى تاراز وڭىرلىك ۋني­ۆەرسيتەتى پرەزيدەنتتىڭ تاپسىرماسىن ورىنداپ, ستراتەگيالىق سەرىك­تەستەر سانالاتىن د.مەندەلەەۆ اتىنداعى رەسەي حيميا-تەحنولوگيا­ ۋنيۆەرسيتەتى جانە «قازفوسفات» جشس-مەن بىرلەسىپ, حيميا ونەركاسىبىنە ماماندار دايارلاۋ جونىندەگى كەلىسىمگە قول قويدى. بۇل, ارينە, قۇپ­تارلىق قادام, – دەدى نۇرجان كالەندەروۆ.

وڭىرلىك ۋنيۆەرسيتەتتىڭ رەكتورى مۇحتار بايجۇمانوۆتىڭ ايتۋىنشا, سۇرانىسقا يە جاڭا مامانداردى دايارلاۋ ماقساتىندا ىسكە اساتىن جوبا جاستاردىڭ يگىلىگى ءۇشىن قولعا الىنعان.

– وقىتۋ ءۇردىسى «2+1+1» فورماتى بويىنشا جۇزەگە اسىرىلادى. قىر­كۇيەك ايىنان باستاپ 3-كۋرستا وقيتىن 7 ستۋدەنتىمىز ماسكەۋ قالا­سىن­دا حيميالىق ينجەنەريا جانە ۇدەرىستەر بويىنشا ءبىلىم الۋدى باستادى. د.مەندەلەەۆ اتىنداعى رەسەي حيميا-تەحنولوگيا ۋنيۆەرسيتەتى حالىقارالىق دەڭگەيدە مويىندالعان جوعارى وقۋ ورنى ەكەنىن ايتا كەتكەن ءلازىم. تمد ەلدەرى مەن شەتەلدە حيميا جانە حيميا تەحنولوگياسى سالاسى بويىنشا جەتەكشى عىلىمي ورتالىق سانالاتىن ۇجىممەن بىرلەس­كەن جوبانىڭ بەرەرى كوپ, – دەيدى مۇحتار بايجۇمانوۆ.

ۇشجاقتى كەلىسىم نەگىزىندە جۇزەگە اساتىن جوبانىڭ العاشقى كەزەڭىندە 43 وقۋشى قابىلدانىپ وتىر. ءىس-شاراعا قاتىسقان اتا-انالاردىڭ اي­تۋىن­شا, قات ماماندىققا اڭسارى اۋعان بالا­لاردىڭ ءوز ءىسىنىڭ شەبەرى بولىپ شىعۋىنا مۇمكىندىك مول.

جاڭا جوبانىڭ تانىستىرىلىمىنا ارنايى قاتىسقان «قازفوسفات» جشس «مينەرالدى تىڭايتقىشتار» زاۋى­تى­نىڭ ديرەكتورى يۋن البەرت «مەن­دەلەەۆ سىنىبىن» قۇرۋدىڭ وڭىر­لىك دەڭگەيدە ماڭىزى زور ەكەنىن اتاپ ءوتتى. سونداي-اق ول وقۋ وزاتى بولعان تۇلەكتەر تۇراقتى جۇمىسپەن, جوعارى جالاقىمەن قامتاماسىز ەتىلەتىنىن تىلگە تيەك ەتتى.

ءىس-شارا بارىسىندا ءسوز العان د.مەندەلەەۆ اتىنداعى ۋنيۆەر­سي­تەت­تىڭ ءبىلىم بەرۋ باعدار­لا­مالارىن دامىتۋ جانە حالىقارالىق قىزمەت جونىندەگى پرورەكتورىنىڭ ورىنباسارى گەورگي شاحگيلديان كوپشىلىككە «مەندەلەەۆ سىنىبى» جوباسى تۋرالى ايتىپ بەردى. كەيىننەن وسى جوبانىڭ العاشقى قاتىسۋشىلارى سالتاناتتى تۇردە انت قابىلدادى.

تاراز