اپتا سوڭىندا الماتى وبلىسىندا ءوڭىر ەكونوميكاسىن دامىتاتىن اسا ماڭىزدى ەنەرگەتيكالىق نىسان – «كوكوزەك» قوسالقى ستانساسىنىڭ (قس-110/10-10كۆ) قۇرىلىسى اياقتالىپ, پايدالانۋعا بەرىلدى.
«كوكوزەك» قوسالقى ستانساسىنىڭ قۇرىلىسى «الاتاۋ جارىق كومپانياسى» اق, «سامۇرىق-ەنەرگو» اق ەلەكتر ەنەرگەتيكالىق حولدينگىنىڭ قۇرىلىمىنداعى كومپانيانىڭ قاراجاتى ەسەبىنەن جۇزەگە اسىرىلعان. جوبانىڭ قۇنى – 2,73 ملرد تەڭگە.
بۇل جوبا قاراساي اۋدانىندا بوس قۋات تاپشىلىعى بار يندۋستريالىق ايماقتى ەلەكتر ەنەرگياسىمەن قامتاماسىز ەتەدى. سونىمەن قاتار جاڭا قوسالقى ستانسا شاعىن جانە ورتا بيزنەس سۋبەكتىلەرىن سەنىمدى ءارى تۇراقتى تۇرە ەلەكترمەن جابدىقتاۋعا مۇمكىندىك بەرەدى دەگەن سەنىم مول.
الماتىمەن ىرگەلەس جاتقان قاراساي اۋدانىندا 110/10 كۆ «كوكوزەك» قوسالقى ستانساسىن سالۋ قاجەتتىلىگى بىرقاتار فاكتوردان تۋىنداعان. اتالعان وڭىردە قوسىمشا قۋاتتاردى بەرۋدىڭ شەكتەۋلى مۇمكىندىگى ماسەلەسى ءوڭىردىڭ ونەركاسىپتىك الەۋەتىنىڭ دامۋىن تەجەۋمەن قاتار, وڭىردەگى قوسالقى ستانسالاردىڭ جوعارى, ماكسيمالدى جۇكتەمەسى ەلەكتر جابدىقتارىنىڭ ءجيى اپاتتى ىستەن شىعۋىنا جانە تۇتىنۋشىلاردى, سونىڭ ىشىندە ءبىلىم بەرۋ جانە دەنساۋلىق ساقتاۋ نىساندارىن ەلەكتر قۋاتىمەن جابدىقتاۋداعى ۇزىلىستەرگە الىپ كەلدى. قوسىمشا ستانسانىڭ ىسكە قوسىلۋى اتالعان پروبلەمالاردىڭ ءتۇيىنىن تارقاتاتىن بولادى.
نىساننىڭ اشىلۋ سالتاناتىنا الماتى وبلىسىنىڭ اكىمى مارات سۇلتانعازيەۆ, «سامۇرىق-قازىنا» اق ستراتەگيا جانە اكتيۆتەردى باسقارۋ جونىندەگى باسقارۋشى ديرەكتورى ەرنات بەردىعۇلوۆ, «سامۇرىق-ەنەرگو» اق باسقارما توراعاسى قايرات ماقسۇتوۆ جانە «سامۇرىق-ەنەرگو» اق ءوندىرىس جانە اكتيۆتەردى باسقارۋ جونىندەگى باسقارۋشى ديرەكتورى رۋسلان تۇرعامباەۆ, «الاتاۋ جارىق كومپانياسى» اق باسقارما توراعاسى اباي اسىلوۆ قاتىسىپ, مەملەكەت باسشىسىنىڭ تاپسىرماسىنا سايكەس يندۋستريالدىق ايماقتى ەلەكتر ەنەرگياسىمەن جەتكىلىكتى مولشەردە قامتاماسىز ەتۋ جوبالارى مۇنىمەن شەكتەلمەي, جالعاسىن تاباتىندىعىن تىلگە تيەك ەتتى.
«قاراساي اۋدانىندا ورنالاسقان كوپتەگەن كاسىپورىننىڭ وبلىسىمىزدىڭ ەكونوميكالىق دامۋىنا قوساتىن ۇلەسى مول. قوسىمشا قۋاتتاردىڭ بەرىلمەۋى – اۋداننىڭ ونەركاسىپتىك الەۋەتىنىڭ دامۋىن تەجەپ كەلدى. مۇندا جاڭا جوبالاردى ىسكە اسىرۋ, سونداي-اق جۇمىس ىستەپ تۇرعان كاسىپورىنداردى جاڭعىرتۋ, ولاردىڭ وندىرىستىك قۋاتىن ارتتىرۋ مۇمكىندىگى شەكتەلگەن بولاتىن. «كوكوزەك» قوسالقى ستانساسىن سالۋ ارقىلى اتالعان ماسەلەلەردى شەشىپ وتىرمىز.
ارقايسىسى 63 مەگاۆولتامپەر بولاتىن 2 ترانسفورماتورى بار جاڭا قوسالقى ستانسانى پايدالانۋعا بەرۋ ترانسفورماتورلىق قۋاتتىڭ جەتىسپەۋشىلىگى پروبلەماسىن جويىپ قانا قويماي, شاعىن جانە ورتا بيزنەس سۋبەكتىلەرىن تۇراقتى ەلەكتر قۋاتىمەن جابدىقتاۋدى قامتاماسىز ەتەدى. سونىمەن قاتار بۇل ايماقتا الەۋمەتتىك-مادەني ماڭىزى بار وبەكتىلەردى سالۋ مۇمكىندىگىن كەڭەيتىپ, جاڭا جۇمىس ورىندارىنىڭ اشىلۋىنا ىقپال ەتەتىن بولادى. وسى يگىلىكتى ءىستى اتقارعان ءاربىر ازاماتقا جانە نىسان قۇرىلىسىن مەرزىمىندە اياقتاعان «Asia Group Energy» جشس-نا العىسىمدى بىلدىرەمىن», دەدى ءوڭىر باسشىسى مارات سۇلتانعازيەۆ.
سونداي-اق وبلىس اكىمى «كوكوزەك» قوسالقى ستانساسى قاراساي اۋدانى ءۇشىن عانا ەمەس, كورشىلەس ىلە, جامبىل اۋدانىنىڭ شارۋاشىلىقتارى ءۇشىن ءتيىمدى بولىپ وتىرعاندىعىن, كەلەشەكتە ولاردى دا ەلەكتر قۋاتىمەن جەتكىلىكتى مولشەردە قامتاماسىز ەتەتىندىگىن اتاپ ايتتى. الماتى اينالما جولىنىڭ اشىلۋى وڭىردە ينۆەستيتسيالىق جوبالاردىڭ تارتىمدىلىعىنا وڭ اسەرىن تيگىزىپ كەلەدى. وسى سەبەپتى, قوسالقى ستانسانىڭ ماڭىزدىلىعى وبلىستىڭ الەۋمەتتىك-ەكونوميكالىق الەۋەتى ءۇشىن وراسان زور ەكەندىگىن جەتكىزدى.
الماتى وبلىسىندا بۇگىنگى كۇنى ەلەكتر ەنەرگياسىنا دەگەن سۇرانىس ەسەلەپ ارتۋدا. وعان قوناەۆ قالاسىنىڭ ءوسۋى مەن «Gate City» قالاشىعىنىڭ بوي كوتەرۋى, سونداي-اق «شەلەك», «جەتىگەن», «قازبەك بەك», «قايرات» سىندى 4 ءىرى يندۋستريالدىق ايماقتاردىڭ قۇرىلۋى سەبەپ.
«مىسالعا ايتساق, بىلتىرعى جىلى 200 گەكتار جەرگە ورنالاسقان «قايرات» يندۋستريالدىق ايماعىن اشتىق. ونىڭ ىشىندە بۇگىنگى كۇنگە بىردە-ءبىر ورىن قالمادى. كوزدەلگەن 11 زاۋىت سالىنىپ, العاشقىلارى از كۇندە جۇمىسىن باستايدى. وسى ماڭايدا مىڭ گەكتاردى الىپ جاتقان «قازبەك بەك» يندۋستريالدىق ايماعىنا بۇگىنگى كۇنگە ەلەكتر قۋاتتىلىعى جەتىسپەيدى. ونى قامتاماسىز ەتۋ ءۇشىن ينۆەستورلار تارتۋ كوزدەلدى», دەگەن مارات ەلەۋسىز ۇلى ينفراقۇرىلىم جاقسارار بولسا, وڭىردە ءوندىرىس سالاسى قارقىندى داميتىندىعىن العا تارتتى.
«سامۇرىق-ەنەرگو» اق باسقارما توراعاسى قايرات ماقسۇتوۆتىڭ ايتۋىنشا, جاڭا قوسالقى ستانسانىڭ قۇرىلىسى 2021 جىلى باستالىپ, جۇمىس جۇرگىزۋ كەستەسىنە سايكەس جۇزەگە اسىرىلعان. ەندى ءوڭىر ءۇشىن وتە ماڭىزدى ەنەرگەتيكالىق نىسان 346 شاعىن جانە ورتا بيزنەس سۋبەكتىلەرىن, سونداي-اق اۋدانداعى تۇرعىن ءۇي سەكتورىنىڭ 1 362 تۇتىنۋشىلارىن سەنىمدى ءارى تۇراقتى تۇردە ەلەكترمەن جابدىقتاۋدى قامتاماسىز ەتەدى.
«قوسالقى ستانسا قوسىمشا تۇتىنۋشىلاردى قوسۋ ىقتيمالدىعىن قامتاماسىز ەتۋگە مۇمكىندىك بەرەدى, وسىلايشا, ءوندىرىس پەن بيزنەستى دامىتۋ ءۇشىن عانا ەمەس, تۇرعىندار ءۇشىن قاجەتتى الەۋمەتتىك نىسانداردى سالۋ ءۇشىن دە قولايلى جاعداي جاسايدى. مىسالى, بۇگىندە كوكوزەك جانە ەلتاي اۋىلدارىندا 1 500 بالادان تۇراتىن ەكى جايلى مەكتەپتى قوسۋعا تەحنيكالىق جاعداي جاسالدى», دەپ اتاپ ءوتتى «سامۇرىق-ەنەرگو» اق باسشىسى.
كومپانيا ساراپشىلارىنىڭ سوزىنشە, الماتى ەنەرگوجۇيەسىن دامىتۋ بەلگىلەنگەن قارقىنمەن ءجۇرىپ جاتىر. ينۆەستيتسيالىق باعدارلاماعا سايكەس قولدانىستاعى ەلەكتر جەلىلەرىن جاعىرتۋ جانە جاڭا ەلەكتر جەلىلەرىن سالۋ, سونداي-اق ەسكىرگەن جابدىقتاردى اۋىستىرا وتىرىپ, قولدا بار ترانسفورماتورلىق قوسالقى ستانسالاردى رەكونسترۋكتسيالاۋ جونىندەگى جۇمىستار جۇزەگە اسىرىلادى. وسى جوبالاردى ىسكە اسىرۋ جەلىلەردىڭ وتكىزۋ قابىلەتىن ارتتىرۋعا, ەلەكتر ەنەرگياسىن بەرۋ كەزىندەگى تەحنيكالىق شىعىنداردى ازايتۋعا, جاڭا تۇتىنۋشىلاردىڭ قوسىلۋىن قامتاماسى ەتۋگە جانە جەلىدەگى كەرنەۋ ساپاسىن ارتتىرۋعا مۇمكىندىك بەرەدى.
الماتى وبلىسى