ۇلتتىق مۋزەيدە «اماندوس اقاناەۆتىڭ الەمى» اتتى كورمەنىڭ سالتاناتتى اشىلۋى ءوتتى. اتالعان ءىس-شارا كوركەم اكادەميانىڭ پرەزيدەنتى اماندوس اقاناەۆتىڭ 75 جىلدىق مەرەيتويىنا وراي ۇيىمداستىرىلعان. ەكسپوزيتسياعا سۋرەتشىنىڭ كەيىنگى جىلدارى سالعان جانە قالىڭ كوپشىلىكتىڭ نازارىنا ۇسىنىلىپ ۇلگەرمەگەن 60-تان استام تۋىندىسى قويىلدى.
كورمە اياسىندا شىعارماشىلىق جوبالاردى تالقىلاۋ ماقساتىندا كوركەم اكادەميانىڭ قۇرامىنداعى تانىمال سۋرەتشىلەر جانە شەتەلدىك ونەر مايتالماندارىمەن دوڭگەلەك ۇستەل ءوتتى.
مادەني جيىنعا كەلگەن سەناتور رۋسلان رۇستەموۆ پارلامەنت سەناتىنىڭ توراعاسى ماۋلەن اشىمباەۆتىڭ قۇتتىقتاۋ حاتىن وقىدى.
«ونەر ماڭگىلىك, ەكى ەل ءبىر-بىرىمەن ماقتانسا, تەك ءتول مادەنيەتى مەن ونەرى, تاريحى مەن عىلىمىن ايتادى. الەمدە مادەنيەت پەن ونەردى الىپ كۇش دەپ ەلەستەتەتىن بولساق, ءوزىنىڭ ءسان-سالتاناتىمەن كەلىپ قوسىلعان بۇكىل قازاق مادەنيەتىن, جالپى تۇركى مادەنيەتىن كورگەندەي بولامىز. وسى ۋاقىتتى قاز قالپىندا كورسەتەتىن – سۋرەتشى عانا», دەلىنگەن وندا.
ال تۇركسوي ۇيىمىنىڭ باس حاتشىسى سۇلتان راەۆ سۋرەتشىنىڭ ەلىمىزدىڭ بەينەلەۋ ونەرىنىڭ دامۋىنا قوسقان زور ۇلەسىن ايتىپ, اماندوس اقاناەۆتىڭ كوشپەندىلەردىڭ كوركەم شەجىرەشىسى ەكەندىگىن اتاپ ءوتتى.
اماندوس اقاناەۆ تۋىندىلارىن ۇلتتىق مۋزەيدىڭ 4-قاباتىندا ورنالاسقان №2 بەينەلەۋ ونەرى زالىندا تاماشالاۋعا بولادى. كورمە قازان ايىنىڭ 19-نا دەيىن جالعاسادى.