اتىراۋدا سۇلتان بەيبارىستىڭ 800 جىلدىعىنا ارنالعان ءىس-شارالار لەگى حالىقارالىق ايتىسپەن جالعاسىن تاپتى. «ەرلىگى ەرەن ەر بابام!» اتتى حالىقارالىق ايتىستا 14 اقىن باق سىنادى.
ماحامبەت اتىنداعى اكادەميالىق قازاق دراما تەاترىنداعى جىر بايگەسىن حالىقارالىق قازىلار القاسى سارالادى. قازاقستان جازۋشىلار وداعىنىڭ باسقارما توراعاسى مەرەكە قۇلكەنوۆ توراعالىق ەتكەن قازىلار القاسىنىڭ قۇرامىنا قىرعىز ۇلتتىق «ماناس» تەاترىنىڭ ديرەكتورى, ش.ايتماتوۆ اتىنداعى مەملەكەتتىك جاستار سىيلىعىنىڭ لاۋرەاتى ازيز بيمىرزا ۋلۋ ەندى.
ايتىس ەكى كۇنگە سوزىلدى. العاشقى كۇنى ەلىمىزدىڭ اقىندارىمەن بىرگە جىر كورىگىن موڭعوليالىق قانداس ايدوس راشات ۇلى, قىرعىزستاندىق ەسەنبەك كييزباەۆ پەن امانتاي كۋماناليەۆ قىزدىردى. ەكىنشى كەزەڭدە ۇشقىر ويىمەن ەرەكشەلەنگەن سەگىز ايتىسكەر ساحناعا شىقتى.
اقىندار سۇلتان بەيبارىستىڭ تۇلعالىق بولمىسىن, مەملەكەت باسقارۋداعى قايراتكەرلىگىن ارقاۋ ەتتى. دەگەنمەن, مۇنايلى ءوڭىردىڭ جەتىستىكتەرى مەن ءتۇيىندى ماسەلەلەرىن دە قالىس قالدىرمادى. جىر دوداسىندا قاراعاندىلىق ايتىسكەر ديدار قامي دارا شاپتى. قازىلار القاسى العىر اقىننىڭ ارىنىن ورىندى باعالاپ, ايتىستىڭ باس جۇلدەسى – 1 ملن تەڭگەنى يەلەنۋگە لايىق دەپ تاپتى.
ال ءبىرىنشى جۇلدە – 750 مىڭ تەڭگەنى استانالىق اقىن ەركەبۇلان قاينازار يەلەندى. وزىندىك ءسوز ساپتاۋىمەن, مانەرىمەن كورىنىپ جۇرگەن اتىراۋلىق ورەن ونەربەك داۋلەكەنوۆ ەكىنشى جۇلدەنىڭ سىياقىسى – 600 مىڭ تەڭگەگە يە بولدى. ءۇشىنشى جۇلدەنىڭ 500 مىڭ تەڭگەسى ەكى ايتىسكەرگە بەرىلدى. ونىڭ ءبىرى – باتىس قازاقستان وبلىسىنىڭ اقىنى تالعات مىقي, ال ەكىنشىسى – قىرعىزستاندىق ەسەنبەك كييزباەۆ.
سونداي-اق ءۇش اقىن باتىرجان كادىرباي (اتىراۋ وبلىسى), راۋان قايدار (پاۆلودار وبلىسى), باۋىرجان شيرمەدين ۇلى (باتىس قازاقستان وبلىسى) ارنايى جۇلدەنى يەلەندى. ولاردىڭ ارقايسىسىنا ارنايى جۇلدە ءۇشىن 350 مىڭ تەڭگە بەرىلسە, التى اقىن 300 مىڭ تەڭگەدەن ىنتالاندىرۋ سىياقىسىن الدى. «حالقىمىزدىڭ ەجەلدەن كەلە جاتقان ۇلتتىق ونەرىنىڭ قاتارىندا ايتىس تا بار. كورەرمەن ايتىستىڭ قىزىقتى وتكەنىن قالايدى. قارسىلاسى مىقتى, كورەرمەنى كوپ بولسا, ايتىسكەرلەر اشىلا تۇسەدى. شابىتى ويانادى. مەملەكەت باسقارعان تاريحي تۇلعا سۇلتان بەيبارىس بابامىزعا ارنالعان حالىقارالىق ايتىس جوعارى دەڭگەيدە ءارى ءادىل ءوتتى. اتىراۋدا وتكەن ايتىستان ەكىنشى رەت باس جۇلدە الىپ تۇرمىن», دەدى د.قامي.
قىرعىزستاننان كەلگەن ەسەنبەك كييزباەۆتىڭ ايتۋىنشا, مۇنداي حالىقارالىق ايتىس كوبىرەك وتكەنى ءجون. ويتكەنى ايتىس – قازاق پەن قىرعىزعا ورتاق ونەر. «مۇنداي حالىقارالىق ايتىس ءجيى وتپەيدى عوي. سول سەبەپتەن, باۋىرلاس ەكى حالىقتىڭ دوستىعىن جىرعا قوستىم. بۇرىننان ەكى ەلدىڭ اقىن-جازۋشىلارى ءبىر-ءبىرىنىڭ شىعارماشىلىعىنا قولداۋ ءبىلدىرىپ, دوستىق قارىم-قاتىناس ورناتقانىن بىلەمىز. ءبىز دە سول جولدى جالعاعىمىز كەلەدى», دەدى ەسەنبەك كييزباەۆ.
اتىراۋ وبلىسى