قۇرلىقتىق حوككەي ليگاسىندا (قحل) ونەر كورسەتەتىن ەلوردانىڭ «بارىسىن» جاتتىقتىرىپ جۇرگەن اندرەي سكابەلكا قىزمەتىنەن كەتتى. بۇل تۋرالى كوماندانىڭ ءباسپاسوز قىزمەتى مالىمدەدى.
52 جاستاعى بەلارۋس مامانى وسىمەن «بارىسقا» ەكى رەت كەلىپ, ەكىنشى مارتە جۇمىسىنان كەتىپ وتىر. مۇنداي جاعداي شايبالى حوككەي سپورت تۇرىندە قالىپتى جاعداي سانالادى. اندرەي سكابەلكا ەڭ العاش «بارىس» تىزگىنىن 2018-2020 جىلدار ارالىعىندا ۇستاپ, تابىستى ناتيجەلەرگە قول جەتكىزگەن بولاتىن. اتاپ ايتقاندا, ەلوردالىق كوماندا گاگارين كۋبوگى جولىندا جارىستىڭ پلەي-وفف كەزەڭىنە ەكى رەت شىققان ەدى. بىراق سكابەلكانىڭ «بارىسقا» ەكىنشى رەت كەلۋى ءساتسىز بولدى.
تۇراقتى بىرىنشىلىكتىڭ بيىلعى ماۋسىمىندا «بارىس» اندرەي سكابەلكانىڭ جەتەكشىلىگىمەن 15 ويىن وتكىزىپ, سونىڭ تەك ۇشەۋىندە عانا جەڭىسكە جەتتى. 12 مارتە جەڭىلىستىڭ كەرمەك ءدامىن تاتۋعا ءماجبۇر بولدى. قورجىنىندا نەبارى 11 ۇپاي بار. وسى ناتيجەلەردى ەسكەرگەن كلۋب باسشىلىعى بەلارۋس مامانىمەن كەلىسىمشارتتى ۇزۋگە ءماجبۇر بولدى. قازىرگى تاڭدا «بارىس» قحل-ءدىڭ شىعىس كونفەرەنتسياسىنداعى تۋرنير كەستەسىندە 11-ورىندا تۇر. ەندى باس باپكەر مىندەتىن عالىم مامبەتاليەۆ اتقارادى. «بارىس» كەلەسى ويىنىن بۇگىن ەلوردادا چەليابىنىڭ «تراكتور» كومانداسىمەن وتكىزەدى.