ەلىمىزدەگى ەڭ ۇزدىك جەدەل ۋاكىل انىقتالدى

جارىستىڭ اقتىق كەزەڭى ماقان ەسبولاتوۆ اتىنداعى الماتى اكادەمياسىنىڭ بازاسىندا ءوتتى. ايتا كەتۋ كەرەك, ەڭ اۋىر قىلمىستار جەدەل قىزمەتكەرلەردىڭ ءبىلىمى مەن داعدىلارىنىڭ, ولاردىڭ تاباندىلىعىنىڭ, ادالدىعىنىڭ, باتىلدىعى مەن تاپقىرلىعىنىڭ ارقاسىندا اشىلادى.

داستۇرگە اينالعان كونكۋرستا اۋماقتىق بولىنىستەردىڭ قىزمەتكەرلەرى جەدەل قىزمەتتە, زاڭداردى مەڭگەرۋدە, اتىس جانە فيزيكالىق دايىندىقتا جوعارى ناتيجە كورسەتتى. سونىمەن قاتار ءىس-شارا بارىسىندا جەدەل ۋاكىلدەرمەن وتستاۆكاداعى ميليتسيا پولكوۆنيگى عابدراحيم مەڭدەشەۆ كەزدەستى.

وفيتسەردىڭ ەسەبىندە كوپتەگەن اشىلعان اۋىر جانە اسا اۋىر قىلمىستار بار. جەڭىمپازداردى ءىىم كريمينالدىق پوليتسيا دەپارتامەنتىنىڭ باستىعى ايدوس رىسباەۆ ماراپاتتادى.

– قيىن قىزمەتتەرىڭىزدەن ۇيلەرىڭىزگە امان-ساۋ ورالۋلارىڭىزدى تىلەيمىن. ساتتىلىك سەرىك بولسىن ءاردايىم! – دەدى رىسباەۆ.

ەڭ ۇزدىك جەدەل ۋاكىل بولىپ اقمولا وبلىسىنىڭ قىزمەتكەرى ەلجاس نوعاەۆ تانىلدى. ەكىنشى ورىندى اباي وبلىسىنىڭ نامىسىن قورعاعان قۋانىش زاريپوۆ يەلەندى. ال ۇزدىك ۇشتىكتى الماتىلىق جەدەل ۋاكىل بەرىك بيبەكوۆ تۇيىندەدى. جالپى بۇل بايقاۋ جەدەل ىزدەستىرۋ قىزمەتىن ودان ءارى دامىتۋعا جانە جەدەل ۋاكىلدەردىڭ كاسىبي شەبەرلىگىن ارتتىرۋعا ىقپال ەتەدى.