مەملەكەتتىڭ تىرەگى – ادال ازاماتتار. ەلىمىزدە وسى قاعيداعا نەگىزدەلگەن جاڭا قوعامدىق ەتيكا ورنىعۋعا ءتيىس. قازاقتا «ۇستازى جاقسىنىڭ ۇستانىمى جاقسى» دەگەن ءسوز بار. مەكتەپ ىزگىلىك قاعيدالارىن, ادامزاتقا ورتاق قۇندىلىقتاردى بالالاردىڭ بويىنا سىڭىرەتىن ورتالىققا اينالۋى كەرەك. بۇل تۋرالى پرەزيدەنت پەداگوگتەر سەزىندەگى بايانداماسىندا ايتتى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
مەملەكەت باسشىسى جاس ۇرپاق ءادىل, ادال, ۇنەمشىل, ەڭبەكقور, ءبىلىمپاز, وتانشىل ءارى جاناشىر بولۋعا ۇمتىلۋى كەرەكتىگىن, ۇلتتىڭ جاڭا ساپاسى دەگەن – وسى ەكەنىنە توقتالىپ, تاربيە ىسىندە ۇلتتىق پەداگوگيكا باستاۋلارىن دا نازاردان شىعارماعان ءجون ەكەنىن, بالالارىمىزدىڭ بويىنا قازاقتىڭ سالت-ءداستۇرى مەن قۇندىلىقتارىن ءسىڭىرۋ اسا ماڭىزدى ەكەنىن اتاپ ءوتتى.
«حالقىمىز قاشاندا ۇلكەنگە قۇرمەت, كىشىگە ىزەت كورسەتە بىلگەن. قادىر-قاسيەت, ابىروي, پارىز سەكىلدى ۇعىمدارعا ءاتۇستى قاراماعان. ياعني, ءتول مادەنيەتىمىز دە جاستار تاربيەسىندە ماڭىزدى ءرول اتقارادى. ەڭبەكقورلىقتى دارىپتەۋ ءۇشىن بالالاردى جاستايىنان ەڭبەككە باۋلۋ قاجەت», دەدى پرەزيدەنت.
قاسىم-جومارت توقاەۆ: «مەن قوعامدا ءجيى تالقىلاناتىن تاعى ءبىر ماسەلەگە توقتالعىم كەلەدى. قازاقستان – كونستيتۋتسيا بويىنشا زايىرلى مەملەكەت. بۇل قاعيدا بارلىق جەردە, سونىڭ ىشىندە ءبىلىم بەرۋ مەكەمەلەرىندە قاتاڭ ساقتالۋعا ءتيىس. مەكتەپ – ەڭ الدىمەن, ءبىلىم ورداسى. بالالار مەكتەپكە ءبىلىم الۋ ءۇشىن بارادى. ال ءدىني ۇستانىم – ءار ازاماتتىڭ جەكە ماسەلەسى, ءوز تاڭداۋى. ەلىمىزدە ءدىن بوستاندىعىنا زاڭمەن كەپىلدىك بەرىلگەن. بالالارىمىز ەسەيىپ, دۇنيەتانىمى تولىق قالىپتاسقان سوڭ ءوز تاڭداۋىن جاساعانى دۇرىس دەپ سانايمىن. ەڭ باستىسى, كوزقاراسى ايقىن, ساناسى سەرگەك ءارى داستۇرگە بەرىك ۇرپاق تاربيەلەۋ كەرەك. جالپى, زايىرلى دەگەن ءسوزدىڭ مازمۇنى تەرەڭ, وتە اۋقىمدى. حالقىمىزعا قاتىستى ايتاتىن بولساق, بۇل – سالاۋاتتى ءومىر سالتىن ۇستانۋ, پراگماتيكالىق كوزقاراستا بولۋ جانە ءداستۇرلى دىنىمىزگە, ۇلتتىق سانانى ارقاۋ ەتكەن سالتىمىزعا شىنايى قۇرمەت دەگەن ءسوز», دەدى.
پرەزيدەنت ءبىلىم بەرۋ سالاسىنىڭ الدىندا اۋقىمدى مىندەت تۇرعانىن, بۇل – ۇلتتىڭ جاڭا ساپاسىن قالىپتاستىرۋ ەكەنىن, ءاربىر بالا مەكتەپتەن ساپالى ءبىلىم الىپ, جاقسى ادام, ادال ازامات بولىپ شىعۋى كەرەكتىگىن, وسى ماڭىزدى ماقسات جولىندا تاباندى ەڭبەك ەتۋ قاجەت ەكەنىن دە ايتتى.
« ۇلى اباي «ۇستازدىق ەتكەن جالىقپاس, ۇيرەتۋدەن بالاعا» دەگەن. سىزدەر وسى قاستەرلى ميسسيانى ءاردايىم ابىرويمەن اتقاراسىزدار دەپ سەنەمىن. مەملەكەت ۇستازداردىڭ مارتەبەسى, بەدەلى جوعارى بولۋىنا ءاردايىم باسا ءمان بەرەدى», دەدى مەملەكەت باسشىسى.