ايەلدەر اراسىنداعى ەلىمىزدىڭ ءبىرىنشى, الەمنىڭ 5-راكەتكاسى ەلەنا رىباكينا قىتايدا ءوتىپ جاتقان WTA 1000 ءتۋرنيرىنىڭ ءۇشىنشى اينالىمىنا جولداما الدى.
2021 جىلعى ۋيمبلدون دوداسىنىڭ جەڭىمپازى رىباكينا بەيجىڭدەگى ءتۋرنيردىڭ العاشقى اينالىمىندا جارىس قوجايىنى, الەمدىك رەيتينگتە 23-ورىندا تۇرعان قىتايلىق سينۆەن جەندى ەكى سەتتە 6:1, 6:2 ەسەبىمەن تىزە بۇكتىرسە, ەكىنشى كەزەڭدە 36 جاستاعى گەرمانيالىق تاتيانا ماريامەن شەبەرلىك بايقاستى. دۇنيەجۇزىلىك رەيتينگتە 53-ورىندا تۇرعان تاتيانا دا وتانداسىمىزدىڭ قارقىنىنا توتەپ بەرە المادى. ءبىر ساعات 11 مينۋتقا سوزىلعان ماتچتىڭ ءبىرىنشى پارتياسىندا رىباكينا 7:5 ەسەبىمەن باسىم تۇسسە, ەكىنشى سەتتە قارسىلاسىنا بىردە-ءبىر گەيم بەرمەي, 6:0 ناتيجەسىمەن بەت قاراتپاي جەڭدى. ويىن بارىسىندا ە.رىباكينا 9 ەيس جاساپ, 7 برەيك-پوينتتىڭ بەسەۋىن پايدالاندى. ت.ماريا 1 ەيس, 1 برەيكپەن شەكتەلدى.
سونداي-اق شانحايداعى «ماستەرس» ساناتىنداعى «مىڭدىق» ءتۋرنيرىنىڭ ىرىكتەۋ كەزەڭىندە ونەر كورسەتكەن ءۇش جەرلەسىمىز – بەيبىت جۇقاەۆ, دەنيس ەۆسەەۆ جانە ميحايل كۋكۋشكين جارىستىڭ نەگىزگى باسەكەسىنە قوسىلدى. ىرىكتەۋ باسەكەسىنىڭ فينالىندا د.ەۆسەەۆ تايپەيلىك تۋن-لين ۆۋدەن, ميحايل كۋكۋشكين اۋستراليالىق ليۋك سەۆيلدەن, بەيبىت جۇقاەۆ چەحيالىق دومينيك پالاننان باسىم ءتۇستى.