وزىنە عانا ايان قاراڭعى تۇنەك ىشىندە تىرشىلىك كەشىپ جۇرگەن ادامنىڭ ىشكى دۇنيەسى سىرتقى دۇنيەنى قالاي قابىلدايتىنىن, جارىق ساۋلەنى جۇرەكپەن تانۋدىڭ ەرەكشە جۇمباعىن «مەن جۇرەگىممەن كورەمىن» اتتى بىرەگەي كورمەنى تاماشالاعاندار شىن ءتۇسىندى. قاراپايىم ادام اقپاراتتىڭ 80 پايىزىن كورۋ ارقىلى قابىلدايدى. ال ەرەكشە دامىعان سەزىمى مەن تۇيسىگىنە عانا ارقا سۇيەگەن زاعيپ جانداردىڭ دا ءوز شۋاقتى كۇندەرى, شۇعىلالى الەمى بار ەكەنىنە وسى كورمە كۋا. قاراڭعىلىق ولاردى سىرتقى الەمنەن ايىرىپ, وزدەرىنىڭ ىشكى الەمىن تۇيسىنۋگە مۇمكىندىك بەرەدى. ولاردى الاڭداتاتىن ارتىق ەش نارسە جوق. مۇنى ءوزىڭنىڭ جان دۇنيەڭە ساياحاتتاۋ دەپ اتاۋعا دا بولادى.
جوبا الەمنىڭ سۇلۋلىعىنا ەرەكشە ءتانتى جانداردىڭ ماڭگىلىك ونەرگە دەگەن ماحابباتىنا ارنالعان. ونەر – ءتۇيسىنۋ مەن قابىلداۋعا تىكەلەي بايلانىستى تىلسىمعا تولى قۇپيا الەم, سوندىقتان بولار ونىڭ جەمىسىن قوعامنىڭ از عانا بولىگى قابىلدايتىنى قالىپتى جايت. ماڭدايىندا قوس شىراعى جانىپ تۇرعان جانداردىڭ ءوزى تۇسىنە بەرمەيتىن ونەردىڭ ومىرگە قۇشتار جانداردىڭ تارس جۇمۋلى جانارىنان تۋدى دەگەنگە سەنگىڭ كەلمەيدى. الايدا ادامنىڭ الەمدى كوزبەن ەمەس, جۇرەكپەن كورەتىنىنە ولار وسىلاي يلاندىرىپ وتىر. بۇل الەۋمەتتىك جوبا – ەكى اراداعى پاراللەل تۇيسىكتەرگە اۋىسا وتىرىپ, قورشاعان الەمدى تەرەڭىرەك تۇسىنۋگە جەتەلەيدى.
جۇرەك باردا, دۇنيەنى سەزىنۋ بار. كەنەپكە مايلى بوياۋمەن سالىنعان اردان عالىم ۇلىنىڭ «ەركىندىك», يليا سمەرتيننىڭ «تابيعات», ۆالەري كورنيلوۆتىڭ «اۆتوپورترەت», يننوكەنتي كونونوۆتىڭ «شابىندىق», ميچيل مويسەەۆتىڭ «ارمان» اتتى كارتينالارىندا الەمگە دەگەن ءوز كوزقاراسىن, ونى ىشتەي قالاي كورەتىنىن جانە سەزىنەتىنىن ەشكىمگە ەلىكتەمەگەن دەربەس قيالمەن جەتكىزە العان.
كورمەنى ۇيىمداستىرۋ يدەياسىنىڭ اۆتورى ماريكا اندرەەۆانىڭ جەتەكشىلىگىمەن سەزىمىن, ارمانىن بەينەلەي وتىرىپ سالعان كارتينالاردا ءار سۋرەتشىنىڭ جۇرەك تەربەيتىن تاعدىرى مەن تاريحى قوسا بەينەلەنگەن. ءوزىنىڭ باعىن بەينەلەۋ ونەرىنەن ىزدەپ جۇرگەن اردان عالىم ۇلىن قولداپ, ءاردايىم جانىنان تابىلاتىن زايىبى توميريس: «مەن الەمدەگى ەڭ كەرەمەت جىگىتكە كۇيەۋگە شىقتىم. ۇيلەنگەنىمىزگە ءۇش جىل بولدى, ءبىز باقىتتىمىز. مەن ودان مەيىرىمدى, كىشىپەيىلدىكتى, ادامنىڭ ءبارىن سۇيەتىن ىزگىلىكتى ۇيرەندىم. مەن – ارداننىڭ كوزىمىن, ول – مەنىڭ جۇرەگىم!», دەيدى. اردان زاعيپ جانداردىڭ الەۋمەتتەنۋ تاقىرىبىمەن اينالىساتىن بەلسەندى بلوگەر دە. يننوكەنتي كونونوۆ بولسا, ءوز قولىمەن ءۇي سالىپتى. ال كوز اقاۋىمەن دۇنيەگە كەلىپ, مەديتسينانىڭ دارمەنسىزدىگىنەن كورۋ قابىلەتى بىرتە-بىرتە ناشارلاپ, ءبىرجولا قاراڭعى تۇنەك ىشىندە قالعان ساحايا دانيلوۆا «كۇن ۇياسىنا قونعاندا» دەگەن شىعارماسىندا قوشقىل تۇسكە بويالىپ, باتىپ بارا جاتقان كۇنگە قىزىقتاپ قاراپ تۇرعان وتباسىنى بەينەلەيدى. ساحايا تاريح فاكۋلتەتىن تامامداعان, كىتاپ وقيدى, جۇگىرۋمەن, ۇستەل تەننيسىمەن, ءوزىن-ءوزى ۇزدىكسىز جەتىلدىرۋمەن اينالىسادى. تۇرمىس قۇرىپ, وتباسىلى بولۋدى ارماندايدى. بۇل – تالانتتى قىز-جىگىتتەر كورمەگەن نارسەنى كورۋ, سەزىنبەگەن نارسەگە عاشىق بولۋ, تۇسىنبەگەن نارسەنى قابىلداۋ سياقتى ادامنىڭ جان دۇنيەسىندەگى وزگە شىندىقتى جانارى جايناعانداردىڭ الدىنا جايىپ سالادى جانە سىرتتاعى قاۋىمداستىقتىڭ قالىپقا سالىنعان شەكتەۋلى, ۇيرەنشىكتى تۇسىنىگىنە سوققى بەرەدى.
بۇل سۋرەتشى رولىندەگى تاجىريبە وسى جوبانىڭ ءاربىر قاتىسۋشىسىنىڭ ەكسپەريمەنتتەرگە دايىن باتىل تۇلعا ەكەنىن سيپاتتايدى, ويتكەنى ولاردىڭ ەشقايسىسى سۋرەتشى ماماندىعى بويىنشا ارنايى ءبىلىم الماعان. مەملەكەتتىك ونەر مۋزەيىنىڭ ماماندارى ولاردىڭ الەمىنە ۇڭىلۋگە مۇمكىندىك بەرگەن بىرەگەي سيپاتتى كورمە ءۇشىن, ءومىردى شەكسىز سۇيەتىن جۇرەگىنىڭ اشىقتىعى مەن تازالىعى ءۇشىن العىس ايتتى. مۇنداي كورمەلەر ون ەكى مۇشەسى ساۋ, اعزاسى امان ءاربىر ادامنىڭ جان دۇنيەسىنىڭ تۇڭعيىعىنان جاڭا باعىتتاردى ىزدەۋگە ءسوزسىز كومەكتەسەتىن كەرەكتى جوبا ەكەنىنە كوز جەتكىزە تۇسەدى.