قۇرلىقتىق حوككەي ليگاسىندا (قحل) باق سىناپ جاتقان ەلوردانىڭ «بارىسى» ءۇشىن سىرت ايدىنداعى كەزەكتى ويىندار سەرياسى تاعى دا ءساتسىز باستالدى.
مينسكىگە ساپار شەككەن اندرەي سكابەلكا شاكىرتتەرى جەرگىلىكتى «دينامو مينسك» كومانداسىمەن شەبەرلىك بايقاسىپ, تارتىستى كەزدەسۋدە 3:0 ەسەبىمەن جەڭىلىپ قالدى. 7 مىڭعا جۋىق جانكۇيەر تاماشالاعان «مينسك-ارەنا» سپورت كەشەنىندەگى باسەكەنىڭ ەسەبىن ۆيتالي پينچۋك سان باسىمدىعىنان كەيىن اشتى. ءبىرىنشى كەزەڭنىڭ سوڭىنا قاراي «بارىس» ويىنشىلارى دا ەكى مارتە ءبىر حوككەيشىگە ارتىق ويناعانىمەن, «دينامو» قاقپاسىنان ساڭىلاۋ تابا المادى.
ۇزىلىستەن كەيىن دە ايدىن يەلەرى شابۋىلىن ءبىر ساتكە دە توقتاتقان جوق. ويىننىڭ 25-مينۋتىندا رومان گوربۋنوۆ اندرەي شۋتوۆتى قاپى قالدىرسا, ءۇشىنشى كەزەڭ باستالعان ساتتە اندرەي ستاس «دينامونىڭ» ءۇشىنشى شايباسىن سوعىپ, ويىننىڭ نۇكتەسىن قويدى. بۇل باسەكەدە جەرلەستەرىمىز تارازى باسىن تەڭەستىرۋ بىلاي تۇرسىن, جانكۇيەرلەر ءۇشىن جالعىز جۇبانىش شايباسىن دا سوعا المادى. ەندى «بارىس» تۇراقتى بىرىنشىلىكتەگى كەلەسى كەزدەسۋىن بۇگىن ماسكەۋدە جەرگىلىكتى تسسكا كلۋبىمەن وتكىزەدى.