قىتايدىڭ باس شاھارى – بەيجىڭدە تەننيستەن اتر جانە WTA 1000 ساناتىنداعى وسى جىلعا جوسپارلانعان توعىز ءتۋرنيردىڭ سەگىزىنشى جارىسى باستالدى.
اتالعان باسەكەدە ەلىمىزدىڭ بەس سپورتشىسى باق سىناپ جاتىر. جارىستىڭ ىرىكتەۋ كەزەڭىنەن باستاعان ايەلدەر اراسىنداعى قازاقستاننىڭ ەكىنشى, الەمنىڭ 73-راكەتكاسى يۋليا پۋتينتسەۆا نەگىزگى باسەكەنىڭ ءبىرىنشى اينالىمىندا الەمنىڭ 30-راكەتكاسىن تىزە بۇكتىردى. چەحيالىق ماريا بوۋزكوۆامەن شەبەرلىك بايقاسقان وتانداسىمىز قارسىلاسىنان ەكى ساعات 7 مينۋتقا سوزىلعان تارتىستى باسەكەدە 6:2, 7:6 (7:5) ەسەبىمەن باسىم ءتۇستى. يۋليا ماتچ بارىسىندا 13 برەيك-پوينتتىڭ بەسەۋىن پايدالانسا, قارسىلاسى 2 ەيس پەن 3 برەيك (9 برەيك-پوينت) جاسادى. ەندى يۋ.پۋتينتسەۆا 1/8 فينالعا شىعۋ ءۇشىن الەمنىڭ 10-راكەتكاسى فرانتسيالىق كارولين گارسيامەن كەزدەسەدى.
ال كەشە كەشكىسىن ەلىمىزدىڭ ءبىرىنشى راكەتكاسى ەلەنا رىباكينا العاشقى اينالىمدا قىتايدا ءوتىپ جاتقان ازيا ويىندارىنىڭ جەكەلەي باسەكەسىندە توپ جارعان قىتايلىق سينۆەن جەنمەن ويناپ, جەڭىسكە جەتتى. سونداي-اق ەرلەر اراسىندا باق سىناپ جاتقان جەرلەستەرىمىز – دەنيس ەۆسەەۆ, ميحايل كۋكۋشكين جانە بەيبىت جۇقاەۆ ىرىكتەۋ سايىستارىنىڭ جارتىلاي فينالدىق كەزدەسۋلەرىن وتكىزدى.