استانادا 12-13 قازاندا ورتالىق ازياداعى ەڭ ءىرى IT-فورۋم – «Digital Bridge 2023» وتەدى. حالىقارالىق فورۋمعا مەملەكەت باسشىسى قاسىم-جومارت توقاەۆ, الەمدىك كومپانيالاردىڭ جەتەكشىلەرى, IT-يننوۆاتسيا سالاسىنداعى ۇزدىك حالىقارالىق جانە وتاندىق ساراپشىلار, وڭىرلەردىڭ تۇكپىر-تۇكپىرىنەن ۆەنچۋرلىق ينۆەستورلار قاتىسادى دەپ كۇتىلىپ وتىر.
فورۋمدا 20 مىڭ قاتىسۋشى, 300 كومپانيا, 100 ينۆەستور, 250 سپيكەر جانە الەمنىڭ 15 ەلىنەن 100 ستارتاپ وكىلى باس قوسادى. تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى اقپاراتتىق تەحنولوگيالار سالاسىن دامىتۋ دەپارتامەنتىنىڭ ديرەكتورى ەرسۇلتان ەرمانوۆ فورۋم يننوۆاتسيالىق يدەيالار مەن ستارتاپ-جوبالاردى جاڭا نارىققا شىعاراتىن ماڭىزدى ءىس-شارا ەكەنىن اتاپ ءوتتى. الەمدىك باستامالارعا قاتىسۋ تەحنولوگيالىق يندۋستريانىڭ دامۋىنا ەلەۋلى اسەر ەتىپ, كاسىپكەرلەر ءۇشىن جاڭا مۇمكىندىك تۋدىراتىنى انىق. «Digital Bridge» – يننوۆاتسيا مەن تەحنولوگياداعى ىنتىماقتاستىقتى نىعايتاتىن بىرەگەي الاڭ.
– بۇل ءىس-شاراعا قاتىسۋشىلار حالىقارالىق سەرىكتەستىكتەردى قۇرۋعا, تاجىريبە مەن ءبىلىم الماسۋعا, سونداي-اق الەۋەتتى ينۆەستورلار مەن قارجى ينستيتۋتتارىنىڭ الدىندا وزدەرىنىڭ يننوۆاتسيالىق جوبالارىن ۇسىنۋعا مۇمكىندىك الادى. بۇل اۋقىمدى جيىن سوڭعى تەحنولوگيالىق ترەندتەر مەن سالانىڭ دامۋى تۋرالى حاباردار بولۋعا مۇمكىندىك بەرەدى. فورۋمنىڭ ءبىر ماقساتى – ىسكەرلىك ىنتىماقتاستىق اياسىن كەڭەيتۋ جانە قۇندى بيزنەس-ارىپتەستىك ورناتۋ, – دەدى ەرسۇلتان ەرمانوۆ.
تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات ءمۋسيننىڭ پىكىرىنشە, «Digital Bridge 2023» تەحنولوگيا مەن ادام الەۋەتى اراسىنداعى تەپە-تەڭدىكتى قالاي تابۋعا بولاتىنىن تالقىلايتىن تاماشا الاڭعا اينالادى.
– بۇل فورۋم سالا ماماندارى مەن ساراپشىلارىنا ءوز بىلىمدەرىمەن بولىسۋگە مۇمكىندىك بەرەدى. وسى ارقىلى ادامزاتقا جاساندى ينتەللەكت قىزمەت ەتەتىن بولاشاقتى بىرلەسىپ قۇرۋعا جول اشادى. ەلىمىز وسى باعىتتا يننوۆاتسيالىق ءوسۋدىڭ جوعارى الەۋەتىنە يە بولىپ وتىر. قازىرگى تاڭدا ەلىمىزدە عالىمدار مەن جاس تالانتتاردىڭ شوعىرلانۋى ءۇشىن قولايلى جاعداي جاسالىپ جاتىر. ازاماتتارىمىزدىڭ ءارتۇرلى سالادا ازىرلەگەن جاساندى ينتەللەكت ونىمدەرى بار, ولار قازىردىڭ وزىندە الەم نازارىن اۋدارىپ وتىر. ءبىز مۇنى ءسوزسىز, ماقتان تۇتامىز. جاساندى ينتەللەكت ەكونوميكانى, ونەركاسىپتى, عىلىم مەن تەحنيكانى دامىتۋدا زور الەۋەتكە يە, – دەگەن ەدى باعدات مۋسين.
«Digital Bridge» ەكى كۇندىك باعدارلامادان تۇرادى. مەملەكەت باسشىسىنىڭ قاتىسۋىمەن وتەتىن پلەنارلىق وتىرىس, حالىقارالىق سپيكەرلەرمەن پانەلدىك سەسسيا, Google for Startups ءىس-شارالارى وتەدى. ۇزدىك ستارتاپتار مەن يننوۆاتسيالىق جوبالارعا جانە كاسىپكەرلەرگە حالىقارالىق سىيلىقتار بەرىلەدى. اتالعان فورۋم بەس جىل قاتارىنان ەلوردادا وتكىزىلىپ ءجۇر. وسى جىلدار ىشىندە ۇزىلمەس ۇردىسكە اينالدى. ال IT قاۋىمداستىقتىڭ تاعاتسىزدانا كۇتەتىن ەڭ قىزىقتى وقيعاسى – ۇزدىك IT ستارتاپتار جارىسى. ونى «Astana Hub» وتكىزەدى. جەڭىمپازدار ءۇش اتالىم بويىنشا ماراپاتتالادى. جۇلدە قورى – 125 مىڭ دوللار.
– وسى ورايدا, «Digital Bridge 2023» فورۋمىنىڭ ەڭ ماڭىزدى ءارى قىزىقتى وقيعالارىنا شولۋ جاساعىم كەلەدى. فورۋمداعى ماڭىزدى ساتتەردىڭ ءبىرى – «Digital Bridge Awards»-قا قاتىستى بولماق. بۇل حالىقارالىق ماراپات ۇزدىك ستارتاپتارعا, يننوۆاتسيالىق جوبالارعا جانە كاسىپكەرلەرگە بەرىلەدى. بيىل ءىس-شاراعا قاتىسۋعا وتاندىق كومپانيالار عانا ەمەس, ورتالىق ازيا ەلدەرىنىڭ كاسىپورىندارى دا شاقىرىلدى. بۇگىنگى تاڭدا ءبىز وسى ماراپاتقا ۇمىتكەرلەردەن 350-دەن اسا ءوتىنىم قابىلدادىق. «Digital Bridge Awards 2023» جەڭىمپازدارى 8 اتالىم بويىنشا انىقتالادى, – دەدى «Astana Hub» باسقارۋشى ديرەكتورى الينا ءابدىراحمانوۆا.
مەملەكەت باسشىسى جاساندى ينتەللەكتى دامىتۋعا باسا نازار اۋدارىپ, جەتەكشى حالىقارالىق كومپانيالارمەن ىنتىماقتاستىق ورناتۋدىڭ ماڭىزىن دا ءجيى ايتادى. جاساندى ينتەللەكت مۇمكىندىگىن دۇرىس قولدانا الساق, ەكونوميكاعا تيەر پايداسى وراسان.