قۇرلىقتىق حوككەي ليگاسىندا (قحل) باق سىنايتىن ەلوردانىڭ «بارىسى» ءنوۆوسىبىردىڭ «سيبير» كومانداسىمەن ءبىر ايدا ءتورت مارتە كەزدەسىپ, تورتەۋىندە دە قارسىلاستارىنا ەسە جىبەردى.
«بارىس» پەن «سيبير» بيىلعى تۇراقتى بىرىنشىلىكتەگى ءبىرىنشى ويىنىن 4 قىركۇيەكتە ەلوردادا وتكىزىپ, قوناقتار وۆەرتايمدا 5:4 ەسەبىمەن جەڭىسكە جەتسە, اراعا ءۇش كۇن سالىپ نوۆوسبىردەگى ماتچتا ايدىن يەلەرى تاعى دا «بارىسقا» وۆەرتايمدا وپىق جەگىزدى – 1:0. 23 قىركۇيەكتە ەكى ۇجىم مۇزايدىندا ءۇشىنشى مارتە كەزدەسىپ, بۇل جولى دا جەرلەستەرىمىز «سيبير» كلۋبىنىڭ وسال تۇسىن تابا المادى – 4:2. ال كۇنى كەشە كوماندالار قىركۇيەك ايىندا ءتورتىنشى ويىنىن وتكىزىپ, اندرەي سكابەلكا شاكىرتتەرى تاعى دا ءوز جانكۇيەرلەرىن جەڭىسپەن قۋانتا المادى.
ەلورداداعى «بارىس ارەنا» سپورت كەشەنىندە وتكەن باسەكەنى قوناقتار بەلسەندى باستاپ, كەزدەسۋدىڭ نەبارى ءبىرىنشى مينۋتىندا-اق ويىننىڭ ەسەبىن اشسا, ۇزىلىستەن كەيىن دە «سيبير» حوككەيشىلەرى جەرلەستەرىمىزگە قاراعاندا بەلسەندى ويناپ, ەكىنشى كەزەڭ اياقتالار تۇستا تابلوداعى كورسەتكىشتى 2:0-گە جەتكىزدى. ءۇشىنشى كەزەڭنىڭ اياقتالۋىنا ەكى مينۋت قالعاندا رۋدولف چەرۆەنى ەسەپ ايىرماسىن قىسقارتقانىمەن, جەڭىستى ج ۇلىپ الۋعا «بارىس» ويىنشىلارىنا ۋاقىت جەتپەي قالدى – 2:1.