ازيا ويىندارىنىڭ بەسىنشى جارىس كۇنىندە قازاقستان كومانداسى ەكى التىن, ءبىر كۇمىس, التى قولا جەڭىپ الدى, دەپ جازادى Egemen.kz.
ستەند اتۋدان سكيت باعدارلاماسى بويىنشا ارالاس كوماندالىق سايىستا اسەم ورىنباي/ەدۋارد ەششەنكو جۇبى فينالدا كۋۆەيتتەن باسىم ءتۇسىپ, التىننان القا تاقتى.
نىسانا كوزدەۋدەن زۋحرا يرنازاروۆا التىن مەدال الدى. 10 مەتر قاشىقتىقتان جىلجىمالى نىساناعا وق اتۋ سايىسىندا 18 جاستاعى سپورتشىمىزعا ەشكىم تەڭ كەلمەدى. سونىمەن قوسا, 10 مەتر قاشىقتىقتان جىلجىمالى نىساناعا وق اتۋ سايىسىندا قازاقستان ايەلدەر قۇراماسى (زۋحرا يرنازاروۆا, فاتيما يرنازاروۆا, الەكساندرا سادۋاقاسوۆا) 2-ورىنعا يە بولىپ, كۇمىس جۇلدە الدى.
جاعاجاي ۆولەيبولىنان جۇپتىق باسەكەدە دميتري ياكوۆلەۆ پەن سەرگەي بوگاتۋ قولا مەدال ءۇشىن ماتچتا يران كومانداسىن جەڭدى, ەسەپ 2:0 (25:23, 30:28).
سپورتتىق گيمناستيكادان ات سناريادىندا ونەر كورسەتكەن 25 جاستاعى ناريمان قۇربانوۆ قولا جۇلدەگە قول جەتكىزدى, وتانداسىمىز 15.100 ۇپاي جينادى.
50 مەترگە باتتەرفلياي ادىسىمەن ءجۇزۋ جارىسىندا ادىلبەك مۋسين قولا جۇلدەگە يە بولدى. بۇل ونىڭ ازياداداعى ەكىنشى قولا مەدالى. 27 قىركۇيەكتە ول 100 مەتر قاشىقتىقتاعى وسى ءادىس بويىنشا دا قولا مەدال العان بولاتىن.
تاەكۆوندودان ۇلتتىق قۇرامانىڭ سپورتشىلارى دەنيز جانسەل (+67 كگ) جانە سمايىل دۇيسەباي (+80 كگ) ازيا ويىندارىنىڭ قولا جۇلدەگەرلەرى اتاندى.
سەمسەرلەسۋدەن ەرلەر قۇراماسى (مۇحامەدالي ءراحمانالى, نازارباي ساتتارحان, جانات نابيەۆ, ارتەم ساركيسيان) كوماندالىق جارىستا قولا مەدال جەڭىپ الدى.
بوكستان اسلانبەك شىمبەرگەنوۆ قىتايلىق قارسىلاسىن جەڭىپ, جارىستىڭ كەلەسى كەزەڭىنە ءوتتى.
5x5 باسكەتبولدان قازاقستاننىڭ ەرلەر كومانداسى ءباا قۇراماسىن 59:49 ەسەبىمەن جەڭدى.
3x3 باسكەتبولدان وتانداستارىمىز تايلاندتان 19:16 ەسەبىمەن ۇزدىك شىقتى.
ۇستەل تەننيسىنەن كيريلل گەراسيمەنكو 1/8 فينالىندا ۆەتنامدىق سپورتشىنى 4-0 ەسەبىمەن ۇتتى.
سۋ دوبىنان ايەلدەر قۇراماسى وڭتۇستىك كورەيا كومانداسىن 24:4 ەسەبىمەن ويسىراتا جەڭدى.
23–28 قىركۇيەك كۇندەرى ارالىعىنداعى جالپى قورىتىندى بويىنشا قازاقستان قۇراماسىنىڭ قورجىنىندا 3 التىن, 3 كۇمىس جانە 16 قولا جۇلدە بار.