قۇرلىقتىق حوككەي ليگاسىندا (قحل) ونەر كورسەتەتىن ەلوردانىڭ «بارىسى» بىلتىرعى ماۋسىمدا كوماندانىڭ ەڭ ۇزدىك سۇرمەرگەندەرىنىڭ ءبىرى بولعان امەريكالىق دجەرەمي براككونىڭ قىزمەتىنەن باس تارتقانىن مالىمدەدى.
«شابۋىلشى دجەرەمي براككو باس تارتىلعان ويىنشىلار تىزىمىنە ەنگىزىلدى. 48 ساعات ىشىندە قحل-ءدىڭ كەز كەلگەن كلۋبى حوككەيشىگە ۇسىنىس جاساي الادى. تۇراقتى بىرىنشىلىكتىڭ وسى ماۋسىمىندا براككو «بارىس» ساپىندا التى ماتچ وتكىزىپ, ءبىر شايبامەن كوزگە ءتۇستى» دەلىنگەن كلۋبتىڭ ءباسپاسوز قىزمەتى تاراتقان اقپاراتتا.
امەريكالىق شابۋىلشى ەلوردالىق كلۋبتىڭ قاتارىنا قحل-ءدىڭ بىلتىرعى ماۋسىمىندا قوسىلعان بولاتىن. وتكەن جىلعى تۇراقتى بىرىنشىلىك ويىندارىندا ول 59 ماتچ وتكىزىپ, 14 شايبا سوققان. سونىمەن قاتار 26 مارتە ارىپتەستەرىنىڭ گول سوعۋىنا جاعداي جاساپ بەرگەن.