لوندون تورىندە گۇلنۇر مۇقاجانوۆا مەن ايعانا عاليدىڭ جەكە كورمەسى ءوتىپ جاتىر. Three Highgate گالەرەياسىندا وتكەن «La Makan, Cosmic Corporeality» كورمەسىندە سۋرەتشىلەر اتا-بابا تاريحىنان سىر شەرتىپ, قازاق مادەنيەتىن تانىستىرادى.
سۋرەتشى گۇلنۇر مۇقاجانوۆا ءوز جۇمىستارىندا نەگىزىنەن كيىز جانە ماتا پايدالانادى. «بوساعا» تۋىندىسى سول ماتەريالداردان جاسالعان. قازاقتىڭ «تابالدىرىقتى باسپا, بوساعادا تۇرما» دەگەن تىيىمدارى اۆتوردىڭ قىلقالامىندا دا كورىنىس تابادى. ياعني ۇلتتىڭ تالاي عاسىرلارعا ۇلاسقان ءداستۇر-ۇعىمدارى بەينەلەنگەن. كورەرمەندى تاڭعالدىرعان تاعى ءبىر تۋىندى – مالدىڭ تەرىسىنەن جاسالعان ادام دەنەسىنىڭ ءمۇسىنى. جۇرەك تۇسىندا شانشىلىپ تۇرعان ينەلەر مىڭ ءولىپ, مىڭ تىرىلگەن قازاق حالقىنىڭ قايعى-قاسىرەتىن سيپاتتايدى.
«كوشپەلىلەر ۋاقىتىندا اتا-بابالارىمىز قانشاما قيىندىقتاردان ءوتتى. سوندا دا بۇگىنگى ۇرپاققا باي سالت-ءداستۇرىمىز, مادەنيەتىمىز جەتتى. مەنىڭ ماقساتىم – قازاقتىڭ ارۋاقتارىنىڭ رۋحىن كورسەتۋ, ساقتاۋ, الەم حالقىنا جەتكىزۋ, قۇرمەتتەۋ», دەيدى گۇلنۇر مۇقاجانوۆا.
ايتا كەتەيىك, بۇل – گۇلنۇردىڭ لوندونداعى ءۇشىنشى كورمەسى. ال ءوزى بەرليندە تۇرادى. ون جىلدان استام ۋاقىتتان بەرى شىعارماشىلىعى ارقىلى گەرمانيادا تۋعان جەرىن تانىتىپ ءجۇر.
«2022 جىلدىڭ ناۋرىز ايىندا ايعانامەن العاش كەزدەسكەندە-اق ونىڭ شىعارمالارىنا ءتانتى بولدىم. ءبىز ءارتۇرلى ستيل مەن فورمالاردا جۇمىس جاساساق تا, ءبىزدى ەرەكشە جاقىنداستىراتىن كۇش بار. ول ءبىزدىڭ تامىرىمىزدا, تاريحىمىزدا, اتا-بابالارىمىزدا, جەرىمىزدە جاتىر. ءبىز بويىمىزداعى ۇقساس ەنەرگيانى سەزىندىك», دەيدى گ.مۇقاجانوۆا.
ايعانا عالي دا شەتەلدىك كورمەلەرگە ءجيى قاتىساتىن سۋرەتشى. ول لوندونداعى كورمەگە ء«تاڭىر» سەرياسىنا كىرەتىن كارتينالارىن اكەلگەن. ءومىردىڭ قالاي باستاۋ الىپ, جالعاساتىنىن جەتكىزۋگە تىرىسقان.
«مەن ءۇشىن, ەڭ الدىمەن مادەنيەتىمىزدى كورسەتۋ ماڭىزدى. ءبىزدىڭ ەشكىمگە ۇقسامايتىن مەنتاليتەتىمىز بار, ونى بارشاعا تۇسىنىكتى تىلمەن, ونەر تىلىمەن جەتكىزۋ قاجەت», دەيدى ايعانا عالي.
كورمەنى لوندونداعى Ainalaiyn Space زاماناۋي ونەر ۇيىمى ۇيىمداستىردى. ونىڭ ارت-كۋراتورى جانە نەگىزىن قالاۋشى ينديرا دۇيسەباەۆا-زيابەك سەرىكتەستەرى لوران لەمان جانە دينا بايتاسوۆامەن بىرگە AIDA (حالىقارالىق ونەردى دامىتۋ قاۋىمداستىعى) كوممەرتسيالىق ەمەس ونەر ۇيىمى ارقىلى ورتالىق ازياداعى زاماناۋي ونەرمەن ون جىلدان بەرى جۇمىس ىستەپ كەلەدى. يگى باستاما 2013 جىلى ۆەنەتسياداعى قازاقستاننىڭ جەكە پاۆيلونىنان باستالىپتى. One Step/pe Forward كورمەسى ەلىمىزدىڭ العاشقى زاماناۋي ونەر شوۋى رەتىندە تانىلدى. ول كورمەدە قازاق دالاسىنىڭ كەڭدىگى نەگىزگى تاقىرىپ بولعان ەدى. ۇيىمداستىرۋشىلار ورتالىق ازياداعى زاماناۋي سۋرەتشىلەرگە قانشالىقتى قولداۋ قاجەت ەكەنىن تۇسىندىك دەيدى. وتكەن جىلى قۇرىلعان پلاتفورما حالىقارالىق ارت-رەزيدەنتسيا رەتىندە قىزمەت ەتەدى جانە عىلىم, ساۋلەت جانە ادەبيەت بويىنشا قوعامدىق وقۋ باعدارلامالارىن ۇسىنادى.
«Ainalaiyn Space جوباسىنا ءبىر جىل ەندى بولادى. سوندا دا ءبىز لوندونداعى Mimosa House, Exposed Arts Projects, Hellenic Centre سياقتى ونەر ينستيتۋتتارىمەن, ارت-رەزيدەنتسيا كەزىندە گرەكيانىڭ مەتەورا گەولوگيالىق قۇرىلىمدارىنىڭ مۇراجايىمەن ىنتىماقتاسا الدىق», دەدى دۇيسەباەۆا-زيابەك.
ايتا كەتەيىك, كورمە 15 قازانعا دەيىن جالعاسادى.