5 جىل ىشىندە جالپى اۋدانى 610 مىڭ گەكتار ورماندا 3 مىڭ ورمان ءورتى ورىن الىپ, 30 ملرد تەڭگەگە جۋىق شىعىن كەلتىرىلدى. بۇل تۋرالى باس پروكۋرور بەرىك اسىلوۆ ايتتى, دەپ حابارلايدى Egemen.kz.
بەرىك اسىلوۆ بۇل ماسەلەنىڭ ماڭىزدىلىعىن اتاپ ءوتتى.
«قازاقستاندا بۇكىل اۋماقتىڭ 4,7 پايىزى عانا ورمان القاپتارىمەن قامتىلعان. تابيعي ءوسىمنىڭ تومەندىگى اياسىندا ورتتەر مەن باقىلاۋسىز اعاش كەسۋ ونىڭ ودان ءارى قىسقارۋىنا اكەلەدى», دەپ اتاپ ءوتتى باس پروكۋرور.
5 جىل ىشىندە جالپى اۋدانى 610 مىڭ گەكتار ورماندا 3 مىڭ ورمان ءورتى بولىپ, 30 ملرد تەڭگەگە جۋىق شىعىن كەلتىرىلدى.
بارلىعى جىل سايىن 600-دەن استام جاعداي تىركەلەدى.
وتىرىس بارىسىندا اباي جانە قوستاناي وبلىستارىندا بولعان ءىرى ورتتەردى تەكسەرۋ جانە تەرگەۋ بارىسىندا پروكۋرورلار انىقتاعان بىرقاتار ءتۇيىندى پروبلەمالار ايتىلدى.
ولاردىڭ قاتارىندا ءورتتى ءسوندىرۋدىڭ ناقتى الگوريتمدەرىنىڭ, ەكولوگيا جانە توتەنشە جاعدايلار مينيسترلىكتەرىنىڭ بولىمشەلەرى اراسىنداعى ءتيىستى ءوزارا ءىس-قيمىلدىڭ, ءورتتى ەرتە انىقتاۋ جۇيەلەرىنىڭ بولماۋى, تەحنيكانىڭ توزىعى جەتكەن جاي-كۇيى, ورمانشىلاردىڭ ءورتتى جەدەل سوندىرۋگە دايىندىعىنىڭ بولماۋى جانە باسقا پروبلەمالار بار.
وسىعان بايلانىستى توتەنشە جاعدايلارعا اكەپ سوققان سەبەپتەر مەن جاعدايلاردى جويۋ ماقساتىندا باس پروكۋراتۋرا ۇكىمەتكە ۇسىنىس ەنگىزدى.
ورماندى زاڭسىز كەسۋگە قارسى كۇرەس, سونداي-اق ورمان مەكەمەلەرىنىڭ ونى مولايتۋ, ونىڭ ىشىندە استانانىڭ «جاسىل بەلدەۋىن» كەڭەيتۋ جونىندەگى ءىس-شارالاردى ساپاسىز جۇرگىزۋى ماسەلەلەرىنە ەرەكشە نازار اۋدارىلدى.
باس پروكۋرور سونداي-اق وسى سالاداعى اكىمشىلىك جانە قىلمىستىق قۇقىق بۇزۋشىلىقتاردىڭ انىقتالۋىنىڭ تومەندەگەنىن اتاپ ءوتىپ, ورمان اعاشتارىن ۇرلاۋدىڭ زاڭسىز سحەمالارىنىڭ جولىن كەسۋ جونىندەگى جۇمىستىڭ تيىمدىلىگىن ارتتىرۋ قاجەتتىگىن اتاپ ءوتتى.
جەرگىلىكتى جەرلەردەگى پروكۋرورلارعا ۆەدومستۆولاردىڭ جۇمىسىن ۇيلەستىرۋ جانە وسى ساناتتاعى قىلمىستىق ىستەر بويىنشا ساپالى قاداعالاۋدى قامتاماسىز ەتۋ تاپسىرىلدى.
تالقىلاۋ قورىتىندىسى بويىنشا ۋاكىلەتتى ورگاندار ءۇشىن بىرقاتار ۇسىنىمدار ازىرلەندى.
اتاپ ايتقاندا, ەكولوگيا جانە تابيعي رەسۋرستار مينيسترلىگىنە ءورتتى ءسوندىرۋ الگوريتمدەرى مەن جاراقتاندىرۋ نورماتيۆتەرىن رەگلامەنتتەيتىن نورماتيۆتىك اكتىلەردى قابىلداۋ, تەحنيكا ساتىپ الۋ ءۇشىن قاراجات ىزدەۋ, ورمانشىلاردىڭ ەڭبەگىنە اقى تولەۋدى ارتتىرۋ جانە الەۋمەتتىك قورعاۋ ماسەلەلەرىن پىسىقتاۋ ۇسىنىلدى.
انىقتالعان كەمشىلىكتەردى جۇيەلى شەشۋ ءۇشىن 2024-2027 جىلدارعا ارنالعان بىرلەسكەن ءىس-شارالار جوسپارى ازىرلەندى.