ازيا ويىندارى: ءتورتىنشى جارىس كۇنىنىڭ ناتيجەسى

ستەند اتۋ: ساپىندا اسەم ورىنباي, زويا كراۆچەنكو جانە ولگا پانارينا بار قازاقستاننىڭ ايەلدەر كومانداسى سكيت باعدارلاماسىندا التىن مەدال جەڭىپ الىپ, ازيا ويىندارىندا رەكورد (350 بالل) جاسادى. ال جەكەلەي سىندا اسەم ورىنباي قولا جۇلدەگە يە بولدى.

ءجۇزۋ: ۆاتتەرفلياي ادىسىمەن (100 مەتر) ءجۇزۋدىڭ فينالدىق كەزەڭىندە ادىلبەك مۋسين 51.86 سەكۋندتا مارەگە جەتىپ, قولا مەدال ەنشىلەدى.

ۋ-شۋ ساندا: 52 كەلىگە دەيىنگى سالماق دارەجەسىندە ونەر كورسەتكەن ايان تۇرسىن قولا جۇلدەگە يە بولدى.

بوكس: ەكى دۇركىن الەم چەمپيونى نازىم قىزايباي (50 كگ) نەپالدان كەلگەن قارسىلاسى سۋسما تامانگتى – 5:0 ەسەبىمەن ايقىن باسىمدىقپەن ۇتتى, ال ساعىندىق توعامباي موڭعوليالىق بارياحاان دورجدى ەكىنشى راۋندتا مەرزىمىنەن بۇرىن جەڭدى. كەشكى سەسسيادا ەرتۋعان زەينۋللينوۆ (63,5 كگ) تاجىكستاننان كەلگەن بوكسشى باحودۋر ۋسمونوۆتى 3:2 ەسەبىمەن تىزە بۇكتىردى.

تەننيس: ارالاس جۇپتا جىبەك قۇلامباەۆا مەن گريگوري لوماكين 32 مينۋت ىشىندە تاجىكستاننان كەلگەن قارسىلاستارىن 6:0, 6:1 ەسەبىمەن جەڭىپ, جارىستىڭ كەلەسى كەزەڭىنە شىقتى.

3x3 باسكەتبول: قازاقستاننىڭ ايەلدەر كومانداسى نەپال قۇراماسىن 17:10 ەسەبىمەن جەڭدى.

گاندبول: قازاقستان ايەلدەر كومانداسى توپتىق ىرىكتەۋ كەزەڭىندە وزبەكستان قۇراماسىن 37:33 ەسەبىمەن ۇتتى.

4-ءشى جارىس كۇنىنىڭ قورىتىندىسى بويىنشا قازاقستان قۇراماسىنىڭ قورجىنىندا 1 التىن, 2 كۇمىس جانە 7 قولا جۇلدە بار.