اتىراۋ وبلىسىندا ورتا ءبىلىم بەرەتىن 200-دەن استام مەكتەپ بار. وبلىس اكىمى سەرىك شاپكەنوۆتىڭ مالىمەتىنشە, بيىل ءبىلىم وردالارىنىڭ ماتەريالدىق-تەحنيكالىق بازاسىن نىعايتۋعا 4 ملرد 544 ملن 527 مىڭ تەڭگە بولىنگەن. ونىڭ ىشىندە وقۋلىق جانە وقۋ-ادىستەمەلىك كەشەندەرمەن قامتۋ ءۇشىن 1 ملرد 676 ملن 370 مىڭ تەڭگە قاراستىرىلعان.
اكىمنىڭ پىكىرىنشە, تۇرعىندارمەن كەزدەسۋدە ءجيى كوتەرىلەتىن ماسەلەنىڭ ءبىرى – مەكتەپتەردى ارنايى اۆتوبۋسپەن قامتۋ جايى. ماسەلەن, وتكەن جىلى وقۋشىلار 49 اۆتوكولىكپەن تەگىن تاسىمالداعان. ەندى بيىلعى جاڭا وقۋ جىلىندا 60 ەلدى مەكەندەگى 4 561 وقۋشىنى تاسىمالداۋ جوسپارلاندى. بۇعان 1,4 ملرد تەڭگە قوسىمشا ءبولىنىپ, 23 اۆتوبۋس ساتىپ الۋ كوزدەلىپتى.
– تۇرعىنداردىڭ ءوتىنىشىن ەسكەرىپ, مەكتەپتەر ءۇشىن ەلىمىزدە شىعارىلعان اۆتوبۋستاردى ساتىپ الدىق. بۇل كولىكپەن وقۋشىلار تاسىمالدانادى. ماقسات – ەلىمىزدىڭ كەلەشەگى سانالاتىن بۇگىنگى بالالاردىڭ قاۋىپسىزدىگىن قامتاماسىز ەتۋ. وقۋشىلارعا ساپالى ءبىلىم مەن تاربيە بەرىپ, قولايلى ورتا قالىپتاستىرۋىمىز قاجەت. ەڭ مىقتى ينۆەستيتسيا – باسەكەگە قابىلەتتى ادامي كاپيتالدى دامىتۋعا, بىلىمگە سالىنعان ينۆەستيتسيا, – دەيدى سەرىك شاپكەنوۆ.
جەتى اۋدان مەن اتىراۋ قالاسىنداعى 15 ءبىلىم بەرۋ ورداسىنا 15 اۆتوبۋس بەرىلدى. ەندى قازان ايىندا تاعى 8 اۆتوبۋس جەتكىزىلەدى. سارى ءتۇستى اۆتوبۋستا 36 ورىن جانە ەرەكشە بالالارعا ارنايى قۇرىلعى, بەينەكامەرا بار.
اتىراۋ وبلىسى