ش.شاياحمەتوۆ اتىنداعى ء«تىل-قازىنا» ۇلتتىق عىلىمي پراكتيكالىق ورتالىعىنىڭ باس ديرەكتورى ماقپال جۇماباي الەۋمەتتىك جەلىدەگى پاراقشاسىنا ورتالىق قۇرامىنداعى اباي ينستيتۋتىنىڭ الەۋەتىن ارتتىرۋعا كۇش سالىنىپ جاتقانىن جازدى. بولاشاقتا ونى الەمدەگى گەتە, يۋنۋس ەمرە ينستيتۋتتارى دەڭگەيىنە كوتەرۋ كوزدەلىپ وتىر. قازىر ماقسات ايقىندالىپ, ءتيىستى جۇمىستار دا باستالعان.
شەتەلدەگى قازاق دياسپوراسىنا قازاق ءتىلىن ۇيرەتۋ – ينستيتۋتتىڭ نەگىزگى مىندەتتەرىنىڭ ءبىرى. ينستيتۋتتىڭ ءتىل ۇيرەتۋ باعىتى وسىدان ءۇش جىل بۇرىن باستالعان بولاتىن. باستاپقىدا بەس وفلاين سىنىپ اشىلسا, بۇگىندە ونىڭ سانى ەكى ەسە وسكەن. رەسەيدىڭ ومبى, پولشانىڭ ۆارشاۆا قالالارىندا بيىلعى ماۋسىم ايىنان, موڭعوليانىڭ ۇلانباتىر, يران رەسپۋبليكاسىنىڭ گورگان قالاسىندا شىلدەدەن, تۇركيانىڭ انتاليا قالاسىندا تامىزدان بەرى وقىتۋ ءجۇرىپ جاتىر. تۇركيانىڭ ىستامبۇل, فرانتسيانىڭ پاريج, اۋستريانىڭ ۆەنا, ماجارستاننىڭ بۋداپەشت قالالارى مەن اقش-تىڭ كاليفورنيا شتاتىندا قىركۇيەك ايىنان باستاپ وقىتۋ تولىققاندى جۇرە باستادى. ساباقتار ء«تىل-قازىنا» ورتالىعى جارىققا شىعارعان شەتەلدەگى قازاق دياسپوراسىنا ارنالعان امبەباپ وقۋلىقتارمەن وتكىزىلەدى.
– وقىتۋشىلار جىل سايىن ارنايى بىلىكتىلىك كۋرستارىنا قاتىسىپ, وزدەرىنىڭ ءتىل وقىتۋ ادىستەمەلەرىن جەتىلدىرىپ وتىرادى. سونىمەن قاتار ءبىز شەتەلدەگى وقىتۋشىلارىمىزبەن بىرلەسە قازاق ءتىلى وقۋلىقتارىن جازۋ تاجىريبەسىن تۇڭعىش رەت قولعا الدىق. بيىل سونىڭ العاشقى ناتيجەسى – «تۇرىك ازاماتتارىنا ارنالعان قازاق ءتىلى وقۋلىعىنىڭ» ا1 دەڭگەيىن ۇسىنباقپىز. كەلەر جىلى دا بۇل تاجىريبە جالعاسىپ, شەتەل ازاماتتارى ءۇشىن بىرنەشە وقۋلىق جارىق كورمەك, – دەيدى ماقپال جۇماباي.