ءماجىلىس توراعاسى ەرلان قوشانوۆ ۆەتنام ۇلتتىق اسسامبلەياسى توراعاسىنىڭ ورىنباسارى نگۋەن حاك ءديندى قابىلدادى. ۆەتنام پارلامەنتىنىڭ دەلەگاتسياسى ەكىجاقتى ىنتىماقتاستىقتى دامىتۋ ماسەلەلەرىن تالقىلاۋ ءۇشىن ەلىمىزگە ارنايى كەلدى.
وتىرىستى اشقان ەرلان قوشانوۆ بىلتىر قازاقستان مەن ۆەتنام اراسىندا ديپلوماتيالىق قارىم-قاتىناس ورناعانىنا 30 جىل تولعانىن اتاپ ءوتتى. وسى جىلدار ىشىندە بەلسەندى ساياسي ديالوگ جولعا قويىلىپ, ەلدەر اراسىنداعى جان-جاقتى ىنتىماقتاستىقتىڭ بەرىك ىرگەتاسى قالاندى.
– ءسىز پرەزيدەنت قاسىم-جومارت توقاەۆتىڭ ۆەتنامعا رەسمي ساپارىنان ءبىر اي وتكەن سوڭ كەلىپ وتىرسىز. بۇل ەلدەرىمىز اراسىنداعى ءوزارا تۇسىنىستىك پەن سەنىمنىڭ جوعارى دەڭگەيىن كورسەتەدى. بۇگىن بىزدە مەملەكەت باسشىلارىنىڭ كەلىسىمدەرىنە سايكەس پارلامەنتتەر اراسىنداعى ىنتىماقتاستىقتىڭ باسىم باعىتتارىن تالقىلاۋعا تاماشا مۇمكىندىك بار, – دەدى ە.قوشانوۆ.
كەزدەسۋ بارىسىندا تاراپتار 2015 جىلدان بەرى بەلسەندى دامىپ كەلە جاتقان پارلامەنتارالىق بايلانىستى پىسىقتادى. بۇگىندە ماجىلىستە 12 دەپۋتاتتان تۇراتىن ۆەتنام سوتسياليستىك رەسپۋبليكاسىمەن دوستىق توبى بار. وعان حالىقارالىق ىستەر, قورعانىس جانە قاۋىپسىزدىك كوميتەتىنىڭ توراعاسى ايگۇل قۇسپان جەتەكشىلىك ەتەدى. قازاقستان تاراپى وسىنداي دوستىق توپتارى, ءتيىستى كوميتەتتەر ارقىلى كوپجاقتى پلاتفورمالاردا بىرلەسىپ جۇمىس ىستەۋگە جانە زاڭناما سالاسىندا تاجىريبە الماسۋعا دايىن ەكەندىكتەرىن ءبىلدىردى.
ءماجىلىس سپيكەرى قازاقستانداعى ساياسي-ەكونوميكالىق رەفورمالار مەن پرەزيدەنتتىڭ جۋىرداعى جولداۋىنان حاباردار ەتىپ, ونىڭ باستى ماقساتى – جاڭا ەكونوميكالىق مودەل قۇرۋ ەكەنىن ايتتى.
– بۇل قادام وڭدەۋ سالاسىن, بانك سەكتورىن, جاساندى ينتەللەكتىنى دامىتۋدى جانە ينۆەستيتسيا تارتۋدى كوزدەيدى. وسى تۇرعىدا ءبىز ۆەتنامدىق ارىپتەستەرمەن بىرلەسكەن جوبالاردى جۇزەگە اسىرۋ ءۇشىن ديالوگقا اشىقپىز, – دەدى ءماجىلىس توراعاسى.
نگۋەن حاك دين ءوز كەزەگىندە ۆەتنام ورتالىق ازياداعى ەڭ ءىرى سەرىكتەس رەتىندە قازاقستانمەن ساۋدا جانە ءوندىرىس الەۋەتىن ارتتىرۋعا مۇددەلى ەكەنىن ايتتى. تاراپتار ينۆەستيتسيا بويىنشا ەكىجاقتى كەلىسىمدەردى جاڭارتۋ, لوگيستيكالىق دالىزدەردى كەڭەيتۋ, بىرلەسكەن وندىرىستەردى, سونىڭ ىشىندە ەكسپورتقا باعىتتالعان وندىرىستەردى دامىتۋ قاجەتتىگىن اتاپ ءوتتى.
دەپۋتاتتار جەڭىل ونەركاسىپ, اۋىل شارۋاشىلىعى, ترانزيتتىك دالىزدەر سالالارىنداعى ەلارالىق جوبالاردىڭ الەۋەتى زور ەكەنىنە نازار اۋداردى. ءماجىلىس سپيكەرى قازاقستان ازيا مەن ەۋروپا اراسىنداعى كونتينەنتتىك باعىتتاردىڭ 80 پايىزعا جۋىعىن قامتاماسىز ەتەتىنىنە, ال 2019 جىلى ىسكە قوسىلعان «ۆەتنام – قىتاي – قازاقستان» تەمىرجول باعىتى ەكى ەل اراسىنداعى جۇكتەردى جەتكىزۋگە جاقسى مۇمكىندىك بەرەتىنىنە توقتالدى.
تاراپتار تۋريزم, مادەني-گۋمانيتارلىق بايلانىس پەن ەلدەر اراسىنداعى اۋە قاتىناسى سالاسىنداعى ىنتىماقتاستىقتى كەڭەيتۋ مۇمكىندىكتەرىن دە تالقىلادى.