بۇگىن ەلورداداعى ۇلتتىق تەننيس ورتالىعىندا تەننيستەن الەمدىك دەڭگەيدەگى ءداستۇرلى «ATP 250 Astana Open» ءتۋرنيرىنىڭ شىمىلدىعى ءتۇرىلدى. بيىل ءۇشىنشى مارتە وتكىزىلىپ جاتقان جارىستا الەمىڭ بىرقاتار تانىمال تەننيسشىلەرى باق سىنايدى.
26 قىركۇيەك پەن 3 قازان ارالىعىندا ەلوردادا وتەتىن حارد توسەنىشتەگى ATP 250 دوداسىنا الەمدىك رەيتينگتە توپ-50 تەننيسشىنىڭ قاتارىنا ەنەتىن ون سپورتشى قاتىسادى. اتاپ ايتقاندا, ولاردىڭ قاتارىندا حورۆاتيالىق بورنا چوريچ (23 اتر), نيدەرلاندتىق تاللون گريكسپور (24 اتر), چەحيالىق يرجي لەگەچكا (29 اتر), امەريكالىق سەباستيان كوردا (31 اتر), ارگەنتينالىق سەباستيان باەس (32 اتر) بار. سونداي-اق قازاقستان استاناسىندا فرانتسيالىق ادريان ماننارينو (35 اتر), سەربيالىق لاسلو دجەرە (38 اتر), اۋستراليالىق الەكسەي پوپىرين (41 اتر), شۆەيتساريالىق ستەن ۆاۆرينكا (49 اتر), ەلىمىزدىڭ ەرلەر اراسىنداعى ءبىرىنشى راكەتكاسى الەكساندر بۋبليك (27 اتر), تاعى باسقا سپورتشىلار ونەر كورسەتەدى.
ءوز جەرىمىزدە ۇيىمداستىرىلىپ جاتقان بەدەلدى جارىستا الەكساندر بۋبليكتەن بولەك, ميحايل كۋكۋشكين (WC), جۇپتىق سىندا اندرەي گولۋبەۆ پەن الەكساندر نەدوۆەسوۆ ەل نامىسىن قورعايدى. تۋرنير جەڭىمپازى الەمدىك رەيتينگتە 250 ۇپاي ولجالايدى.