الەمدى ۇيلەستىرەتىن قۋاتتى كۇش – ونەر قۇدىرەتى. سەبەبى ونەر مەن شىعارماشىلىقتىڭ ادامزاتقا ورتاق جالعىز ءتىلى بار. الماتىداعى مەملەكەتتىك ورتالىق مۋزەيدە كورەي جانە قازاق سۋرەتشىلەرىن ءبىر الاڭعا جيناعان «جەر پلانەتاسىنا تاعزىم» اتتى سۋرەت كورمەسىنىڭ كۋاسى بولىپ قايتتىق.
جەر بەتىندەگى مامىراجاي تىرلىككە ءومىردىڭ ءتۇرلى باعىتىنا جاۋاپتى – ادام. اتىسپاي-شابىسپاي, تالاسپاي-تارتىسپاي جەر بەسىكتى جۇماق باققا اينالدىرۋعا جۇمىر باستى پەندەلەرگە نە كەدەرگى؟ كورمەدەگى قازداي تىزىلگەن كارتينالار وسى ءبىر ساۋالدىڭ جاۋابىن ىزدەۋگە شاقىراتىنداي... ادام قولىمەن جاسالاتىن اپاتتار, قياناتتار مەن قاستاندىقتار قىلقالام ۇستاعان شەبەرلەردىڭ كەنەبىندە وتكىر سىنعا ۇشىرايدى. سەزىم ىرعاقتارىن تاپ باساتىن تۋىندىلار كوڭىل تازالىعىن, مەيىرىم مەن ىزگىلىكتى ەشبىر امال الماستىرا المايتىنىن العا تارتادى.
ت.جۇرگەنوۆ اتىنداعى قازاق ۇلتتىق ونەر اكادەمياسى مەن تەدجونداعى حالىقارالىق ونەر الماسۋ قاۋىمداستىعى بىرلەسە ۇيىمداستىرعان كورمەگە كەسكىندەمە, ءمۇسىن, گرافيكا جانە ارالاس تەحنيكادا ورىندالعان تۋىندىلار قويىلعان. سۋرەتشىلەردىڭ باعىتتارى مەن ستيلدەرى جالپى زاماناۋي ونەر ءتىلى ارقىلى الەم حالىقتارىنىڭ مادەني داستۇرلەرى مەن ۇلتتىق قۇندىلىقتارىن دارىپتەۋگە شاقىرادى.
مەملەكەتتىك ورتالىق مۋزەي ديرەكتورى راشيدا حاريپوۆا مادەنيەتتەر دوستىعى الەم ەلدەرىن ءبىر ارنادا توعىستىراتىن ايرىقشا قۇندىلىق ەكەنىن, تەك ەلىمىزدىڭ عانا ەمەس قانشاما ۇلت پەن ۇلىستىڭ ءومىر ورنەگىنەن حابار بەرەتىن قۇندى جادىگەرلەر ساقتالعان مۋزەيدە مۇنداي شارالار ۇزبەي ءوتىپ تۇراتىنىن ايتادى. بۇل ءوز كەزەگىندە ەلىمىزدىڭ حالىقارالىق قاۋىمداستىق الدىنداعى بەدەلىن بيىكتەتەتىن جوبالار ساناتىندا.
«كورمەنىڭ نەگىزگى ماقساتى – حالىقتار اراسىنداعى ءوزارا مادەني بايلانىس پەن ىنتىماقتاستىقتى قولداۋ جانە نىعايتۋ. بەيبىتشىلىك پەن تۇراقتىلىقتى, تابيعات پەن قورشاعان ورتانىڭ سۇلۋلىعىن ناسيحاتتاۋ جانە الەمدەگى تابيعي اپاتتار مەن ادامنىڭ تىكەلەي ءىس-ارەكەتىنەن بولعان ەكولوگيالىق اپاتتارعا نازار اۋدارۋ. بۇل كورمەگە وتاندىق جانە شەتەلدىك تانىمال سۋرەتشىلەر قاتىسۋدا. قازاقستاننىڭ ەڭبەك سىڭىرگەن قايراتكەرلەرى – اماندوس اقاناەۆ, جۇماقىن قايرامباەۆ, ءالىباي باپانوۆ, بولات تۇرعىنباي, باۋىرجان ءبايدىلدا, نەللي بۋبە, ومىربەك جۇبانيازوۆتاردىڭ قولتاڭبالارىنا شەتەلدەن كەلگەن ونەرتانۋشىلار تاڭعالىسىن بىلدىرۋدە», دەيدى راشيدا ەرىمقىزى.
سۋرەتشىلەر ءوز يدەيالارىن قاراپايىم ادامداردىڭ ءومىر تىنىسى ارقىلى جەتكىزەدى. سول ارقىلى ادام مەن تابيعات ۇندەستىگىن, اق پەن قارانىڭ قايشىلىعىن پىشىندىك بەدەرلەر مەن كوپقاباتتى بوياۋ تۇستەرىن پايدالانۋ ارقىلى سويلەتەدى. كورمەگە قاتىسقان كورەي سۋرەتشىلەرىنىڭ ىشىندە ەلىمىزدىڭ ونەر سالاسىنىڭ دامۋىنا ايشىقتى ۇلەس قوسىپ, مازمۇندى كەلبەت بەرگەن تالانتتار از ەمەس.
– بۇگىندە ەكى ەل اراسىنداعى مادەني, شىعارماشىلىق بايلانىس قارقىندى دامۋدا. اكادەميا ۇستازدارى مەن ماگيسترانتتارى بىرنەشە رەت تەدجون قالاسىندا وتكەن حالىقارالىق كورمەلەرگە قاتىسىپ, كورەيالىق سۋرەتشىلەر ونەر اكادەمياسىندا كورمە وتكىزىپ, ءوزارا تاجىريبە الماسىپ كەلەدى. «جەر پلانەتاسىنا تاعزىم» اتتى كورمە بەينەلەۋ ونەرى سالاسىنداعى جاڭا زاماناۋي باعىتتاعى ونەر تۋىندىلارىلارىمەن ءوز كورەرمەندەرىن تابادى دەپ سەنەمىز, – دەيدى ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ ۇستازى, سۋرەتشى جۇماقىن قايرامباەۆ.
اتاپ وتەر بولساق, ءداستۇرلى كورمە بيىل 15-رەت شىمىلدىعىن ءتۇرىپ وتىر.
الماتى