55 جاستان باستاپ تاعايىندالاتىن ارنايى الەۋمەتتىك تولەمدەر ءۇشىن 7 جىل ەڭبەك ءوتىلى بولۋ كەرەك دەگەن اقپارات شىندىققا جاناسپايدى, دەپ حابارلايدى Egemen.kz ەڭبەك جانە حالىقتى الەۋمەتتىك قورعاۋ مينيسترلىگىنە سىلتەمە جاساپ.
ەڭبەك جانە حالىقتى الەۋمەتتىك قورعاۋ مينيسترلىگىنىڭ حابارلاۋىنشا, باق-تا, مەسسەندجەرلەر مەن الەۋمەتتىك جەلىلەردە تاراپ جاتقان زياندى جاعدايلاردا جۇمىس ىستەگەن ازاماتتارعا الداعى ۋاقىتتا 55 جاستان باستاپ تاعايىندالاتىن ارنايى الەۋمەتتىك تولەمدەر ءۇشىن 7 جىل ەڭبەك ءوتىلى بولۋ كەرەك دەگەن اقپارات جالعان.
22 قىركۇيەكتە پرەمەر-ءمينيستردىڭ ورىنباسارى تامارا دۇيسەنوۆانىڭ 55 جاستان باستاپ زياندى جاعدايلاردا جۇمىس ىستەگەنى ءۇشىن ارنايى الەۋمەتتىك تولەمدەردى تاعايىنداۋ بويىنشا جۋرناليستەردىڭ ساۋالىنا بەرگەن جاۋابى بويىنشا بۇقارالىق اقپارات قۇرالدارى مەن الەۋمەتتىك جەلىلەردە شىندىققا جاناسپايتىن اقپارات تاراپ جاتىر.
باق-تا جاريالانعان اقپارات بويىنشا «زياندى جاعدايلاردا جۇمىس ىستەگەنى ءۇشىن ءوتىلى 7 جىلدان كەم بولماۋ كەرەك» دەپ كورسەتىلگەن.
«قازىرگى تاڭدا ارنايى الەۋمەتتىك تولەمدەردى تاعايىنداۋ ءۇشىن ۇسىنىلاتىن شارتتاردىڭ ءبىرى رەتىندە جۇمىس بەرۋشىنىڭ بىرىڭعاي جيناقتاۋشى زەينەتاقى قورىنا 7 جىلدان كەم ەمەس مىندەتتى كاسىبي تولەمدەردىڭ بولۋى قاراستىرىلىپ جاتىر. بۇگىنگى كۇنى مۇددەلى مەملەكەتتىك ورگاندارمەن, جۇمىسشىلار مەن جۇمىس بەرۋشىلەردىڭ وكىلدەرىمەن بىرلەسىپ, وسىعان قاتىستى تاسىلدەردىڭ قاراستىرىلىپ جاتقانىن حابارلايمىز», دەپ مالىمدەدى مينيسترلىك.