ەلىمىزدە قىركۇيەك ايىنىڭ سوڭعى جەكسەنبىسى – ەڭبەك كۇنى. ايتۋلى داتانىڭ ماقساتى – قوعامداعى قاراپايىم ەڭبەك ادامىنىڭ بەدەلىن ءوسىرۋ, ەڭبەك اۋلەتىندەگى كوپجىلدىق ءداستۇردى ودان ءارى نىعايتۋ جانە ەڭبەكشىل قوعام قۇرۋ يدەياسىن ناسيحاتتاۋ.
ەلىمىزدە 2013 جىلدان بەرى جىل سايىن قىركۇيەكتىڭ ءار سوڭعى جەكسەنبىسىندە ەڭبەك كۇنى مەرەكەلەنىپ كەلەدى. بيىل بۇل ايتۋلى كۇن 24 قىركۇيەككە تۇسپا-تۇس كەلىپ وتىر. ەڭبەك كۇنى كۇنتىزبەدەگى ەڭبەك مەرەكەسى عانا ەمەس, ەڭبەك ساپاسىنىڭ كورسەتكىشى دەۋگە دە بولادى. بۇعان تۇراقتى جۇمىسپەن قامتۋ, ەڭبەك قاۋىپسىزدىگى, ەڭبەكاقىنىڭ لايىقتى دەڭگەيى, الەۋمەتتىك كەپىلدىكتەر جاتادى.
– ەڭبەك كۇنىن مەرەكەلەۋ ءداستۇرى الەمدىك تاجىريبەدە بار. قازىر جەر-جاھاننىڭ جۇزدەن اسا ەلى بۇل كۇندى ايرىقشا اتاپ وتەدى. ال جاڭا زەلانديا, جاپونيا, قىتاي, رەسەي, بەلارۋس قاتارلى ەلدەردە بۇل كۇن ءتىپتى مەملەكەتتىك مارتەبەگە يە. ءبىز دە ەلىمىزدەگى ەڭبەك قۇندىلىعىن ارتتىرۋ ماقساتىندا بۇل كۇنگە ايرىقشا ءمان بەرىپ وتىرمىز. مەرەكە قارساڭىندا بىرقاتار شارا وتكىزۋ جوسپارلانعان, دەدى ەڭبەك جانە حالىقتى الەۋمەتتىك قورعاۋ ۆيتسە-ءمينيسترى اقمادي سارباسوۆ.
مينيسترلىكتىڭ مالىمەتىنە سەنسەك, ەڭبەك كۇنى اياسىندا ۇزدىك ەڭبەك اۋلەتى مەن ءوندىرىستىڭ ۇزدىك جۇمىسكەرلەرىن انىقتاۋعا باعىتتالعان جىل سايىنعى «ەڭبەك جولى» رەسپۋبليكالىق بايقاۋىنا بيىل 591 ءوتىنىش قابىلدانىپتى.
– وڭىرلىك كەزەڭنىڭ جەڭىمپازدارىن وبلىس اكىمدەرىنىڭ ورىنباسارلارى باسقاراتىن كوميسسيالاردىڭ قازىلىعىمەن انىقتالىپ, سالتاناتتى تۇردە ماراپاتتالادى. جەڭىمپازدار بايقاۋدىڭ رەسپۋبليكالىق كەزەڭىنە جولداما الادى. ال رەسپۋبليكالىق كەزەڭنىڭ جەڭىمپازدارىن ەڭبەك مينيسترلىگىنىڭ جانىنداعى كوميسسيا باعالايدى. ول كوميسسيا قۇرامىندا پارلامەنت دەپۋتاتتارى, قوعامدىق كەلىسىم مەن الەۋمەتتىك ارىپتەستىك وكىلدەرى كىرەدى, دەيدى ۆيتسە-مينيستر.
سونىمەن قاتار ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز حاتشىسى ساكەن دىلداحمەت رەسپۋبليكالىق جانە وڭىرلىك دەڭگەيدە ەڭبەك ادامىن ناسيحاتتاۋ ماقساتىندا اۋقىمدى اقپاراتتىق جۇمىستار جۇرگىزىلىپ جاتقانىن جەتكىزدى.
– 24 قىركۇيەك كۇنى «حابار» تەلەارناسىندا 4 ساعاتتىق تەلەمارافون وتەدى. بۇل تەلەمارافوننىڭ باستى ماقساتى – ەڭبەك كۇنىنە وراي وندىرىستە, اۋىل شارۋاشىلىعىندا, الەۋمەتتىك سالالاردا جۇمىس ىستەپ جاتقان ازاماتتاردىڭ ەڭبەگىن كورسەتۋ. بۇعان قوسا ەڭبەك كۇنىن اتاپ وتۋگە بايلانىستى تەلەسەريالدار, ارنايى باعدارلامالار دا شىعادى, دەدى س.دىلداحمەت.
سونداي-اق ۆيتسە-مينيستر مەرەكە قارساڭىندا ەڭبەك قۇندىلىقتارىن ارتتىرۋ ماقساتىندا ەڭبەك ادامدارى مەن ءتۇرلى كاسىپ وكىلدەرى تۋرالى دەرەكتى فيلمدەر ءتۇسىرۋ, اقپاراتتىق ماتەريالدار, روليكتەر, سيۋجەتتەر شىعارۋ, ستۋدەنتتىك پىكىرتالاستار, «ەڭبەك گالەرەياسى» اتتى فوتوكورمەلەر جانە سپورتتىق شارالار وتكىزىلەتىنىن ايتتى.
«ەڭبەك جولى» بايقاۋىنىڭ جەڭىمپازدارى 22 قىركۇيەك كۇنى استانادا ەڭبەك كۇنىنە وراي وتەتىن فورۋم بارىسىندا جاريالانادى. جەڭىمپازدارعا اقشالاي سەرتيفيكاتتار مەن ەستەلىك سىيلىقتار تابىس ەتىلەدى.