بۇل كۇندەرى ايەلدەر كۇرەسىنەن بەلگرادتا ءوتىپ جاتقان الەم چەمپيوناتىندا التى سالماق دارەجەسى بويىنشا جەڭىمپازدار مەن جۇلدەگەرلەر انىقتالدى. وكىنىشكە قاراي, ۇزدىكتەر تىزىمىنە ازىرگە قازاقستاننىڭ بىردە-ءبىر بالۋانى ەنە الماي وتىر.
بۇرىمدىلار اراسىنداعى باسەكەنىڭ العاشقى كۇنى 55 جانە 59 كگ سالماقتاردا بەلدەسكەن تاجىريبەلى مارينا سەدنەۆا مەن ديانا كايۋموۆا ەل سەنىمىن اقتامادى. مارينا تۇساۋكەسەر كەزدەسۋىندە قىتايلىق جانگتەن جەڭىلسە, ديانا گەرمانيالىق ەلەنا برۋگەردىڭ وسال تۇسىن تابا المادى. كوپ كەشىكپەي مارال تاڭىربەرگەنوۆا (50 كگ), اينۇر ءاشىموۆا (57 كگ), يرينا كازيۋلينا (65 كگ) جانە ىڭكار جاڭاتاەۆا (76 كگ) كورەرمەندەر قاتارىنا قوسىلدى. ولار دا العاشقى اينالىمداردا وڭباي ءسۇرىندى.
ەكىنشى جارىس كۇنى تاعى ءتورت جەرلەسىمىز بوزكىلەمگە شىقتى. التىن شاعاەۆا (53 كگ) العاشقى بەلدەسۋىندە قىتايلىق پانگ تسيانيۋگە جول بەردى. يرينا كۋزنەتسوۆا (62 كگ) مەن ەلەنا شالىگينا (68 كگ) باستاپقى باسەكەسىندە باسىمدىق تانىتقانىمەن, ىلە-شالا جەڭىلىستىڭ كەرمەك ءدامىن تاتتى. يرينا گەرمانيالىق ليزا نيمەشكە, ەلەنا موڭعوليالىق دەلگەرماا ەنحسايحانعا ەسە جىبەردى. سولاردىڭ اراسىنان تەك ءجاميلا باقبەرگەنوۆا سۋىرىلىپ شىقتى. 72 كگ سالماقتا سايىسقا تۇسكەن قازاق قىزى سەربيالىق فانني نادتى تازا تاستاسا, رەسەيلىك كسەنيا بۋراكوۆانى 7:1 ەسەبىمەن جەڭدى. جارتىلاي فينالدا ءجاميلانىڭ جولى موڭعوليانىڭ مىقتىسى داۆااناسان ەنح امارمەن قيىستى. وكىنىشكە قاراي, بۇل جولى جەرلەسىمىز بىلگەنىنەن جاڭىلدى. وتە شيەلەنىستى وتكەن تارتىستا اماردىڭ اسىعى الشىسىنان ءتۇستى. ال باقبەرگەنوۆا كەشە قولا مەدال ءۇشىن ايقاستى.
كەلەسى توپتا اميت ەلور قارسىلاستارىن قوعاداي جاپىرىپ كەلە جاتتى. 19 جاستاعى اقش-تىڭ ارۋى بىلتىر بەلگرادتا وزىنەن الدەقايدا تاجىريبەلى سپورتشىلاردى سان سوقتىرىپ, الەم چەمپيونى اتانعان. سول جارىستىڭ فينالىندا ءبىزدىڭ باقبەرگەنوۆانى ايقىن باسىمدىقپەن ۇتقانى دا ەسىمىزدە. بۇل تابىسىنىڭ كەزدەيسوق ەمەستىگىن ول ودان كەيىن تالاي ءدۇبىرلى دودادا دالەلدەدى. اتاپ ايتساق, بيىلعى جىلى اميت پانامەريكا چەمپيوناتىندا باس جۇلدەنى ولجالاپ, جاستار اراسىنداعى الەم بىرىنشىلىگىندە (U-23) التىننان القا تاقتى. باسقا دا ءدۇبىرلى دودالاردا دارالاندى. وسى جارىستا امەريكالىق بالۋان تۇركيالىق نەسرين باس پەن 2012 جىلعى الەم چەمپيونى, جاپونيالىق ميۆا موريكاۆانى جولىنان ىعىستىرىپ, جارتىلاي فينالدا فرانتسيالىق كەندرا دەچەرمەن كۇش سىناستى. بۇل باسەكەدە ەلوردىڭ مىسى باسىم بولدى. وسىلايشا, 19 جاستاعى كۇش يەسى فينالعا شىقتى.
سونداي-اق كەشە گرەك-ريم كۇرەسى شەبەرلەرى ءوز جارىسىن باستادى. العاشقى كۇنى ءتورت سالماق دارەجەسى بويىنشا ىرىكتەۋ جانە جارتىلاي فينالدىق سايىستار ءوتتى. 55 كگ سالماقتاعى مارلان مۇقاشەۆ تۇساۋكەسەر كەزدەسۋىندە ارمەنيالىق رۋديك مكرتچيانمەن بەلدەسسە, 77 كگ-داعى دەمەۋ جادىراەۆ حورۆاتيالىق انتونيو كامەنياشەۆيچپەن كۇرەستى. 82 كگ سالماقتاعى دياس قالەن جارىستى ەكىنشى كەزەڭنەن باستايدى. ول رەسەيلىك اۋەز گانيبوۆ پەن قىرعىزستاندىق بەكسۇلتان نازارباەۆ اراسىنداعى باسەكەنىڭ جەڭىمپازىمەن كۇش سىناسادى. ال 130 كگ سالماقتا كەڭ-بايتاق رەسپۋبليكامىزدان ەل نامىسىن قورعايتىن بىردە-ءبىر تۇلعاسى كەلىسكەن بالۋان تابىلمادى.