ستراتەگيالىق جوسپارلاۋ جانە رەفورمالار اگەنتتىگىنە قاراستى ۇلتتىق ستاتيستيكا بيۋروسىنىڭ دەرەگى بويىنشا, ەلىمىزدە 173 شيپاجاي-كۋرورتتى مەكەمە جۇمىس ىستەيدى. قازاقستاندا كەنجەلەپ قالعان ءتۋريزمنىڭ بۇل سالاسى كەيىنگى جىلدارى ىشكى جانە شەتەلدىك تۋريستەر اراسىندا كەڭ تانىمالدىلىققا يە بولا باستادى.
تۋريزم جانە سپورت مينيسترلىگى ۇسىنعان مالىمەتكە ساي, ەلىمىزدەگى قولايلى كليماتتىق جاعداي, كۇن ساۋلەسى, بىرەگەي مينەرالدى قاينار كوزدەر مەن ەمدىك بالشىق ورىندارى ەمدەۋ-ساۋىقتىرۋ نىساندارىنىڭ دامۋىنا زور سەپتىگىن تيگىزىپ جاتىر. مىسالى, وڭتۇستىكتەگى سارىاعاش شيپاجايى قابىنۋ پروتسەسىن ەمدەۋگە جانە ادام اعزاسىنىڭ جالپى جاعدايىنا وڭ اسەر ەتەتىن, سونداي-اق ۇزاقمەرزىمدى اۋرۋدان كەيىن يممۋنيتەتتى قالپىنا كەلتىرۋگە كومەكتەسەتىن مينەرالدى قاينار كوزدەرىمەن تانىمال. ايتا كەتۋ كەرەك, سارىاعاشتىڭ كوكتەرەك كەنتى ەلىمىزدەگى شيپاجايلار ەڭ كوپ شوعىرلانعان مەكەن سانالادى.
سونىمەن قاتار شىعىس قازاقستاننىڭ كاتونقاراعاي اۋدانىنداعى تەرمالدى رادون قاينارلارى ەمدىك قاسيەتتەرى بويىنشا حالىقارالىق ساۋىقتىرۋ ورىندارىنان كەم تۇسپەيدى. سونداي-اق بۇل شيپاجاي – ەندوكريندىك اۋرۋلاردى ەمدەۋگە كومەكتەسەتىن تاپتىرماس ورىنداردىڭ ءبىرى. اتالعان ءوڭىردىڭ تابيعاتى جازدا دا, قىستا دا بىردەي. سوندىقتان جەرگىلىكتى شيپاجاي تۋريستەرگە كۋرورتتى ايماقتارعا جىلدىڭ كەز كەلگەن ۋاقىتىندا دەمالۋعا مۇمكىندىك بەرەدى.
ال ەلىمىزدىڭ باتىسىندا ورنالاسقان شيپاجايلار بۋىن, جۇيكە جۇيەسىن, گينەكولوگيالىق جانە ۋرولوگيالىق پاتولوگيالاردى, سونداي-اق تەرى اۋرۋلارىن ەمدەۋگە جانە الدىن الۋعا باعىتتالعان. بۋراباي جانە قوستانايداعى قاراعايلى ورماندارىنىڭ ەكولوگيالىق تازا اۋاسى, ەمدىك بالشىعى, ادەمى تاۋلى لاندشافت جانە بىرەگەي تابيعي كورىكتى جەرلەر دەنساۋلىعىن جاقسارتقىسى كەلەتىندەر ءۇشىن تاعى ءبىر سۇرانىسقا يە شيپاجاي-كۋرورتتى ايماققا اينالىپ كەلەدى.
«قازاقستان ساۋىقتىرۋ ءتۋريزىمىن دامىتۋ ءۇشىن ءتۇرلى تۋريستىك-رەكرەاتسيالى رەسۋرستارعا يە. شيپاجاي-كۋرورتتى كەشەندەردىڭ كوپشىلىگى جىل بويى جۇمىس ىستەيدى. بۇل ماۋسىمنان تىس ۋاقىتتا باعانى تومەندەتۋگە مۇمكىندىك بەرەدى. سول ارقىلى دەمالىس پەن ەمدەۋدى ودان ءارى قولجەتىمدى ەتەدى. كەيبىر پانسيوناتتار اتپەن سەرۋەندەۋ, تاريحي جانە تابيعي كورىكتى جەرلەرگە ەكسكۋرسيالار جۇرگىزۋ, ءارتۇرلى سپورتتىق جانە ويىن-ساۋىق ءىس-شارالارىن ۇيىمداستىرۋ جانە ت.ب. بىرقاتار قوسىمشا قىزمەتتى دە ۇسىنادى», دەدى تۋريزم جانە سپورت ۆيتسە-ءمينيسترى ەرجان ەركىنباەۆ.