تانىمال vRINGe سايتى ورتا سالماقتا كۇش سىناسىپ جۇرگەن كاسىپقوي بوكسشىلاردىڭ رەيتينگىن جاريالادى. مىقتىلار كوشىن قازاقتىڭ قايسار ۇلى, WBO نۇسقاسى بويىنشا الەم چەمپيونى جانىبەك ءالىمحان ۇلى باستاپ تۇر.
جانىبەكتىڭ ءجۇرىپ وتكەن جولى قازاق جانكۇيەرلەرىنىڭ كوز الدىندا. تانىمال جاتتىقتىرۋشى مۇرات سيقىمباەۆتان ءتالىم-تاربيە العان الماتى وبلىسى الاكول اۋدانى جىلاندى اۋىلىنىڭ تۋماسى اۋەلى اۋەسقويلار اراسىندا بيىك بەلەستەردى باعىندىردى. ونىڭ مىقتى سپورتشى بولىپ قالىپتاسۋىنا كەزىندەگى تانىمال بىلعارى قولعاپ شەبەرى قانات سيقىمباەۆ پەن ەلىمىزدىڭ ستۋدەنتتەر قۇراماسىنىڭ باس باپكەرى داستان سادۋاقاسوۆتىڭ دا سىڭىرگەن ەڭبەكتەرى زور. ج.ءالىمحان ۇلى 2013 جىلى امماندا ازيا جانە الماتىدا الەم چەمپيونى اتانسا, 2014 جىلى ينچحوندا وتكەن ازيا ويىندارىندا باس جۇلدەنى ولجالادى. 2016 جىلى ريو-دە جانەيرودا الاۋى تۇتانعان وليمپيا ويىندارىندا شيرەك فينالعا دەيىن جەتتى.
كاسىپقويلار اراسىندا جانىبەك ءالىمحان ۇلى 2016 جىلدىڭ كۇزىنەن بەرى جۇدىرىقتاسىپ ءجۇر. سول كەزدەن بەرى 14 كەزدەسۋ وتكىزىپ, بارلىعىندا جەڭىسكە جەتتى. توعىز قارسىلاسىن سۇلاتىپ سالدى. 2022 جىلى ۇلىبريتانيالىق دەنني ديگنۋمدى ەكىنشى راۋندتا ۇرىپ جىعىپ, WBO نۇسقاسىنىڭ ۋاقىتشا چەمپيونى اتاعىن يەلەندى. بيىلعى جىلدىڭ اقپان ايىندا اقش-تىڭ اتاقتى بوكسشىسى دەمەتريۋس اندرادە ج.الىمحان ۇلىمەن ايقاسۋدان باس تارتىپ, سونىڭ سالدارىنان التىن بەلبەۋدەن ايىرىلدى. وسىلايشا, قازاق جىگىتى تۇعىرعا قوندى. ودان كەيىن ول ءوز اتاعىن ەكى رەت ءساتتى قورعادى. بىلتىرعى جىلدىڭ 12 قاراشاسىندا ۇلىبريتانيانىڭ تاعى ءبىر وكىلى دەنزەل بەنتليدى ۇپاي سانىمەن ۇتسا, بيىل 13 مامىردا كانادالىق ستيۆەن باتلەردى ەكىنشى راۋندتا نوكاۋتقا جىبەردى. مىنە, قىسقاشا بايانداساق, 30 جاستاعى جەرلەسىمىزدىڭ ءجۇرىپ وتكەن جولى وسىنداي.
ەكىنشى ورىندى IBF نۇسقاسىنىڭ چەمپيونى ۆينچەنتسو گۋالتەري يەلەنۋدە. ونىڭ دا جاسى – 30-دا. گەرمانيانىڭ وكىلى 22 كەزدەسۋدىڭ 21-ىندە جەڭىس تويىن تويلادى. جەتى جەكپە-جەكتى مەرزىمىنەن بۇرىن اياقتادى. تاعى ءبىر باسەكە تەڭ اياقتالدى. بيىل جازدا ول وليمپيادا چەمپيونى ەسكيۆو فالكاونى ۇپاي سانىمەن ۇتىپ, التىن بەلبەۋدى بەلىنە تاقتى. 14 قاراشادا ءدال وسى گۋالتەري ءبىزدىڭ جانىبەكپەن كۇش سىناسادى. قوس ساڭلاقتىڭ ەكى بىردەي چەمپيوندىق اتاق ءۇشىن تارتىسى اقش-تىڭ تەحاس شتاتىنداعى روزەنبەرگ قالاسىندا وتەدى.
سونداي-اق توپ-10 بوكسشىنىڭ قاتارىنا كارلوس ادامەك (دومينيكان رەسپۋبليكاسى), كريس يۋبەنك, ليام سميت, فەليكس كەش (بارلىعى دا – ۇلىبريتانيادان), يسرايل مادريموۆ (وزبەكستان), وستين ۋيليامس (اقش) جانە مايكل زەرافا (اۋستراليا) ەنىپ وتىر. ال ۇزدىك وندىقتى مەيىرىم نۇرسۇلتانوۆ تۇيىندەۋدە. ءوزىنىڭ تۋعان اعاسى, 2013 جىلعى الەم جانە ازيا چەمپيونى مەرەي اقشالوۆقا ەلىكتەپ, بىلعارى قولعاپتى قولىنا كيگەن ول 2016 جىلدان بەرى كاسىپقوي رينگتە ونەر كورسەتىپ ءجۇر. سول ارالىقتا 30 جاستاعى سەمەي ءوڭىرىنىڭ تۋماسى 18 رەت رينگكە كوتەرىلىپ, بارلىق باسەكەسىندە باسىمدىق تانىتتى. 10 قارسىلاسىن نوكاۋتقا جىبەردى.