15 قىركۇيەكتە كاليفورنيا شتاتىنىڭ سان-فرانتسيسكو قالاسىندا Silkroad Innovation Hub-تىڭ رەسمي اشىلۋى ءوتتى, دەپ حابارلايدى Egemen.kz.
Silkroad Innovation Hub - ورتالىق ەۋرازيانى كرەمني القابىنداعى ءبىرتۇتاس ايماق رەتىندە ىلگەرىلەتۋگە, سونداي-اق, IT-كاسىپكەرلىك سالاسىنداعى ىنتىماقتاستىققا جانە فاۋندەرلەردىڭ مىقتى قاۋىمداستىعىن قۇرۋعا جاردەمدەسۋگە باعىتتالعان جەكە باستاما.
Silkroad Innovation Hub ايماقتاعى IT-كاسىپقويلار, كاسىپكەرلەر جانە يننوۆاتورلار اراسىندا جەلىلىك, ءبىلىم الماسۋ جانە سەرىكتەستىكتەردى دامىتۋدىڭ باستى پلاتفورماسى رەتىندە قىزمەت ەتەدى.
حابتىڭ رەسمي اشىلۋىنا ورتالىق ەۋرازيا ەلدەرىنىڭ رەسمي تۇلعالارى مەن ديپلوماتتارى قاتىستى.
ءىس-شارادا قازاقستان رەسپۋبليكاسىنىڭ تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين ءسوز سويلەدى. مينيستر ءوز سوزىندە حاب ورتالىق ازيادان جاڭا ستارتاپ جوبالاردى تارتۋ نۇكتەسىنە اينالاتىنىن جانە تۇركى ەلدەرىنىڭ تسيفرلىق شەشىمدەردى قولدانۋ ايماعىن كەڭەيتۋگە باعىتتالعان كۇش-جىگەرىن بىرىكتىرەتىنىن اتاپ ءوتتى.
«قازاقستان پرەزيدەنتى قاسىم-جومارت كەمەل ۇلى توقاەۆ جۋىردا دۋشانبەدە سويلەگەن سوزىندە قازاقستان تسيفرلاندىرۋ سىندى ستراتەگيالىق ماڭىزدى سالادا ءوزىنىڭ جاقىن كورشىلەرىمەن ىنتىماقتاستىعىن بارىنشا نىعايتۋدى قولدايتىنىن اتاپ ءوتتى. ال بۇگىنگى ءىس-شارا ءسوزسىز, وسى باعىتتاعى ماڭىزدى قادامداردىڭ ءبىرى بولىپ وتىر. Silkroad Innovation Hub جەكە برەندكە اينالاتىنىنا جانە كرەمني القابىندا ءوزىنىڭ لايىقتى ورنىن يەلەنەتىنىنە سەنىمدىمىن», دەپ اتاپ ءوتتى مينيستر.
اشىلۋ سالتاناتىندا تمۇ باس حاتشىسى كۋبانىچبەك ومۋراليەۆ, وزبەكستاننىڭ IT Park-ءىنىڭ ءبىرىنشى ورىنباسارى ابدۋلاحات كۋچكاروۆ, سونداي-اق تمۇ-عا مۇشە ەلدەردىڭ تسيفرلاندىرۋ مينيسترلىكتەرىنىڭ 10-نان استام وكىلى مەن رەسمي تۇلعالار ونلاين قاتىسىپ, ءسوز سويلەدى.
سونىمەن قاتار IT-يندۋسترياعا قولداۋ كورسەتۋ شەڭبەرىندە قازاقستاننىڭ تسيفرلىق دامۋ مينيسترلىگى استانا-حاب جانە Silkroad innovation hub-پەن بىرلەسىپ, ورتالىق ازيانىڭ ستارتاپ-جوبالارىنىڭ TechCrunc الەمدىك كورمەسىنە قاتىسۋىن ۇيىمداستىردى. وسىنداي جوعارى دەڭگەيدەگى فورۋمدا العاش رەت وا IT يندۋسترياسىن دامىتۋ بويىنشا پانەلدىك سەسسيا ءوتتى.
كرەمني القابىنداعى Silkroad Innovation Hub جوباسىن ۇيىمداستىرۋشىلار ورتالىق ەۋرازيا ستارتاپتارىن يننوۆاتسيالىق قوعامداستىققا قوسىلۋعا جانە پەرسپەكتيۆالى تەحنولوگيالىق جوبالاردى قۇرۋ جانە دامىتۋ ءۇشىن ۇسىنىلعان مۇمكىندىكتەردى پايدالانۋعا شاقىرادى. ولار ءوز كۇش-جىگەرىن بىرىكتىرە وتىرىپ, الداعى 5-7 جىلدا ۇلكەن ناتيجەلەرگە قول جەتكىزە الادى: 5 يۋنيكورن, ستارتاپتارعا $300 ملن ينۆەستيتسيا جانە وڭىردەن IT-قىزمەت ەكسپورتىنا 1,5 ملرد.
TechCrunch Disrupt 2023 اياسىندا «The New Digital Silk Road: From Central Eurasia to Silicon Valley» پانەلدىك سەسسياسى ۇيىمداستىرىلدى, وندا قازاقستاننىڭ تسيفرلىق دامۋ, يننوۆاتسيالار جانە اەروعارىش ونەركاسىبى ۆيتسە-ءمينيسترى اسقار جامباكين, IT Park Uzbekistan اتقارۋشى ديرەكتورى ابدۋلاحاد كۋچكاروۆ, IDDA توراعاسىنىڭ مىندەتىن اتقارۋشى ينارا ۆاليەۆا سپيكەرلەر رەتىندە قاتىستى.
19-21 قىركۇيەك ارالىعىندا اقش-تىڭ سان-فرانتسيسكو قالاسىندا (كاليفورنيا شتاتى) وتەتىن ەڭ اۋقىمدى TechCrunch Disrupt 2023 حالىقارالىق كونفەرەنتسياسى ارقىلى قازاقستان, قىرعىزستان, وزبەكستان, تاجىكستان جانە موڭعوليانى قوسا العاندا, ورتالىق ەۋرازيا ستارتاپتارى ءۇشىن تاريحتىڭ جاڭا پاراعى اشىلدى.
TechCrunch Disrupt الاڭىندا Silkroad Innovation Hub يننوۆاتسيالىق ورتالىعى كرەمني القابىنداعى ينۆەستورلارعا ەكسكليۋزيۆتى پاۆيلون ۇسىندى, وندا ورتالىق ەۋرازيادان كەلگەن 14 ستارتاپ وزدەرىن جاھاندىق ارەنادا تانىتۋعا مۇمكىندىك الدى. ولاردىڭ ىشىندە التاۋى — قازاقستاندىق. ولار — Citix, Cyborgbase, TengriLights, Falcon.ai, Kscooter جانە Rhinotales.
سونداي-اق TechCrunch Disrupt 2023 شەڭبەرىندە ءينسۋلتتى اۆتوماتتاندىرىلعان دياگنوستيكالاۋ ءۇشىن جاساندى ينتەللەكت جانە نەيروراديولوگيا سالاسىندا ماماندانعان CerebraAI قازاقستاندىق ستارتاپى الەمدەگى ەڭ اۋقىمدى Startup battlefield 200 ستارتاپ كونكۋرسىنا قاتىسادى.
ءوز ايماقتارىنىڭ ايرىقشا الەۋەتى مەن الۋاندىعىن موڭعوليا, قىرعىزستان, تاجىكستان جانە وزبەكستاننان كەلگەن oblako.me, Wiot, Doki, Zypl.ai, MyID, IMAN, Mohirdev جانە Workly سىندى ستارتاپتار ايقىن كورسەتتى. ءىس-شارادا ۇسىنىلعان ستارتاپتاردىڭ باسىم بولىگى — Astana Hub اكسەلەراتسيالىق باعدارلامالارىنىڭ تۇلەكتەرى. قازىرگى تاڭدا ولار الەمدىك نارىقتاردا ءوز جوبالارىنىڭ اياسىن كەڭەيتىپ جاتىر.