قۇرلىقتىق حوككەي ليگاسىنىڭ (قحل) بيىلعى ماۋسىمىن ءساتسىز باستاپ, قاتارىنان بەس باسەكەدە ۇتىلعان استانانىڭ «بارىسى» سوڭعى ەكى ويىندا ءوز كورەرمەندەرىن قۋانتتى.
وسىدان بىرەر كۇن بۇرىن عانا ۆلاديۆوستوكتىڭ «ادميرالىن» اۋپىرىمدەپ ءجۇرىپ جەڭسە, بۇل جولى نيجنەكامسكىنىڭ «نەفتەحيميگىن» ويسىراتا ۇتتى. اتالعان ماتچ باستالعان بەتتە دجوزەف لا بەيت ەسەپ اشسا, 4-مينۋتتا نەلسون نوجە ەكىنشى گولدى سوقتى. ودان كەيىن جارتى ساعاتتان اسا ۋاقىت بويى قوس كوماندا ءبىر-ءبىرىنىڭ قاقپا كىلتىن تابا المادى. تەك 37 مينۋتتان كەيىن ويىن قايتا قىزدى. ەكىنشى كەزەڭنىڭ سوڭىندا رايلي بايبەر ەسەپتى 3:0-گە جەتكىزدى. ۇزىلىستەن كەيىن پونتۋس وبەرگ پەن لا بەيت ءدۋبلدىڭ اۆتورى اتانسا, ۆسەۆولود لوگۆين مەن دىنمۇحامەد كايىرجان ءبىر-ءبىر رەتتەن مەرگەندىك تانىتتى. قورىتىندى ەسەپ – 8:0.
وسى جارقىن جەڭىسىنىڭ ارقاسىندا «بارىس» تۇراقتى بىرىنشىلىكتىڭ جارىس كەستەسىندە 16-ورىنعا كوتەرىلدى. ولاردىڭ قورجىنىندا 7 ۇپاي بار. ەندى جەرلەستەرىمىز 21 قىركۇيەكتە ماسكەۋدە جەرگىلىكتى «سپارتاكپەن» وينايدى.