بىلتىردان بەرى قورعانىس مينيسترلىگى اسكەري بورىشىن وتەگەن ازاماتتارعا ءبىلىم بەرۋ جەڭىلدىكتەرىن ۇسىنۋ ارقىلى جاستاردىڭ اسكەري قىزمەتكە دەگەن ىنتاسىن ارتتىرىپ كەلەدى. جوبا ءوزىن اقتاي باستادى. بۇگىندە جوعارى وقۋ ورنىنا ۇبت تاپسىرماي ءتۇسۋ مۇمكىندىگىن 604 وتانداسىمىز پايدالانعان.
ماسەلەن, ءال-فارابي اتىنداعى قازاق ۇلتتىق ۋنيۆەرسيتەتىنە – 19, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنە – 17, م.اۋەزوۆ اتىنداعى وڭتۇستىك قازاقستان ۋنيۆەرسيتەتىنە – 15, س.تورايعىروۆ ۋنيۆەرسيتەتىنە 10 ازامات تەگىن وقۋعا ءتۇستى. اقىلى نەگىزدەگى ۇبت-نى ەسەپكە الماعاندا ا.مىرزاحمەتوۆ اتىنداعى كوكشەتاۋ ۋنيۆەرسيتەتىنە – 73, س.تورايعىروۆ ۋنيۆەرسيتەتىنە – 45, ش.مۇرتازا اتىنداعى تاراز حالىقارالىق يننوۆاتسيالىق ينستيتۋتىنا – 51, قورقىت اتا اتىنداعى قىزىلوردا ۋنيۆەرسيتەتىنە 35 ادام وقۋعا قابىلداندى. وسىلاردى ەسكەرە كەلە, قورعانىس مينيسترلىگى ستۋدەنتتەردىڭ بۇل ساناتىن جاتاقحانامەن جانە شاكىرتاقىمەن قامتاماسىز ەتە وتىرىپ, گرانتتار بەرۋ ۇدەرىسىن زاڭنامالىق رەتتەۋ جۇمىستارىن جۇرگىزىپ جاتىر.
ەسكە سالا كەتەيىك, اسكەري قىزمەتشىلەردى تەگىن وقىتۋعا ىرىكتەۋ قورعانىس مينيسترلىگىنىڭ پورتالىندا ورنالاسقان «سروچنيكي 2.0» اقپاراتتىق جۇيەسى ارقىلى جۇرگىزىلەدى. قازىرگى ۋاقىتتا بۇل رەسۋرستا 38 316 مەرزىمدى قىزمەت ساربازى تىركەلگەن. 2022 جىلدىڭ كۇزىندە اسكەرگە شاقىرىلعان 13 805 اسكەري قىزمەتشىنىڭ باعالاۋ كورسەتكىشتەرىن ەنگىزۋ بويىنشا جوسپارلى جۇمىس جۇرگىزىلىپ جاتىر. ولار ءۇشىن كۆوتالاردى ءبولۋ بيىلعى جىلدىڭ قازان-قاراشا ايلارىنا جوسپارلانعان. سونىمەن بىرگە 2023 جىلدىڭ كوكتەمىندە اسكەرگە شاقىرىلعان ساربازداردى دا تىركەۋ ءجۇرىپ جاتىر. قازىرگى ۋاقىتتا 11 948 ادام تىركەلگەن.
مينيسترلىك جوبانى ودان ءارى تانىمال ەتۋگە دەن قويىپ وتىر. سوندىقتان جاستاردىڭ جەكە جوسپارلارى مەن ارميانىڭ ولاردىڭ جەكە تۇلعا بولىپ قالىپتاسۋىنداعى ءرولى تۋرالى بەينەروليكتەر دايىندالعان.
جوبانىڭ يگىلىگىن كورگەن جاستاردىڭ قاتارىندا Astana IT University-ءنىڭ 1-كۋرس ستۋدەنتتەرى ايدار ناۋشا, ءامىر قايىروۆ جانە ادىلەت قۇداشەۆ تا بار. ولار جوعارى وقۋ ورىندارىندا تەگىن ءبىلىم الۋ سەرتيفيكاتتارىن يەلەنگەن. ايدار ناۋشا قارۋلى كۇشتەردىڭ اۋە شابۋىلىنا قارسى قورعانىس اسكەرىندە قىزمەت ەتتى. قازىرگى ۋاقىتتا «مەديا-تەحنولوگيالار» باعىتى بويىنشا ءبىلىم الىپ جاتىر. «وقۋعا تۇسكەندەردىڭ ءتىزىمى جاريالانعان كەزدە ءتۇن ورتاسىندا وتباسىمدى تەگىس وياتىپ, قۋانىشىممەن ءبولىستىم. اسكەردەگى ۋاقىت بوسقا وتكەن جوق. دەنە دايىندىعى جانە رۋحاني جاعىنان دامىدىم دەپ ايتا الامىن. مەن قارۋلى كۇشتەر قاتارىنا جاۋىنگەر بولىپ قابىلدانىپ, ۇيگە ەفرەيتور دارەجەسىندە ورالدىم. ەندى ۋنيۆەرسيتەتتە لەيتەنانت اتاعىن الۋدى جوسپارلاپ وتىرمىن», دەيدى ول.
ۋنيۆەرسيتەت بازاسىنداعى اسكەري كافەدرا ەلدىڭ جۇمىلدىرۋ رەزەرۆىن تولىقتىرۋ ءۇشىن زاپاستاعى وفيتسەرلەر مەن سەرجانتتاردى دايارلايدى. وقۋ كەزىندە ۇشەۋى دە اسكەري كافەدرادا وقىپ, زاپاستاعى وفيتسەر بولۋعا نيەتتى.
قازىرگى ۋاقىتتا قورعانىس مينيسترلىگىنەن باسقا بۇل جوباعا ۇلتتىق ۇلان مەن مەملەكەتتىك كۇزەت قىزمەتى دە قاتىسادى. كەلەشەكتە ۇلتتىق قاۋىپسىزدىك كوميتەتىنىڭ شەكارا قىزمەتى مەن توتەنشە جاعدايلار مينيسترلىگى دە جۇيەگە قوسىلماق.