ەلوردادا «جاسىل استانا» ەكولوگيالىق ايلىعى اياسىندا جالپىقالالىق سەنبىلىك ءوتىپ جاتىر. استانانىڭ تازالىعىنا 56 مىڭنان استام قالا تۇرعىنى شىقتى, دەپ حابارلايدى Egemen.kz قالا اكىمدىگىنىڭ رەسمي سايتىنا سىلتەمە جاساپ.
ەلوردادا 16 قىركۇيەكتەن 14 قازانعا دەيىن «جاسىل استانا» ءداستۇرلى ەكولوگيالىق ايلىعى وتەدى. وسى جۇمىس اياسىندا قالالىق قىزمەتتەردى, ەڭبەك ۇجىمدارىن جانە بەلسەندى قالا تۇرعىندارىن جۇمىلدىرا وتىرىپ, بىرنەشە كوممۋنالدىق جانە جالپىقالالىق سەنبىلىك وتكىزىلەدى.
بۇگىن ساعات 09:00-دەن باستاۋ العان جالپىقالالىق سەنبىلىككە ءىرى, ورتا جانە شاعىن بيزنەس وكىلدەرى دە قاتىستى. 200-دەن استام كومپانيانىڭ قىزمەتكەرلەرى, قالانىڭ تازالىعىنا بەي-جاي قارامايتىن تۇرعىندار ءوز ۇيىمدارى مەن كەڭسەلەرىنىڭ جانىنداعى اۋماقتى تازارتتى.
14 قازانعا دەيىن جالعاساتىن سەنبىلىكتەردە ەلوردا اۋماعىن سانيتارلىق تازارتۋ, اباتتاندىرۋ جانە كوگالداندىرۋ وتكىزىلەدى.
قالا تۇرعىندارى ساعات 12:00-گە دەيىن 110 تونناعا جۋىق قوقىس شىعاردى. سول سياقتى 1200-گە جۋىق جاسىل جەلەك وتىرعىزدى. وتىرعىزىلعان جاسىل جەلەكتەردىڭ اراسىندا قاراعاش, ۇيەڭكى, قاراعاي, بۇتالار بار.