قازاقستاندا 2023-2025 جىلدارعا ارنالعان كەشەندى جوسپار اياسىندا بالالاردى زورلىق-زومبىلىقتان قورعاۋ, ءسۋيتسيدتىڭ الدىن الۋ, ولاردىڭ قۇقىقتارى مەن سالاماتتىلىعىن قامتاماسىز ەتۋ بويىنشا جاڭا شارالار جۇزەگە اسىرىلادى. پرەمەر-مينيستر ءاليحان سمايىلوۆ ءتيىستى قاۋلىعا قول قويدى.
قۇجات مەملەكەت باسشىسىنىڭ 2022 جىلدىڭ جازىندا وتكەن ۇكىمەتتىڭ كەڭەيتىلگەن وتىرىسىندا بەرگەن تاپسىرماسىن ورىنداۋ ماقساتىندا ازىرلەندى. جوسپار شەڭبەرىندە وبلىستار, اۋداندار جانە قالالار بويىنشا تاۋەكەلدەردىڭ ينتەراكتيۆتى كارتاسى جاسالىپ, بالالار اراسىنداعى قۇقىق بۇزۋشىلىقتار, زورلىق-زومبىلىق جانە قورلاۋ فاكتىلەرى, ساباققا كەلمەۋ جانە ت.ب. تۋرالى وزەكتى اقپارات كورسەتىلەدى. بۇل «داعدارىستى باسقارۋ» ءادىسىن قولدانا وتىرىپ, ساپالى مونيتورينگ جۇرگىزۋگە جانە شۇعىل كومەك كورسەتۋگە كومەكتەسەدى.
سونىمەن قاتار فينليانديا تاجىريبەسى نەگىزىندە ءبىلىم بەرۋ ۇيىمدارى ءۇشىن ونلاين ساۋالدامالار, تاقىرىپتىق ساباقتار, اڭگىمەلەسۋ جانە ساباقتان تىس ءىس-شارالار وتكىزۋدى كوزدەيتىن بۋللينگكە قارسى باعدارلاما ازىرلەۋ جوسپارلانىپ وتىر. سونداي-اق زورلىق-زومبىلىققا, قورقىتۋعا نە كيبەربۋللينگكە ۇشىراعان نەمەسە كۋا بولعان كامەلەتكە تولماعانداردى ەرتە انىقتاۋ جانە ولارعا كومەك كورسەتۋ ادىستەمەسى بەكىتىلەدى.
بۇدان بولەك, كەيس-مەنەدجمەنت تەتىگىن قولدانۋ ارقىلى مەكتەپىشىلىك ەسەپكە الۋدى جۇرگىزۋ تاسىلدەرى وزگەرتىلەتىن بولادى. بۇل داعدارىس جاعدايىن انىقتاۋدان باستاپ جەكە جۇمىس جوسپارىن قۇرۋ جانە جاۋاپتى مۇعالىمدەردى بەكىتۋ ارقىلى ماسەلەنى تولىعىمەن شەشۋگە دەيىنگى شارالاردى قابىلداۋدى قامتيدى.
قۇجاتتى جۇزەگە اسىرۋ اياسىندا بالالارعا ارنالعان «BalaQorgau» بىرىڭعاي بايلانىس ورتالىعىن قۇرۋ, مەكتەپكە دەيىنگى, ورتا, كاسىپتىك جانە تەحنيكالىق ءبىلىم بەرۋ ۇيىمدارىندا جەكە قاۋىپسىزدىك ساباقتارىن ەنگىزۋ, سونداي-اق بالالارعا ارنالعان قاۋىپسىز كونتەنتتى قالىپتاستىرۋ ءۇشىن ەلىمىزدەگى TikTok, Instagram, Facebook, ۆكونتاكتە جانە YouTube پلاتفورمالارىنىڭ وكىلدەرىمەن جۇمىس جۇرگىزۋ جوسپارلانىپ وتىر.
سونىمەن قاتار كەشەندى جوسپاردا تۇرمىسى تومەن وتباسىلارعا كومەك كورسەتۋ, ايماقتىق پسيحولوگيالىق قولداۋ ورتالىقتارىن قۇرۋ, پەداگوگ-پسيحولوگتەر مەن الەۋمەتتىك پەداگوگتەردىڭ سانىن كوبەيتۋ, پەداگوگ-پسيحولوگتەردىڭ سىنىپپەن قوسىمشا جۇمىس ۋاقىتىن ەنگىزۋ جانە جالپى ولاردىڭ جۇمىسىن تسيفرلاندىرۋ بويىنشا شارالار قاراستىرىلعان.
مۇنىمەن قاتار اتا-انا مەن بالا اراسىنداعى قارىم-قاتىناستى نىعايتۋ, مادەني تاربيە بەرۋ جانە بالالار مەن جاسوسپىرىمدەردىڭ شىعارماشىلىق الەۋەتىن جۇزەگە اسىرۋ, بالالار سپورتىن دامىتۋ جانە كامەلەتكە تولماعانداردى قوسىمشا بىلىممەن كەڭىنەن قامتۋ شارالارى قابىلدانادى.
كەشەندى جوسپاردى ىسكە اسىرۋ ناتيجەسىندە كامەلەتكە تولماعاندار اراسىنداعى جانە ولارعا قاتىستى قۇقىق بۇزۋشىلىقتار, سونداي-اق ءوز-وزىنە قول جۇمساۋ فاكتىلەرى مەن ارەكەتتەرى ايتارلىقتاي تومەندەيدى دەپ كۇتىلۋدە. بۇل رەتتە بالالاردى قورعاۋ جانە ولاردىڭ بوس ۋاقىتىن قامتۋ دەڭگەيى ارتادى.
جوسپاردى ىسكە اسىرۋ بارىسىندا رەسپۋبليكادا قوسىمشا 1 000 پەداگوگ-پسيحولوگ پەن 2 000 الەۋمەتتىك پەداگوگ دايارلانادى. سونىمەن قاتار بالالاردىڭ قۇقىقتارىن قورعاۋ سالاسىندا جۇمىس ىستەيتىن, بىلىكتىلىگىن ارتتىرۋ شارالارىمەن قامتىلعان پەداگوگتەردىڭ ۇلەسى جىل سايىن 33%-عا ارتادى.