«استانا-ارەنا» ستاديونىنا جينالعان جانكۇيەرلەر فۋتبولدان قازاقستان قۇراماسى مەن سولتۇستىك يرلانديا كومانداسى اراسىنداعى ماتچتان كەيىن تريبۋناداعى قوقىستىڭ ءبىرىن قالدىرماي جيناپ كەتتى. وسىلايشا, ويىندى تاماشالاۋعا كەلگەن ءبىر توپ ەرىكتى مەن جانكۇيەردىڭ يگى ءىسى ەلدى ءسۇيسىندىردى.
وتكەن اپتادا ەلدە فۋتبولدان «ەۋرو-2024» ىرىكتەۋى اياسىندا ەكى كەزدەسۋ ءوتتى. وندا قازاقستان قۇراماسى فينليانديادان مينيمالدى ەسەپپەن جەڭىلگەن-ءدى. ال جاسىل الاڭداعى تاعى ءبىر كەزدەسۋدە ۇلتتىق قۇراما 1:0 ەسەبىمەن سولتۇستىك يرلانديا كومانداسىن ۇتتى. وسى تاريحي جەڭىستەن كەيىن وتاندىق جانكۇيەرلەر مەن ءبىر توپ ەرىكتى وزدەرىنىڭ مادەنيەتتىلىگىن كورسەتىپ, ويىن وتكەن ستاديوندى قوقىستان تازارتىپ كەتتى. وتاندىق جانكۇيەرلەردىڭ بۇل ارەكەتىنە الەۋمەتتىك جەلىدەگى كوپشىلىك تاڭدانا قارادى. ويتكەنى بۇل ءىس فۋتبولسۇيەر قاۋىمنىڭ بەلسەندىلىگى عانا ەمەس, سانالىلىعى مەن اۋىزبىرشىلىگىن كورسەتتى.
«ماتچتان كەيىن ستاديوندى قوقىستان تازارتۋ – قالا جاستارىنىڭ, «استانا جاستارى» جاستار رەسۋرستىق ورتالىعى ۆولونتەرلەرىنىڭ جانە قالالىق ۆولونتەرلەر شتابىنىڭ باستاماسى. مۇنى پرەزيدەنتتىڭ ءوزى قولداعانى قۋانتادى. وسى ءىس-شاراعا 500-گە جۋىق ەرىكتى قاتىستى. بۇل ءبىر رەتتىك قانا ەمەس, جىل بويىنا جاسالىپ كەلە جاتقان جۇمىستار. ارينە, بۇل – ەڭ الدىمەن تازالىقتىڭ كەپىلى. سودان كەيىن قوعام اراسىندا تازالىقتى ساقتاۋ مادەنيەتىن دارىپتەۋ بولىپ سانالادى. اسىرەسە تازالىق ساقتاۋدى جاستاردىڭ بويىنا داعدى رەتىندە قالىپتاستىرۋعا ۇگىتتەيدى», دەدى ۆولونتەر ايزات ابيبوللاقىزى.
قورشاعان ورتاعا جاۋاپكەرشىلىك الەم حالىقتارىنىڭ ىشىندە جاپوندىقتاردىڭ بويىنا جاقسى سىڭگەن. ولار قاي ماتچقا قاتىسپاسىن, سپورتتىق ءىس-شارا اياقتالعان سوڭ قالتالارىنان قوقىس پاكەتتەرىن شىعارىپ, جان-جاعىن جيناپ كەتەدى. بۇل ولاردىڭ زاڭىندا جازىلماسا دا, دىلىندە مىقتاپ ساقتالعان. بىزدەگى ەرىكتىلەردىڭ جەتكىزگىسى كەلگەنى دە وسى.
ايتا كەتەيىك, جالپى «استانا جاستارى» جاستار رەسۋرستىق ورتالىعى بيىل سەنبىلىكتەر, اعاش وتىرعىزۋ, وزەندەردەگى قوقىستى جيناۋ, قىس مەزگىلىندە اۋلالاردى قاردان تازارتۋ سىندى 50-دەن استام ءىس-شارا وتكىزگەن. جىل سوڭىنا دەيىن ەكوباعىت بويىنشا تاعى 15-ءىن ۇيىمداستىرۋدى كوزدەپ وتىر.