قالا كۇنى قارساڭىندا الماتىلىق ەكى مىڭنان اسا جوعارى سىنىپ وقۋشىلارى ءبىر مەزەتتە توعىزقۇمالاق ويناپ, قازاقستاننىڭ گيننەس رەكوردتار كىتابىنا ەندى. ايتۋلى مەرەكەنى شاھار اكىمدىگىنىڭ قولداۋىمەن توعىزقۇمالاق قاۋىمداستىعى ۇيىمداستىردى.
وي ۇتقىرلىعىن ۇشتاپ, تاباندىلىققا تاربيەلەيتىن توعىزقۇمالاق ويىنى قالا مەكتەپتەرىندە وقۋشىلاردىڭ ۇزدىك ۇيىرمەسىنە اينالعان. ويىندى جەتىك مەڭگەرگەن جەتكىنشەكتەر رەسپۋبليكالىق سايىستاردا جۇلدە الىپ ءجۇر. الماتى قالاسى ءبىلىم باسقارماسىنىڭ باسشىسى ءلاززات جىلقىباەۆا مىڭداعان شاكىرتتى ءبىر الاڭدا جيناعان ايرىقشا جوبا قاتىسۋشىلارىنا ساتتىلىك تىلەپ, ويىندى سالتاناتتى تۇردە اشىپ بەردى. كىلەمشە ۇستىنە جايعاسقان توعىزقۇمالاقشىلار بىرنەشە ساعات بويى تاپجىلماي وتىرىپ وزدەرىنىڭ سۇيىكتى وينىن وينادى.
«توعىزقۇمالاق ۇيىرمەسىنە قاتىسقانىما ەكى جىل بولدى. ۇيىرمەدە دوستارىممەن, دەمالىس كۇندەرى اكەممەن توعىزقۇمالاق وينايمىن. ال مىڭداعان ادام جينالىپ ويناعان تىپتەن قىزىق ەكەن. بۇگىنگى جوباعا قاتىسقانىما قۋانىشتىمىن», دەيدى 10 سىنىپ وقۋشىسى دانا ءسالىم.
جاس رەكوردشىلارعا ءسات ساپار تىلەگەن دۇنيەجۇزىلىك جانە رەسپۋبليكالىق توعىزقۇمالاق فەدەراتسياسىنىڭ پرەزيدەنتى ءاليحان بايمەنوۆ الماتى قالاسى توعىزقۇمالاق زياتكەرلىك ويىنىنىڭ ورتالىعى بولىپ تاڭدالعانىن, ۇلتتىق ويىندى الەمدىك دەڭگەيدە دامىتۋ باعىتىندا اۋقىمدى باستامالار قولعا الىنعانىن جەتكىزدى. اتاپ وتسەك, 2020 جىلى توعىزقۇمالاق يۋنەسكو شەشىمىمەن ادامزاتتىڭ مادەني مۇرالار تىزىمىنە ەنگەن بولاتىن.
الماتى