اۋىل حالقى ءۇشىن ەمحانا ەسىگىنىڭ اشىق تۇرۋى داتكە قۋات سانالادى. تۇرعىلىقتى حالىقتىڭ دەنساۋلىعىن قاداعالاپ, اۋىرىپ-سىرقاعانعا دەر كەزىندە دارىگەرلىك كومەك قولىن سوزاتىن دا – مەديتسينا ماماندارى.
حالىق سانى ەكى مىڭعا جۋىقتايتىن اقاي نۇسىپبەكوۆ اتىنداعى اۋىلدا بىلتىر جاڭا دارىگەرلىك امبۋلاتوريانىڭ قۇرىلىس جۇمىستارى باستالعان ەدى. جالپى اۋماعى 320 شارشى مەتر عيماراتتىڭ قۇرىلىس جۇمىسىن جۇرگىزگەن مەردىگەر «الاۋ» جشس نىساندى وسى جىلدىڭ تامىز ايىنىڭ سوڭىندا پايدالانۋعا بەرۋدى جوسپارلاعان. ۋادە ورىندالىپ, كونستيتۋتسيا كۇنى قارساڭىندا ساپالى ەتىپ سالىنعان اۋىلدىق امبۋلاتوريانىڭ اشىلۋ ءراسىمى سالتاناتتى تۇردە ءوتتى.
بۇل قۋانىشتى ءىس-شاراعا اۋىلدىڭ ەڭبەكتەگەن بالاسىنان ەڭكەيگەن قارتىنا دەيىن قاتىسىپ, بىتەر ءىستىڭ باسى-قاسىندا جۇرگەن ىسكەر ازاماتتارعا قوشەمەت كورسەتتى. جاقسىنى كورمەككە كەلگەن اۋىل جۇرتشىلىعىن كەگەن اۋدانىنىڭ اكىمى نۇرباقىت تەڭىزباەۆ قۇتتىقتاپ, دەندەرىنە ساۋلىق, وتباسىلارىنا اماندىق تىلەدى. سونداي-اق مەديتسينا ماماندارىنىڭ ءوز ىستەرىنە ىجداعاتتى بولۋىن تاپسىردى.
اۋىل كوركىن كىرگىزگەن جاڭا امبۋلاتوريا شتاتىندا 2 دارىگەر, 5 ورتا بۋىن, 2 كىشى بۋىن, 2 تەحنيكالىق قىزمەتكەر جۇمىسىن باستاپ كەتتى. مەديتسينالىق مەكەمە ستوماتولوگيالىق قۇرىلعىمەن, زەرتحانالىق, فيزيوتەراپيالىق جانە ەكگ اپپاراتتارىمەن جابدىقتالعان. ەمدەۋ ورنىندا امبۋلاتوريالىق قىزمەتتەن بولەك جاراقات تاڭۋ پۋنكتىن, شۇعىل مەديتسينالىق كومەك كورسەتۋ كابينەتتەرىن اشۋ جوسپارلانىپ وتىر.
كەيىنگى ءۇش جىلدا اۋداندىق اۋرۋحانا عيماراتى, جالاڭاش, توعىزبۇلاق دارىگەرلىك امبۋلاتوريالارى كۇردەلى جوندەۋدەن وتسە, تاساشى دارىگەرلىك امبۋلاتورياسىنا اعىمداعى جوندەۋ جۇمىسى جۇرگىزىلدى. العاباس دارىگەرلىك امبۋلاتورياسى عيماراتىنىڭ كۇردەلى جوندەۋ جۇمىستارى اياقتالۋعا جاقىن. سونىمەن قاتار بولەكساز, تۇيىق, شىبىشى, جالاۋلى اۋىلدارىندا بلوكتى ءمودۋلدى عيماراتتان ەمدەۋ مەكەمەلەرى بوي كوتەرىپ, ەل يگىلىگىنە بەرىلدى.
مەملەكەت باسشىسىنىڭ جارلىعى بويىنشا جاڭعىرتۋ نەگىزىندە جىلىساي, جايداقبۇلاق, قارابۇلاق, كۇرمەتى, تالدى, جاڭاتالاپ سەكىلدى ەلدى مەكەندەرگە جاڭا عيماراتتار سالۋ جوسپارلانۋدا, بۇل جۇمىستار بيىل باستالادى.
«دەنساۋلىق – زور بايلىق», دەپ بەكەر ايتپاسا كەرەك. ادام دەنساۋلىعى قوعامنىڭ ەڭ مىزعىماس بەرىك قامالى دەسەك بولادى. وسى جولدا اق جەلەڭدى ابزال جاندار ايانباي ەڭبەك ەتەدى دەگەن سەنىم مول. پايدالانۋعا بەرىلگەن اقاي نۇسىپبەكوۆ اۋىلىنداعى دارىگەرلىك امبۋلاتوريانىڭ ەل ەرتەڭىنە بەرەرى زور. اۋىل تۇرعىندارى ءۇشىن دە دەنساۋلىق ساقتاۋ نىسانىنىڭ جاڭالانىپ, زامانعا ساي جاساقتالۋى ۇلكەن ولجامەن تەڭ ەكەنىندە داۋ جوق», دەيدى اۋداندىق اۋرۋحانانىڭ ديرەكتورى الماس تىلەۋليەۆ.
القىزىل لەنتاسى قيىلىپ, شاشۋ شاشىلعان ءىس-شارادا اۋىلدىڭ اقساقالدار القاسىنىڭ توراعاسى سەرىك ۇزاقوۆ اق باتاسىن بەردى. جيىن سوڭىندا ءوز ىسىندە تاباندىلىق تانىتىپ كەلە جاتقان بىرقاتار مەديتسينا مامانى اۋدان اكىمىنىڭ العىسحاتىمەن ماراپاتتالدى.
الماتى وبلىسى,
كەگەن اۋدانى