مەملەكەت باسشىسى قاسىم-جومارت توقاەۆتىڭ قازاقستان حالقىنا بيىلعى جولداۋىنان تۇيگەنىمىز كوپ. ۋشىعىپ تۇرعان الەمدەگى گەوساياسي جاعداي ەكونوميكامىزعا دا سالقىنىن تيگىزىپ تۇرعانى انىق. وسى الماعايىپ كەزەڭدە تۇراقتى دامۋدىڭ جولىن تابۋ قيىننىڭ قيىنى.
جولداۋدان مەملەكەتىمىزدىڭ كەيبىر وسال تۇستارىن قالاي بەكىتەمىز, حالىقتىڭ كوكەيىندەگى تۇيتكىلدەردى قايتسەك تارقاتامىز دەگەن ساۋالدارعا جاۋاپ العانداي بولدىق. باستىسى بۇل بەلگىسىز مەرزىمگە جاسالعان جوسپار عانا ەمەس, دەنى الداعى ءۇش جىلدا جۇزەگە اسۋى ءتيىس ناقتى مىندەتتەر.
پرەزيدەنت تالاي جىل تامىر جايىپ, ءار سالادا ءبىر-ءبىر قوجايىنعا اينالعان مونوپوليستەردىڭ جاۋاپكەرشىلىگىن ارتتىرۋدى تاپسىردى. اسىرەسە, وڭىرلەردەگى مونوپوليست كومپانيالاردىڭ ارەكەتىنە باقىلاۋ جاسار ۋاقىت جەتتى. سودان سوڭ شەتەلدەرگە, كورشى مەملەكەتتەرگە ەنەرگەتيكالىق تاۋەلسىزدىككە ۇمتىلۋدىڭ وزەكتىلىگىن باسا ايتتى. بۇل رەتتە, جالپىحالىقتىق رەفەرەندۋممەن شەشىم قابىلدانار اتوم ەلەكتر ستانساسىن سالۋ ماسەلەسىنىڭ ورنى ماڭىزدى.
ەلىمىز نەگىزىنەن ترانسشەكارالىق وزەندەردىڭ سۋىنا تاۋەلدى. بيىلعىداي قۋاڭشىلىق پەن سۋ تاپشىلىعىن الدىن الۋ ۇلتتىڭ قاۋىپسىزدىگىمەن پارا-پار وتكىر ماسەلە. وسى ورايدا 20 سۋ قويماسىن سالىپ, 15 بوگەندى رەكونسترۋكتسيادان وتكىزۋدى تاپسىرۋى ستراتەگيالىق تۇرعىدان تاريحي شەشىم. ويتكەنى اۋىز سۋ ۋاقىت وتكەن سايىن دۇنيە جۇزىندە ەڭ وزەكتى پروبلەماعا اينالدى. ءارى وسى جۇمىستاردى جۇزەگە اسىرۋ ماقساتىندا سۋ رەسۋرستارى جونىندەگى مينيسترلىكتىڭ قۇرىلعانى كوزىقاراقتى جۇرتتىڭ كوكەيىندە جۇرگەن جاي ەدى.
جولداۋدا ينفراقۇرىلىمدى جەتىلدىرۋ, اۋىل شارۋاشىلىعىن قولداۋ, تسيفرلاندىرۋدى دامىتۋ, كاسىپكەرلىكتى قۋدالاۋدى دوعارۋ سىندى اسا وزەكتى ماسەلەلەر كەڭىنەن قامتىلدى.
ەندىگى مىندەت جولداۋدى كەزەڭ-كەزەڭىمەن جۇزەگە اسىرۋ. ءبىز ءوز كەزەگىمىزدە ءماجىلىس دەپۋتاتتارى رەتىندە وسى سەسسيادا مىندەتتەردى ىسكە اسىرۋدى زاڭنامالىق تۇرعىدان قامتاماسىز ەتەمىز.
جارقىنبەك امانتاي ۇلى,
ءماجىلىس دەپۋتاتى