قازاقستاندا 2023-2025 جىلدارعا ارنالعان كەشەندى جوسپار اياسىندا بالالاردى زورلىق-زومبىلىقتان قورعاۋ, ءسۋيتسيدتىڭ الدىن الۋ, ولاردىڭ قۇقىقتارى مەن سالاماتتىلىعىن قامتاماسىز ەتۋ بويىنشا جاڭا شارالار جۇزەگە اسىرىلادى. قر پرەمەر-ءمينيسترى ءاليحان سمايىلوۆ ءتيىستى قاۋلىعا قول قويدى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
قۇجات مەملەكەت باسشىسىنىڭ 2022 جىلدىڭ جازىندا وتكەن ۇكىمەتتىڭ كەڭەيتىلگەن وتىرىسىندا بەرگەن تاپسىرماسىن ورىنداۋ ماقساتىندا ازىرلەندى. ونىڭ شەڭبەرىندە وبلىستار, اۋداندار جانە قالالار بويىنشا تاۋەكەلدەردىڭ ينتەراكتيۆتى كارتاسى جاسالادى, وندا بالالار اراسىنداعى قۇقىق بۇزۋشىلىقتار, زورلىق-زومبىلىق جانە قورلاۋ فاكتىلەرى, ساباققا كەلمەۋ تۋرالى وزەكتى اقپارات كورسەتىلەدى. بۇل «داعدارىستى باسقارۋ» ءادىسىن قولدانا وتىرىپ, ساپالى مونيتورينگ جۇرگىزۋگە جانە شۇعىل كومەك كورسەتۋگە كومەكتەسەدى.
سونىمەن قاتار فينليانديا تاجىريبەسى نەگىزىندە ءبىلىم بەرۋ ۇيىمدارى ءۇشىن ونلاين ساۋالنامالار, تاقىرىپتىق ساباقتار, اڭگىمەلەسۋ جانە ساباقتان تىس ءىس-شارالار وتكىزۋدى كوزدەيتىن بۋللينگكە قارسى باعدارلاما ازىرلەۋ جوسپارلانىپ وتىر. سونداي-اق زورلىق-زومبىلىققا, قورقىتۋعا نە كيبەربۋللينگكە ۇشىراعان نەمەسە كۋا بولعان كامەلەتكە تولماعانداردى ەرتە انىقتاۋ جانە ولارعا كومەك كورسەتۋ ادىستەمەسى بەكىتىلەدى.
بۇدان باسقا, كەيس-مەنەدجمەنت تەتىگىن قولدانۋ ارقىلى مەكتەپىشىلىك ەسەپكە الۋدى جۇرگىزۋ تاسىلدەرى وزگەرتىلەدى. بۇل داعدارىس جاعدايىن انىقتاۋدان باستاپ جەكە جۇمىس جوسپارىن قۇرۋ جانە جاۋاپتى مۇعالىمدەردى بەكىتۋ ارقىلى ماسەلەنى تولىعىمەن شەشۋگە دەيىنگى شارالاردى قابىلداۋدى قامتيدى.
قۇجاتتى جۇزەگە اسىرۋ اياسىندا بالالارعا ارنالعان BalaQorgau بىرىڭعاي بايلانىس ورتالىعىن قۇرۋ, مەكتەپكە دەيىنگى, ورتا, كاسىپتىك جانە تەحنيكالىق ءبىلىم بەرۋ ۇيىمدارىندا جەكە قاۋىپسىزدىك ساباقتارىن ەنگىزۋ, سونداي-اق بالالارعا ارنالعان قاۋىپسىز كونتەنتتى قالىپتاستىرۋ ءۇشىن ەلىمىزدەگى TikTok, Instagram, Facebook, ۆكونتاكتە جانە YouTube پلاتفورمالارىنىڭ وكىلدەرىمەن جۇمىس جۇرگىزۋ جوسپارلانىپ وتىر.
سونىمەن قاتار كەشەندى جوسپاردا تۇرمىسى تومەن وتباسىلارعا كومەك كورسەتۋ, ايماقتىق پسيحولوگيالىق قولداۋ ورتالىقتارىن قۇرۋ, پەداگوگ-پسيحولوگتەر مەن الەۋمەتتىك پەداگوگتەردىڭ سانىن كوبەيتۋ, پەداگوگ-پسيحولوگتەردىڭ سىنىپپەن قوسىمشا جۇمىس ۋاقىتىن ەنگىزۋ جانە جالپى ولاردىڭ جۇمىسىن تسيفرلاندىرۋ بويىنشا شارالار قاراستىرىلعان.
وعان قوسا اتا-انا مەن بالا اراسىنداعى قارىم-قاتىناستى نىعايتۋ, مادەني تاربيە بەرۋ جانە بالالار مەن جاسوسپىرىمدەردىڭ شىعارماشىلىق الەۋەتىن جۇزەگە اسىرۋ, بالالار سپورتىن دامىتۋ جانە كامەلەتكە تولماعانداردى قوسىمشا بىلىممەن كەڭىنەن قامتۋ شارالارى قابىلدانادى.
كەشەندى جوسپاردى ىسكە اسىرۋ ناتيجەسىندە كامەلەتكە تولماعاندار اراسىنداعى جانە ولارعا قاتىستى قۇقىق بۇزۋشىلىقتار, سونداي-اق وزىنە قول جۇمساۋ فاكتىلەرى مەن ارەكەتتەرى ايتارلىقتاي تومەندەيدى دەپ كۇتىلەدى. بۇل رەتتە بالالاردى قورعاۋ جانە ولاردىڭ بوس ۋاقىتىن قامتۋ دەڭگەيى ارتادى.
جوسپاردى ىسكە اسىرۋ بارىسىندا قازاقستاندا قوسىمشا 1000 پەداگوگ-پسيحولوگ پەن 2000 الەۋمەتتىك پەداگوگ دايارلانادى. سونىمەن قاتار بالالاردىڭ قۇقىقتارىن قورعاۋ سالاسىندا جۇمىس ىستەيتىن, بىلىكتىلىگىن ارتتىرۋ شارالارىمەن قامتىلعان پەداگوگتەردىڭ ۇلەسى جىل سايىن 33%-عا ارتادى.