ەندى كۇزگى اسكەرگە شاقىرۋ ءۇشىن اسكەري مىندەتتى جاستارعا SMS-حابارلاما جىبەرىلەدى. بۇل تۋرالى شىمكەنت قالالىق قورعانىس ىستەرى دەپارتامەنتىنىڭ باستىعى, پولكوۆنيك ابدىعابيت شەگەباەۆ ۇقك شەكارا قىزمەتى بولىمىنە اسكەرگە شاقىرىلۋشىلاردىڭ ءبىرىنشى كومانداسىن سالتاناتتى تۇردە جىبەرۋ راسىمىندە حابارلادى.
وسى كۇزدە شىمكەنتتەن 900-دەن استام ازامات اسكەري قىزمەتكە شاقىرىلادى. ال العاشقى لەكتە 26 جاس سارباز اسكەرگە جىبەرىلدى. ءبىرىنشى كوماندانى سالتاناتتى تۇردە شىعارىپ سالۋ قالالىق قورعانىس ىستەرى دەپارتامەنتىنىڭ ساپتىق الاڭىندا ءوتتى. اسكەرگە شاقىرىلۋشىلاردى وسى ماڭىزدى وقيعامەن قۇتتىقتاۋعا قالالىق ارداگەرلەر ۇيىمىنىڭ وكىلدەرى, جالپى ءبىلىم بەرەتىن مەكەمەدەگى «جاس سارباز» اسكەري-پاتريوتتىق سىنىپتارىنىڭ تاربيەلەنۋشىلەرى, اسكەري پوليتسيا ءبولىمىنىڭ وكىلدەرى, گارنيزوننىڭ اسكەري وركەسترى جانە دەپارتامەنتتىڭ جەكە قۇرامى قاتىستى.
اسكەرگە شاقىرىلۋشىلارعا اق جول تىلەگەن, قارۋلى كۇشتەر ارداگەرلەرى قالالىق كەڭەسىنىڭ توراعاسى, وتستاۆكاداعى پولكوۆنيك سەرىكباي وڭباەۆ بارلىق ۋاقىتتا مەملەكەت الدىندا ەلدىڭ قاۋىپسىزدىگىن, حالىقتىڭ بەيبىت ءومىرىن قامتاماسىز ەتۋدىڭ مىندەتى تۇراتىنىن اتاپ ءوتتى.
«وتانى مەن حالقىن قورعاۋ ەر ازاماتتىڭ قاسيەتتى پارىزى, بۇلجىماس بورىشى بولىپ سانالادى. ءبىزدىڭ باستى مىندەتىمىز – اتا-بابامىز قالدىرىپ كەتكەن ۇلان-عايىر جەردى كوزدىڭ قاراشىعىنداي ساقتاۋ, بايلىعىمىزعا كوز الارتقان دۇشپاندىق ارەكەتتەرگە جول بەرمەۋ. سول سەبەپتى جاستاردى پاتريوتتىق رۋحتا تاربيەلەۋ اتا-انالار مەن ءبىلىم مەكەمەلەرى ءۇشىن ۇلكەن جاۋاپكەرشىلىك جۇكتەيدى. اسىرەسە الەمدە بولىپ جاتقان قازىرگى كۇردەلى احۋالدا مىقتى اسكەردىڭ بولۋى كۇن تاربىنە شىقتى. بۇل تۋرالى پرەزيدەنت قاسىم-جومارت توقاەۆ تا بيىلعى جولداۋىندا جاقسى ايتىپ ءوتتى. ەلىمىزگە مىقتى اسكەري قارۋلارمەن بىرگە بىلىكتى اسكەري كادرلار قاجەت. سوندىقتان جاستاردىڭ اسكەري مىندەتىن وتەۋگە قۇلشىنىستارى وراسان زور بولعانىن قالايمىن. بۇل ولاردىڭ سانالى, جاۋاپكەرشىلىگى زور ازامات بولىپ جەتىلۋىنە كەپىلدىك بەرسە, ەكىنشىدەن وسكەلەڭ ۇرپاقتىڭ بويىنداعى جالىنداعان پاتريوتتىق سەزىمنىڭ كورسەتكىشى دە وسىمەن ولشەنەتىنى راس. وسى ورايدا اسكەر ساپىنا الىنعان جاس جاۋىنگەرلەرگە دەنساۋلىق, تابىستى قىزمەت, اسكەري ماماندىقتى ابىرويمەن يگەرىپ شىعۋدى تىلەيمىن», دەدى سەرىكباي وڭباەۆ.
ءوز كەزەگىندە دەپارتامەنت باستىعى ابدىعابيت قۇربان ۇلى, شىمكەنت قالاسىنىڭ جەرگىلىكتى اسكەري باسقارۋ ورگاندارىندا اسكەرگە ەڭ ۇزدىك جانە دايىندالعان جاستاردى ىرىكتەۋ ءۇشىن بارلىق جۇمىستار جاسالاتىنىن, مىندەتتى تۇردە اسكەرگە شاقىرىلۋشىلاردى مامانداندىرىلعان مەكەمەلەردە – پسيحياتريالىق, ناركولوگيالىق, تەرى-ۆەنەرولوگيالىق جانە تۋبەركۋلەزگە قارسى ديسپانسەرلەردە تىركەۋلەرىنىڭ جوقتىعىنا تەكسەرۋ جۇرگىزىلەتىنىن مالىمدەدى.
– قازىر اسكەرگە شاقىرىلۋشىلارمەن وتە ۇلكەن, قاجىرلى جۇمىس باستالدى. ولاردى «اسكەري قىزمەت جانە اسكەري قىزمەتشىلەردىڭ مارتەبەسى تۋرالى» زاڭعا سايكەس اسكەرگە شاقىرۋدان كەيىنگە قالدىرۋعا نەمەسە بوساتۋعا قۇقىعى جوق ۇمىتكەرلەر اراسىنان ىرىكتەپ الادى, – دەپ تولىقتىرىپ ءوتتى پولكوۆنيك ابدىعابيت شەگەباەۆ.
سالتاناتتى بولىمنەن كەيىن «جاس سارباز» اسكەري-پاتريوتتىق سىنىپتارىنىڭ تاربيەلەنۋشىلەرى وزدەرىنىڭ اعالارىنا مۋزىكالىق سالەمدەمە جولداپ, پاتريوتتىق اندەر شىرقاپ بەردى, سونداي-اق ارنايى سىيلىقتار جاسادى.
شىمكەنت