اتىراۋ وبلىسى حالىقارالىق اۆتوجول دالىزىندە ورنالاسقان. الايدا وسى كەزگە دەيىن مۇنايلى شاھاردى اينالىپ جۇرەتىن جولايرىعى سالىنباعان. سول سەبەپتەن رەسەي ارقىلى كەلەتىن اۋىر جۇك كولىكتەرى وزگە وڭىرلەرگە قاتىناۋ ءۇشىن اتىراۋ قالاسى ارقىلى وتەتىن جولمەن جۇرۋگە ءماجبۇر. اۋىر جۇك كولىكتەرى قالا ىشىندەگى جولدىڭ ساپاسىن بۇزادى. تار كوشەدە كولىك كەپتەلىسى ءجيى تۋىندايدى.
ەندى بۇل تۇيتكىلدىڭ ءتۇيىنىن تارقاتۋ ءۇشىن شاھاردىڭ سولتۇستىك باعىتىنان اينالما جول قۇرىلىسى باستالدى. ونىڭ ۇزىندىعى – 26 شاقىرىم. «جول اكتيۆتەرىنىڭ ۇلتتىق ساپا ورتالىعى» رمك اتىراۋ وبلىستىق فيليالىنىڭ ءبولىم باسشىسى نۇرلان ءجانتۋريننىڭ ايتۋىنشا, جايىق وزەنىنىڭ وڭ جاعالاۋىنداعى «اتىراۋ – ورال» رەسپۋبليكالىق تاسجولىنىڭ 10 شاقىرىمىن جانە سول جاعالاۋداعى «اتىراۋ – يندەر» جولىنىڭ 9 شاقىرىمىن قوسۋ ءۇشىن كوپىر سالىنادى.
«ەكى كۇرەجولمەن قيىلىساتىن ەكى جولايرىعى مەن وزەن ۇستىنەن ءبىر كوپىر سالىنادى. فيليالدىڭ ماماندارى جول قۇرىلىسىنا پايدالانىلاتىن توپىراق قاباتىنان سىناما الىپ, ۇدايى تەكسەرۋ جۇرگىزەدى. بۇل جول اتىراۋ قالاسىنداعى كولىك قوزعالىسىنىڭ اعىنىن تومەندەتۋگە, نەگىزگى اۆتوكولىك جولدارىنداعى كەپتەلىستى, ترانزيتتىك كولىكتەر سانىن ازايتۋعا مۇمكىندىك بەرەدى», دەيدى ن.جانتۋرين.
وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى سامات ايتقاليەۆتىڭ دەرەگىنە قاراعاندا, «قازاۆتوجول» ۇك» اق تاپسىرىسىمەن ەكىنشى كاتەگوريا ساناتىندا سالىناتىن اينالما جول قۇرىلىسىنىڭ مەردىگەرى رەتىندە «اzVitr» جانە «اقجول قۇرىلىس» كومپانياسى تاڭدالعان. جول قۇرىلىسىن 2024 جىلدىڭ سوڭىنا تامان اياقتاۋ كوزدەلگەن. جول قۇرىلىسىنىڭ قۇنى 28 ملرد تەڭگەنى قۇرايدى.
«قازىر سولتۇستىك اينالما اۆتوجولدىڭ قۇرىلىسى قارقىندى ءجۇرىپ جاتىر. قۇرىلىس جۇرگىزىلەتىن 12 شاقىرىم اۋماقتا وسىمدىكتەر قاباتى الىنىپ, 101 565 تەكشە مەتر جولدىڭ نەگىزگى قاباتى توسەلدى. اتىراۋدان رەسەيدەگى استراحان وڭىرىنە قاتىنايتىن تاسجولدىڭ قيىلىسىندا قۇبىر ۇلگىسىندەگى وتكەلدىڭ قۇرىلىسى باستالدى. وعان 50 قازىق قاجەت. ونىڭ 12-ءسى قاعىلدى», دەپ مالىمدەدى س.ايتقاليەۆ.
اتىراۋ وبلىسى