پرەزيدەنت رەسپۋبليكالىق وليمپيادالىق دايارلىق بازاسىنا باردى

پرەزيدەنت  الماتى وبلىسىنا جاساعان جۇمىس ساپارى اياسىندا وليمپيادالىق دايارلىق ورتالىعى قۇرىلىسىنىڭ بارىسىمەن تانىستى.

تۋريزم جانە سپورت ءمينيسترى ەرمەك مارجىقپاەۆ بۇگىندە اتلەتيكالىق مانەج, مۇز ارەناسىن, كوپفۋنكتسيونالدى سپورت زالىن, كوركەم جانە سپورتتىق گيمناستيكا زالىن, اكىمشىلىك عيماراتى مەن قوناق ءۇي سالۋ  جۇمىستارى اياقتالعانىن باياندادى. سونىمەن قاتار ءجۇزۋ باسسەينىنىڭ, جەكپە-جەك زالىنىڭ, سپورتتىق اتىس الاڭىنىڭ, تريبۋنالارى بار ستاديون مەن ساداق اتاتىن ورىننىڭ قۇرىلىسى اياقتالىپ كەلەدى.

پرەزيدەنت تمد-داعى ەڭ ءىرى سپورت كەشەندەرىنىڭ ءبىرى سانالاتىن ينفراقۇرىلىمدى ارالاپ كوردى. حالىقارالىق ستاندارتتارعا ساي بۇل نىسان 2300 سپورتشىعا ارنالعان.

مەملەكەت باسشىسىنا اتالعان بازانىڭ بىرەگەي ەرەكشەلىگى تۋرالى ايتىلدى. مۇندا وقۋ-جاتتىعۋ ساباقتارىن, ەمدەۋ-ساۋىقتىرۋ شارالارىن, حالىقارالىق جانە رەسپۋبليكالىق جارىستار وتكىزۋگە ارنالعان 9 جابىق سپورت عيماراتى ورنالاسقان. بۇدان بولەك, جەڭىل جانە اۋىر اتلەتيكا, ۆولەيبول, باسكەتبول, شاعىن فۋتبول, شايبالى حوككەي, كونكي سپورتى, بوكس, كۇرەستىڭ بارلىق تۇرلەرى, جەكپە-جەك ونەرى, سۋ سپورتىنىڭ تۇرلەرى, سپورتتىق وق اتۋ, ساداق اتۋ  سەكىلدى سپورتتىڭ 23 ءتۇرى بويىنشا وليمپيادالىق رەزەرۆ پەن ۇلتتىق قۇراما كوماندالارىن دايارلاۋ جوسپارلانىپ وتىر. 

پرەزيدەنتكە اتلەتيكالىق مانەج بەن سپورتشىلارعا ارنالعان قوناق ءۇي كورسەتىلدى. 

سودان كەيىن قاسىم-جومارت توقاەۆ اتالعان بازانىڭ ورتالىق الاڭىنداعى وليمپيادا الاۋىنىڭ جانىندا سپورتشىلارمەن اڭگىمەلەستى.

پرەزيدەنت بۇقارالىق جانە بالالار مەن جاسوسپىرىمدەر سپورتىن دامىتۋ ماڭىزدى ەكەنىن اتاپ ءوتتى.

– قازىر نەگىزگى كۇش-جىگەردى وليمپيادا مەن ازيا  ويىندارىنا, سونداي-اق وزگە دە ەۋروپالىق, الەمدىك دەڭگەيدەگى تۋرنيرلەرگە دايىندالۋ ءۇشىن جۇمساۋ كەرەك. قازاقستان سپورت دەرجاۆاسى بولۋعا ءتيىس. سول ءۇشىن ءبىز ماڭىزدى سپورت  نىساندارىن سالىپ جاتىرمىز. قالاشىقتىڭ سپورتتىق الەۋەتىن ارتتىرا بەرۋىمىز كەرەك, – دەدى قاسىم-جومارت توقاەۆ. 

كەزدەسۋ سوڭىندا مەملەكەت باسشىسى جاس سپورتشىلارعا جاڭا جەڭىستەر تىلەدى.