اقتاۋ قالاسىندا ش.ەسەنوۆ اتىنداعى كاسپي مەملەكەتتىك تەحنولوگيالار جانە ينجينيرينگ ۋنيۆەرسيتەتىندە ەكىنشى دۇنيەجۇزىلىك, جاپون جانە كورەي سوعىستارىنىڭ ارداگەرى مۇقىر نياز ۇلىنا ارنالعان وقۋ اۋديتورياسى اشىلدى, دەپ جازادى Egemen.kz.
ماڭعىستاۋ وبلىسىنىڭ اكىمى نۇرلان نوعاەۆ, اتالعان ۋنيۆەرسيتەتتىڭ پرەزيدەنتى بەرىك احمەتوۆ, مۇقىر نياز ۇلىنىڭ ۇرپاقتارى جانە قوناقتار قاتىسقان اۋديتوريانىڭ سالتاناتتى اشىلۋىنان سوڭ ارداگەردىڭ ءومىربايانى تۋرالى فيلم كورسەتىلىپ, ستۋدەنتتەرگە قاجەتتى بارلىق قۇرالدارمەن جابدىقتالعان جاڭا وقۋ اۋديتورياسىنا ەكسكۋرسيا جۇرگىزىلدى.
«ونىڭ سوعىس كەزىندەگى ەرلىكتەرى كوپشىلىك ءۇشىن ماڭىزدى ۇلگى بولىپ قالا بەرەدى. مۇندا وقيتىن ستۋدەنتتەرگە وزدەرىنىڭ باتىر اتا-بابالارىنىڭ ومىرلەرىنە قاتىستى اقپاراتتاردى زەرتتەۋگە مۇمكىندىك تۋادى. مۇقىر نياز ۇلىنىڭ ۇرپاقتارى وبلىستىڭ ءتۇرلى سالالارىندا بەلسەندى قىزمەت ەتىپ جاتىر», دەپ اتاپ ءوتتى وبلىس باسشىسى نۇرلان نوعاەۆ.
وبلىس اكىمىنىڭ ءباسپاسوز قىزمەتى حابارلاعانداي, ءۇش سوعىسقا قاتىسقان مۇقىر نياز ۇلى سوعىستان كەيىنگى جىلدارى كەشكى مەكتەپتى ءبىتىرىپ, 1959 جىلى كوكپ وك جوعارى مەكتەبىنە وقۋعا تۇسكەن, 5 جىلدان كەيىن ساياساتتانۋشى-ەكونوميست ماماندىعىن مەڭگەرگەن. كومسومولدىڭ ءبىرىنشى حاتشىسى بولىپ جۇمىس ىستەگەن, بىرنەشە رەت اۋداندىق كەڭەستىڭ دەپۋتاتى بولىپ سايلانعان.