4 قىركۇيەك كەشكى ساعات 22.00 شاماسىندا تەمىر اۋدانىنىڭ كەڭقياق اۋىلدىق اۋرۋحاناسىنا باس اينالۋ, لوقسۋ بەلگىلەرىمەن ءبىر مەزگىلدە سەگىز ادام جەتكىزىلگەن, دەپ حابارلايدى Egemen.kz.
ونىڭ تورتەۋى بەس, توعىز, ون ءبىر جاستاعى بالالار بولسا, قالعانى ەرەسەكتەر. جەدەل جاردەم قىزمەتىمەن جەتكەن ناۋقاستاردىڭ تورتەۋى بىردەن اۋرۋحاناعا جاتقىزىلدى. دارىگەرلەر ولاردىڭ ءبارى ۇيدە گاز پليتاسىنان شىققان گاز يىسىنەن ۋلانعاندارىن انىقتادى.
«بۇگىن تاڭەرتەڭ اۋرۋحاناعا جاتقىزىلعاندار ۇيلەرىنە جىبەرىلدى», دەدى وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى بەكبولات ءىزباساروۆ.
4 قىركۇيەكتە كۇنى بويى كەڭقياق, شۇبارشي, ساركول, قۇمساي, قوپا اۋىلدارىنداعى اۋىلىشىلىك گاز تاراتۋ جەلىلەرىنە جوندەۋ جۇمىستارىن جۇرگىزۋگە بايلانىستى كۇنى بويى گاز بەرۋ توقتاتىلىپ, كەشكى ساعات 20.30-دا قوسىلدى. بەس اۋىلدىڭ تۇرعىندارى كەشە كۇنى بويى دالادا جاعىمسىز گاز ءيىسى سەزىلگەنىنە شاعىمداندى. سول اۋىلدارعا گاز تاراتۋمەن اينالىساتىن «تەحنوگاز» جشس باسشىسى رۋسلان امىرتاەۆ كۇنى بويى وسى اۋىلداردا اۋىلىشىلىك گاز تاراتۋ جەلىسىنە جوندەۋ جۇمىستارى جۇرگىزىلگەنىن راستادى. ال كەڭقياق ەلدىمەكەنىندە ۋلانعان ادامدار گاز پليتاسىن جاققاندا ءۇي ىشىنە تارالعان جاعىمسىز يىستەن بىردەن باستارى اينالعان.
«كەشە كەشكى ساعات 20.50-شاماسىندا كەڭقياق جانە شۇبارشي ەلدى مەكەندەرىنىڭ تۇرعىندارىنان گازدىڭ ءيىسى قاتتى شىعىپ جاتقانى جونىندە شاعىم ءتۇستى. گاز قۇبىرى جاڭاجول گاز وڭدەۋ زاۋىتىنان شۇبارشيدەگى تاراتۋ جەلىسىنە كەلگەن سوڭ ءارى قاراي كەڭقياق, ساركول, قۇمساي, قوپا اۋىلدارىنا بارادى. ال جاڭاجول گاز وڭدەۋ زاۋىتىنان قۇبىر جاعابۇلاق ەلدى مەكەنىنە تىكە بارادى. بۇل اۋىلدان بىزگە شاعىم تۇسكەن جوق», دەدى رۋسلان امىرتاەۆ.
جاڭاجول گاز وڭدەۋ زاۋىتىنان تەمىر اۋدانىنىڭ ەلدى مەكەندەرىنە تارايتىن توراپتىق جەلىسى «ينتەرگاز-ورتالىق ازيا» كومپانياسىنا تيەسىلى.
كەڭقياقتاعى جاعداي ءۇي ىشىندە تۇرمىستىق پليتالاردى پايدالانۋ كەزىندە ورىن العان جاعداي دەيدى ەكولوگيا دەپارتامەنتى مەملەكەتتىك ەكولوگيالىق باقىلاۋ ءبولىمىنىڭ باسشىسى تۇرار قوجانوۆ. ونىڭ ايتۋىنشا, كەشە «قازگيدرومەتتىڭ» كەڭقياقتاعى بەكەتىنە اۋادا زياندى زاتتاردىڭ اسىپ ءتۇسۋى تۋرالى دەرەك تۇسكەن جوق. ەكولوگتار كەڭقياقتاعى سەگىز ادامنىڭ ۋلانۋ جاعدايىنا قۇبىرداعى مەتان گازىنا قوسىلاتىن ودورانت قوسپاسىنىڭ مولشەردەن كوپ قوسىلۋى سەبەپ بولۋى مۇمكىن دەگەن پىكىردە. ودورانت ادامداردىڭ ۋلانۋىن بولدىرماۋ ءۇشىن قۇبىرداعى مەتان گازىنا قوسىلادى. قازىر كەڭقياق پەن شۇبارشيدەگى جاعدايعا بايلانىستى تەمىر اۋدانىندا كوميسسيا قۇرىلدى.
اقتوبە وبلىسى