ورالبەك قابوكە شىعارمالارى وتباسى قۇندىلىقتارىنىڭ قادىر-قاسيەتىن تەرەڭنەن سەزىنۋگە شاقىرادى. ونىڭ قالامىنان تامعان سىرلى بوياۋلار جانىڭا وزگەشە جىلى ۇشىرايتىنى سوندىقتان. سۋرەتشى ءوز كارتينالارىنا تاقىرىپ ىزدەپ, قيادان اسىپ, ەل شەتىنە شىعىپ كەتپەيدى. ءومىر مەن بولمىستىڭ زاڭدىلىقتارىن اتا داستۇردەن, ۇلتتىق تۇرمىستىڭ عاسىرلار بويى سىننان ءوتىپ, دالەلدەنگەن قارىم-قاتىناسىنان, ادام جان-دۇنيەسىنىڭ ىرعاقتارىنان ىزدەيدى.
كەز كەلگەن سۋرەتشىنىڭ ءتىسى باتا بەرمەيتىن تىڭ تاقىرىپتارعا بوي الدىرعان قىلقالام يەسى ونەردى ءومىرىم دەپ بىلەدى. كيەلى ونەردىڭ كيەسىن كەتىرمەۋ, تۇنىعىن لايلاماۋ سۋرەتشىنىڭ باستى ۇرانى. جاس سۋرەتشىنىڭ شىعارمالارى جىلدار جىلجىپ, عاسىرلار الماسسا دا وتباسىنداعى جاراسىم مەن جىلىلىق, ساعىنىش پەن قامقورلىق سىندى ىزگى سەزىمدەر ءوز بيىگىندە قالا بەرەتىنىن دالەلدەيدى. كوز الدىڭداعى جانسىز بەينەدەن الدەقاشان ومىردەن وتكەن اتاڭ مەن اجەڭدى كورەسىڭ. كوڭىل تۇكپىرىندە قاتتالىپ قالعان ساعىنىش قايتا قوزدايدى. جۇرەك قىلىن شەرتكەن ارمان-تىلەك ماڭگىلىك اڭسارعا ۇلاسىپ, جان-دۇنيەڭدى شىمشىلايدى. وسى زامانعى ونەر تىلىنە ساي وتكىر دە ءوتىمدى تۋىندىلار قىلقالام شەبەرىنىڭ ۇنەمى ىزدەنىس ۇستىندە جۇرەتىنىن اڭعارتادى. ونەرتانۋشىلار ورالبەك سۋرەتتەرى ونەگە مەن كيەنى ءوزارا ۇندەستىرىپ, ۋاقىت پەن زامان تىنىسىنا ساي بەرە بىلۋىمەن ەرەكشەلەنەدى دەپ ەسەپتەيدى.
– بۇل كۇندەرى ونەردىڭ ءورىسى قانداي كەڭ بولسا, ونىڭ بەينەلەۋ مۇمكىندىكتەرى دە, وبرازدىق پايىمداۋلارى دا سونشالىقتى مول ءادىس امالداردان تۇرادى. ورالبەك قولتاڭباسىنىڭ باستى ەرەكشەلىگى – تاقىرىپتىق, كوپ بەينەلى كارتينالارعا قالام تەربەۋى. ول ادەمى پەيزاجدى ەتيۋدتەرمەن كەسكىنى كەلگەن پورترەتتەرمەن كورەرمەندى الداۋسىراتپاي كەسەك, قابىرعالى تۋىندىلار ارقىلى ءوز ويىن ازاماتتىق كەلبەتى مەن كوزقاراسىن كورسەتكىسى كەلەدى. ءاربىر كارتينا سۋرەتكەردىڭ جازىلىپ قويعان مىنەزدەمەسىندەي دۇنيەلەر. سولار ارقىلى كورەرمەن سۋرەتشىنى تانىپ بىلەدى, وعان دەگەن كوزقاراسى قالىپتاسادى, قارىم – قاتىناس جاساي باستايدى. ءسويتىپ ونەر الەۋمەتتىك قاجەتتىلىككە يە بولادى. ورالبەك ونەردىڭ مىنەزىن بولجاپ بىلە المايتىن, ولشەپ ومىلدىرىك سالدىرمايتىن تازالىق پەن ادالدىققا عانا مويىن ۇسىناتىن اق بوز تۇلپارىنىڭ جالىنان ۇستاعان سياقتى, – دەيدى ونەرتانۋشى سامال مامىتوۆا.
مىنا ءبىر سۋرەتتەگى داستارحان باسىنا جايعاسقان جاراسىمدى جانۇيا كىشكەنتاي مەملەكەت ىسپەتتى. ۇرپاعىنا اڭىزىن شەرتىپ, ونەگەسىن ءوربىتىپ وتىرعان قازىنالى قاريا قاسيەتتىڭ التىن دىڭگەگىندەي. قاريانىڭ تۋ سىرتىنا سايالى بايتەرەكتىڭ بەينەلەنۋى اكە مارتەبەسىن بارىنشا اسقاقتاتىپ تۇر. ءار وتباسى مۇشەسىنىڭ داستارحان باسىنان ءوز جولىنا ساي ورىن الۋى قازاق وتباسىنداعى ىزەت پەن قۇرمەتتىڭ, كىسىلىك پەن كىشىلىكتىڭ جارقىن ۇلگىسىن كورسەتەدى.
الماتى